鍾楚紅、周慧敏及劉心悠三代女神，昨日一起在銅鑼灣出席美容中心開幕活動，紅姑粉絲劉心悠更稱她為神，氣質無人能及。早前去了法國為珠寶品牌影相的紅姑，表示在法國沒有艷遇，坦言現時仍沒有心情去迎接第二春，昨日身穿灰裙的她，似悼念好友張國榮，紅姑指現在仍很掛念哥哥。
鍾楚紅、周慧敏及劉心悠三代女神，昨日以Neo Derm The Center代言人身份到旗艦店主持開幕禮，劉心悠自言是紅姑和周慧敏的粉絲，她說：「紅姑嘅氣質係人類冇㗎，因為佢係神，佢攬住我時我緊張到僵咗。以前住溫哥華時喺酒樓見過周慧敏，當時怕醜，只叫朋友代我攞簽名。」
未敢聽哥哥歌曲
久未露面的紅姑透露早前去了法國拍廣告照，她說：「之前飛了去法國幫一個法國珠寶品牌影相。」問到在浪漫的花都有否艷遇？紅姑即謙虛說：「你哋咁睇得起我，我唔會隨便畀電話同email人，最多係shopping時候先會畀人。」記者笑言多情的法國男士大抵會覺得紅姑只得18歲，她聞言即開心說了句「多謝」。問紅姑是否仍沒心情談戀愛？她直認不諱說：「係呀，冇乜呢啲感覺。」談到劉心悠視為女神，紅姑自言不敢當，也不覺得自己keep得好。前日是張國榮逝世九周年，紅姑昨日穿上灰色裙，似是悼念故友，紅姑說：「我成日都掛住佢，到家都唔可以認真聽佢嘅歌，因為怕會忍唔住喊，同佢有太多回憶，會諗到同佢相處嘅時候，不過都接受咗。」
慧敏泳衣款拍照
周慧敏則透露為美容中心拍廣告時，穿了件類似泳衣的裝束，問她下次會否穿比堅尼？她說：「我唔係走呢啲路線，唔使刻意賣弄性感。」入行以來有否穿過比堅尼？她說：「我真係未試過，細個有買過，但自己畏水，所以都冇着過。」是刻意保持玉女形象？她說：「我比較內歛，平日都唔會着到大紅大紫出街。」採訪：林嘉慈 攝影：陳慧安
單身的鍾楚紅仍未有心情迎接第二春。
劉心悠遇上了兩位心目中的女神，表現得非常緊張。
玉女掌門人周慧敏透露未曾穿過比堅尼。
鍾楚紅、周慧敏及劉心悠三代女神一起出席美容中心開幕活動。
留言列表
