Mandy同老友大吐苦水,在好友面前可以做回自己,說話有幾粗就幾粗,真我本性盡現!

無綫真人騷《盛女愛作戰》出街後,收視愈插愈爆;無綫、商台頻頻借題做節目,乘機「抽水」,可惜一眾「盛女」有名冇利,當中被網友狂插奄尖的Florence更加潛水失踪,甚至失去教院高職成為雙失盛女;被形容為「四正」的Suki,雖然終於找到Love,但男友被踢爆係溝女王;至於鏡頭前談吐高雅的Mandy,亦因飽受「成名」壓力,鏡頭後原形畢露,滿口流利粗口,向朋友踢爆《盛女》做媒扮作戰,指責無綫及始作俑者陳志雲:「好×嬲無綫,陳志雲仲×無聊!」

爆粗勁剷
被網民視為拜金女、拍攝中段離場唔玩的Mandy,正職在唐英年家族旗下、半島集團的半島針織打工,屬於採購部的管理高層,在長沙灣的半島大廈返工。本刊於週一(十六日)在Mandy上班的地方等候,一身白色連身短裙的她打扮青春,惹來街上途人的注目。
晚上七點,Mandy離開公司,落樓會合等她放工的同性朋友,再坐的士到紅磡都會商場搵地方醫肚。
選擇吃泰國菜Spice 8的Mandy,與友人坐低後,毫不忌諱擘大喉嚨夾雜粗口,高談闊論《盛女愛作戰》為她帶來的不便,以下是她與友人的真實對話。
M:Mandy
F:Mandy朋友
M:好×嬲,無綫周圍放料,啲公關又扮晒嘢話唔係佢哋放嘅,陳志雲仲×無聊,安排我哋做《光明頂》訪問,做完之後又要我哋去佢間房,提醒我哋話小心啲狗仔,唔好亂講嘢,轉個頭又要我哋俾三十幾部相機影!嘩,我咁大個女都未試過俾咁多部相機對住,呢邊呢邊左至右咁影,哈哈哈!(Mandy講粗口極流利,臉部表情豐富,講到俾記者圍時更愈講愈興奮!)

 
F:算啦!過埋呢個禮拜個節目播完就冇事啦,之後都冇人會記得。
M:唉,我都好×無奈,個friend(《盛女愛作戰》節目編導岑應)拍呢個節目時叫我幫吓手,都冇諗過會咁爆,搞到我去邊都覺得有狗仔隊跟住晒,一早唔玩都有手尾跟。(終於承認有份做媒,據知她跟岑應相識十幾年,是唯一的參加者可隱瞞真實年齡!)
F:而家個節目咁hit,佢有着數啦!
M:十幾年前識佢,佢得五千五蚊人工,打佢每年加一千,有幾高呀?無綫啲節目係咁㗎啦,求×其講吓湯講吓水都可以收到嘅,你估曾志偉嗰啲節目好好睇呀?咪又係因為佢識挖苦人,啲人先會鍾意睇,×!(打扮斯斯文文,但邊講邊雞,手指撩牙,毫無儀態可言。)
M:最乞人憎嘅係Winnie囉,無綫都唔妥佢㗎,成日私底下接受訪問又唔同無綫講,喺度搏出位,Santino好好,佢做乜都會同無綫交代!我覺得最靚嗰個係Bonnie,Suki本來睇中第二個,不過人哋唔騷佢,淨係同佢flirt(溝)吓,之後都冇下文啦,Zion個衰仔我唔覺佢係認真囉,唔知佢哋會點!講真吖,啲記者話我哋邊個唔妥邊個,都係作出嚟之嘛,佢哋同無綫想個noise大啲之嘛,咁寫好睇咩,有人信咩?
F:最近成日都返屋企,好悶呀!你有冇仔介紹呀?


M:×,冇啦,連Celvin(餐廳老闆)都嬲×咗我呀!都黐線嘅,我之前做咗個訪問,訪問出咗街之後佢就send message俾我,問我點解擺佢上枱,搞到佢收到好多朋友電話,×,其實有啲乜嘢問題?我覺得佢咁嬲,都係一個原因,就係我咁樣講完後,佢擔心冇女會埋佢身絕佢條路!咁唔講都講咗啦,想點啫!
M:有冇睇《明周》?我覺得佢哋好好,應承俾番相我,真係好快send俾我,之前做《蘋果》訪問,話十點走得,點知拖吓拖吓遲勁耐,最×衰係出嚟又改咗啲嘢,而家間間都想搵我做(訪問),我都費事睬佢哋,好×煩。

冇仔約
Mandy八點半同個朋友食完飯去朋友紅磡的半島豪庭住所繼續吹水,想搵個男人約都無。本週二(十七日)早上十時,本刊在Mandy上班的地方找她回應有關失金龜鬧無綫及做媒的言論,Mandy見記者拍照,便低頭遮面極速跑入大廈的大堂㩒,對提問不作回應,只笑着拋下一句:「我唔會答嘢㗎喇,我只係想過返啲正常人生活!」《盛女》播出後,食盡效應,無綫連開三集《盛女駕到》特輯,陳志雲亦不停安排「盛女」上商台節目,實行抽水抽到盡,幫自己造勢,難怪被Mandy鬧爆。

盛女最惡搞
人生教練Winnie一出場,其整容樣及一套理論即惹網民公憤,有網友將她的尊容與盲人鬥士龍懷騫拼埋一齊,十足Twins一樣!

