So Comment

記得唔好叫錯嘢！　金之藏

唔信，唔信，又去……（乙－）
我都話大坑除咗雪糕、拉麵同西餅，無嘢好食，無間得啦。吓！人就係咁得意，一早都下咗結論，但係朋友話有間串燒店……明明唔信，唉！唔信，唔信，又去……

格局

小店，得四張 4人枱，枱櫈亦簡陋。大家小心揀位，雖則得 4張枱，近門口那張好凍，近廚房兩張好大風，因廚房有個超勁抽氣扇，只要大門開少少都會製造到一道氣流，吹到髻都甩！一度，我叫佢關咗個冷氣，佢哋答話根本無開冷氣，哈哈，咁 4張枱得一張係坐得，仲有，嚴重！杯茶好難飲！

食物

首先，串燒係會燒出好多肥油，佢哋又蠢蠢哋選用黑色嘅碟，咁食物一上枱，都未見食物就先見油。

牛脷$32/串。年輕人可以叫， over 50歲千祈唔好叫，又實又硬，牙都咬崩。
豚腩燒$22/串。必食，又抵又好食，我叫了兩串再 encore兩串；肥的腩 part燒了大部分肥，變得少少似豬油渣咁，好香。

魷魚$28/串。又係要食，我亦 encore了兩串，因為全部都係魷魚鬚呀！燒得剛剛好，好 juicy，剛熟，正！
安格斯牛小排$48/串。叫呢個仲蠢，牛肉又唔靚，燒得又太熟。
煙肉包蠔$38/串。 OK啦，不過如果$38/串，我寧可食多兩串豚腩燒。

燒雞中翼$22/串。雪藏味好重，燒得唔夠撚手，皮又唔夠脆，裏面啲肉又唔夠 juicy，太乾。
雞柳$22/串。雞柳又冇咁勁雪藏味噃，反而又好食過雞翼，不過都係太乾，可能汁燒好啲。

雞皮（收了$44，單就話兩個 order，但有 4串，咁唔知係$22/兩串，定佢收少兩串$???）
算好食，食得出心機，不過遠遠不及佢對面的「五谷」燒雞皮燒到好似一片薯片咁，好脆，好味，而且一定係新鮮雞！

和牛粒$128。牛都係唔夠靚，味道唔錯，但因為係和牛，所以冇乜牛味。但旁邊的蒜粒（好細粒，好心斜切大片啲啦）一定係「半煎炸」定，因為腍晒！唉，咁嘅天氣點可以炸定啲嘢呢？牛肉粒底有一塊厚洋葱，呢碟嘢上枱時，同時來了刀叉，但得一份刀叉，我哋 4個人，朋友問刀叉要嚟食乜？侍應話切洋葱，我朋友開始切，切到一鑊泡，我特地影低把殺人都唔死嘅刀畀大家睇。咁我當然又八卦咁話，下次可唔可以叫廚房打十字切埋塊洋葱，侍應答：「咁放唔到啲牛肉喺面吖嘛……」請問有乜分別，我又唔係要將啲洋葱剁碎，嘥氣！