電影由 2008年開始籌備，搞搞吓拖到 2013。咁啱得咁蹺，今年 6月正式係超人面世 75周年，為隆重其事，各地將同時於 6月上映，齊齊為超人慶生。 

來路貨

超人反擊戰

超人，果然不死。
70年代，由已故基斯杜化李夫主演嘅《超人》系列，瘋魔一時。 2006年重新延續神話，點知慘淡收場。
你話我聽，憑咩再拍落去？唔通真係憑自我，硬漢子拼出一生痴？
但如果話你聽，今次《超人：鋼鐵英雄》由導演基斯杜化路蘭親自監製、編劇，又點睇？要記住大導前作包括《蝙蝠俠》三部曲、《潛行凶間》，全部叫好叫座。上周啱啱發布嘅新劇照，更大獲網友讚好。有理由相信，超人應該可以同 Iron Man死過。

好哋哋超人 Superman，點解會拉到去 Iron Man咁遠？
係咁嘅，當今漫畫英雄分開兩大派。大 hit嘅「鐵甲奇俠」、「雷神奇俠」、「美國隊長」、有份喺《復仇者聯盟》出現嘅英雄，以至《 X-Men》、《蜘蛛俠》全部屬於 Marvel。至於對家 DC Comics就慘囉！長期靠《蝙蝠俠》食糊，早兩年開拍《綠燈俠》，口碑普通； 2006年重拍嘅《超人—強戰回歸》更慘被大彈。

飾演新超人嘅，叫 Henry Cavill，佢之前曾為角色減去原有腹肌。家吓做超人，佢要日吸 5千卡路里狂操。呢一身肌肉，得嚟不易。 

《蝙蝠俠》導演基斯杜化路蘭一向鍾意自編自導自監製，係荷里活少數嘅全能型導演。今次佢未有執導，但親身寫劇本，品質肯定有保證。 

超人嘅紅披風、心口 S字喺齊度，唯獨 trademark紅底褲不復見。另一突破，係 Henry Cavill原來係英國人。非美國演員飾演超人，都係第一次咋。

又關李安事？

你係漫畫，我又係漫畫，點解我撈得咁折墮先？眼見 Marvel咁成功，《超人》漫畫作者之一 Grant Morrison膽粗粗向電影公司提出再重拍，仲自我安慰咁話：「情況唔係咁差啫。你咪當《超人—強戰回歸》係李安嘅《變形俠醫》囉！」
佢又講得無錯喎！ 2003年，李安將《變形俠醫》拍到文藝片一樣，全城狂插。 2008年，電影公司加強動作重拍成《新變形俠醫》，粉絲忘記過去照單全收，電影仲大收旺場㖭。

同鄉 General Zod（左圖）早於《超人》、《超人續集》出現過。佢專登由故鄉 Krypton飛到地球追殺超人，同行仲帶埋女助手 Faora（右圖）。 

超人仍係ＢＢ時被送往地球，對自己嘅身世毫不知情。後來遭到同鄉追殺，連累女友 Lois Lane（左）被 Faora所擒。 

超人天賦異能到處幫人，不過美國軍方好人當賊辦。 

超人由零開始

難得今次《超人：鋼鐵英雄》（香港 6月 27日上映）揾到大導演基斯杜化路蘭（ Christopher Nolan）幫手。大導曾將 DC另一漫畫英雄《蝙蝠俠》起死回生，票房、口碑都獲得空前成功。可惜《超人》開拍時，大導正埋首《蝙蝠俠 3》，執導工作惟有交俾《戰狼 300》導演薩克薛達（ Zack Snyder），自己則負責監製及寫劇本。
至於劇情講乜？現階段官方仍然保密。不過從上周發布嘅新劇照嚟睇，故事應該由超人仲係 BB、未移居地球時開始，及後長大成人俾同鄉 General Zod追殺，令佢不得不變身超人保護身邊人。
據知電影暫時未計劃拍續集，但如果反應理想，大有可能拉埋「蝙蝠俠」開拍《正義聯盟》系列電影。一句到尾，英雄不死，英雄電影更加不死！

導演薩克薛達（右）憑《戰狼 300》、《保衞奇俠》成名，作品用色特別兼且以型格掛帥。今次更首次嘗試拍 3D，大家又要俾多幾十蚊買飛啦。 

已故殿堂級影星馬龍白蘭度曾飾演超人爸爸，今次接班人亦極具分量，由影帝羅素高爾主演。 

就連超人養父養母亦星光熠熠，一個係奇雲高士拿（左），一個係戴安蓮（右），係過氣咗少少，不過都叫識吖。 

艾美雅當絲飾演超人女友 Lois Lane。其角色一早知道超人嘅真正身份，後來仲教男友戴眼鏡扮凡人，跟以往 Lois Lane無知婦孺形象不同。 

撰文：娛樂組