敦子加入AKB 6年，一直霸住做一姐，家話退隊，其他隊友終於有機會上位。

日面

最近突然宣布退出AKB48的主將前田敦子，上週孖住好姊妹增田有華同仲川遙香空降香港，一連兩日着住短裙又唱又跳，為「活力日本展IN香港」開騷，搞到班港男high到震。來港主要目的為宣傳日本，敦子對退隊事件封口唔提。不過據知敦子之所以突然離隊，係其所屬的經理人公司因有感敦子霸住主將位多年，所以急於換血，更大原因係早前敦子拍劇時得罪拍檔山下智久而遭封殺。得罪尊尼事務所偶像，睇怕難有好下場。


AKB48最紅主將前田敦子，上週一（26日）帶埋隊友增田有華同仲川遙香來港開騷。不過來港前一晚，敦子於日本同AKB成員開演唱會期間，突然喊住口宣布退出AKB，至今仍未定退隊日期，但敦子仍是AKB旗下的藝人，亦會留在公司作單飛發展。

被迫退隊
有傳敦子退隊主因，是今年初敦子與尊尼事務所當紮偶像山下智久，拍攝日劇《人生最好的終結方式》時得罪對方。山P同敦子兩大偶像首次拍劇，結果收視竟曾跌得9.1%，成為山P入行以來最低收視日劇，此事已令尊尼事務所大為緊張，而最大致命傷係當時敦子因受唔住壓力，拍劇時經常遊魂，更多次忘記對白食NG，搞到劇組遲收工，更令山P㷫過辣雞，最後忍唔住要求事務所封殺所有同敦子合作的機會，有指AKB方面為懲罰敦子，終於提早叫敦子退隊。敦子得罪尊尼事務所，即同自己前途過唔去。

隊友眼紅
家陣20歲的敦子，14歲已加入AKB48大家庭，一直被捧為隊中一姐，而公司所搞的「人氣總選舉」，過去3屆裏面，敦子已攞咗兩屆no. 1，令唔少隊友眼紅，加上其公司最近決定要換血，另捧其他隊員上位，所以迫敦子提早退隊。既然阻住地球轉，退隊當畀個機會班隊友同自己囉。

港迷唔捨得
敦子來港前一日宣布退隊，唔少香港fans都話唔捨得。

麻友食住上
今年AKB嘅「人氣總選舉」將於6月6日舉行，上年冠軍前田敦子離隊唔玩，今年大把姊妹爭坐一姐位。據稱AKB方面原本想力捧剛從SKE48借將過AKB48嘅松井珠理奈，但珠理奈始終未夠班，所以老闆秋元康將改為力谷上年「人氣總選舉」，排名第5嘅渡邊麻友上位，貪18歲麻友青春又肯剝，最重要係聽話，唔會好似敦子咁，鍾意扭計做頂心杉。而一直同敦子鬥到死嘅大島優子，現已年過23歲屬隊中老將，日本傳媒預測，優子將繼敦子後第2個「卒業」（即退隊）的隊員。 ####


上週二於九展出騷前，敦子亦抽時間會傳媒，但敦子全程封口唔講退隊原因，只笑晒口話一直好想嚟香港，終於夢想實現等說話交行貨。


上週日AKB於埼玉縣開騷，尾聲時敦子突然宣布退隊，因事出突然，成班隊友即攬住敦子一直喪哭。


於日劇《人生最好的終結方式》中，飾演山P細妹角色嘅敦子，唔只被插演技差，最慘因拍戲時遊魂，激嬲山P，搞到冇運行。


Teresa 學生：好唔捨得，但冇辦法，希望敦子有好發展。


Bosco 學生：梗係唔想敦子離隊，但會尊重佢決定。


趷籮引港男上週二晚，敦子連同好姊妹增田有華（左）同仲川遙香（右）出席「活力日本展IN香港」騷時，着住短裙嘅3人經常趷籮扮cute跳舞，引到全場港男high爆尖叫。


最新CM 敦子上週宣布退隊，但之前已拍落一大堆廣告，其中幫丸美屋食品廣告已於4月1日出街。


拍住影帝敦子一直係老闆秋元康愛將，上年單飛拍電影《如果杜拉》，今年又拍住影帝森山未來拍新戲《苦役列車》，此戲將於7月中暑假黄金檔期推出。


麻友今年亦有單飛演出日劇《欺詐偶像》，講述麻友日間係一名老土教師，夜晚就係當紅偶像嘅故事，聽落好吸引，但開播以嚟，最高收視只得2.7﹪，仆到直。


敦子退隊，松井珠理奈（左）同渡邊麻友（右）被睇好今年將頂上敦子個位，爭做一姐。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