抽水人生教練
《盛女》全城鬧爆,一眾被網友質疑的人生教練,食正風潮,繼續抽水大行動;電台、電視台邀約不斷,幾乎逢請必到,逢到必早,廣收宣傳之效。

摩登媒人 Mei Ling
在節目中負責向盛女介紹筍盤的Mei Ling,無論介紹飛機師、酒店老闆等筍盤,通通冇下文;據知這位摩登媒人是行業權威,筍盤來自世界各地,不過入場費最少六萬,而且必須大學畢業。

「45度角」 Santino
愛情顧問Santino郭政彤曾聲稱同時擁有五名女友;之後又表示有一個拍拖九年的女友,前後矛盾。他辯稱劈腿五女,是跟現任女友分開時發生;自「45度角」理論被插後,Santino幾度重申遭斷章取義:「並非45度角望人,而是45度角側身對人。」開設戀愛學院的他,近日已暫停所有課程;但據知,打算食正《盛女》人氣,密謀在網台開咪做節目,宣傳他的戀愛學堂。

發聲教練 Eva
開班教授企業高層說話技巧的Eva Lau,雖然由她負責的部分尚未播出,但其公司網頁已加入《盛女》內容,盡收宣傳之效。據知,在節目中Eva主力教授Florence和Bonnie說話技巧,Eva更特別開口為Florence平反:「佢係一個知書識禮嘅女仔,拍攝時永不遲到,而且好合作。佢只係真心講出好多女仔內心諗法,依家外界評語,對佢好唔公平。」

盛女下場 Florence 教院工無埋
半年作戰,另一慘敗收場的,是當中年紀最大、三十九歲的會計師Florence。屬港女「三高」的她,學歷高、收入高、要求高,但衰在與五十歲大學講師CK配對時,以厭惡嘴臉嫌人老,結果被網民圍插變「極品盛女」下場。三高變三低,評價低、自信低、收穫低,壓力爆煲下,Florence不單在節目出街後要潛水避世,最慘連月入五萬的高薪厚職都保唔住。在教育學院任職會計的她,有指上週被公司停職。無仔吼、無工返,變雙失盛女。「《盛女》出街後反應好大,形象又變得負面,教院詐晒型,即時要佢停薪留職,點知之後連份工都無埋。其實拍緊《盛女》時,佢都估到出街後自己會成為焦點,所以計劃定歐遊避世,只係無預到無咗份工。」知情者爆料。記者日前到她任職的教育學院財務部查問,其中一名男職員起初未知記者身份故口快答:「Florence無做啦!」但再追問後職員即刻封口:「我哋唔會答任何嘢,你走啦!」

勝女Bonnie 食住上
隨住一個個盛女縮沙拒露面宣傳,獨力孭飛的Bonnie於本週一(十六日)在無綫搞的祝捷會上賺盡風頭。縱然被批評為「唔開聲似中環,一開聲似旺角。」但性格開朗的Bonnie形象入屋,贏盡民心,自爆誤做兩次小三,更令外界對她加添幾分憐愛。作戰策略大成功之後獲電台聽眾高投票支持。據知無綫已鎖定甜美的Suki及口才好反應快的Bonnie,打算收攬她們為旗下藝人,陳志雲亦有意安排Bonnie做商台DJ。自知有機成名,Bonnie在節目出街後已辭掉刻板的文職工作等入行發圍,一方面孖住在節目中認識的導師Pierce,在網上「民間電台」主持屬於自己的節目,同時自費跟另一人生導師Eva補課學談吐對應,為入娛圈做好準備。賺到笑的Bonnie,對於殺入娛圈發展的傳聞,不置可否說。「若果有機會,我當然有興趣喺呢行發展,不過依家仲係言之尚早。」

賺變蝕 Suki揀錯食家
廿八歲嬌滴滴的Suki,拍《盛女》中途已經搵到伴,成為最快跑出的一個。與Mandy好友Zion拍拖半年。可憐的Suki以為執到金,但原來是Mandy將她送羊入狼口。身高六呎二,任職保險的Zion是玩家一名,夜蒲buddy Mandy更是他的打獵助理,負責供應筍女給Zion。與Suki拍拖,摸pat、啜爆亦只是Zion一場纏綿遊戲,並為「完鬆」鋪定後路,公開講無諗過要結婚。睇怕瘟錯仔的Suki蝕到入肉。

賺到崩牙 Gobby
至於有個九歲女、現年三十歲的失婚Gobby,因拍攝期間得贊助整牙套,一個仙都唔使出就將棚「發黃爆牙」矯形,對時薪只有四十元的麥當勞快餐店經理Gobby而言,幾萬元的牙醫費一個仙都唔使出,就算感情未有着落都賺到笑。

隱形剩女 Vera
以為只有五位盛女參與拍攝,其實六位先至真。這位隱形盛女是Florence帶埋嚟一齊參加的好友Vera。她報稱三十多歲,任職文員,重達一百四十磅,是芸芸盛女中最肥的一個。但付出時間心血拍攝,最後被岑應嫌「性格唔夠鮮明」,被判隱形。她與Florence齊齊去dating party識男仔,孖住去修身堂減肥,參與的所有場口,節目出街後卻變成路人甲,其剖白鏡頭統統被刪,是節目中名副其實的「剩女」。記者致電Vera,她承認是被「遺棄」的一個。「係我講嘢唔夠激,唔合佢哋要求!所以之後岑應打俾我,問介唔介意剪走我嗰部分,我真係飯應。今日街外反應咁激,我更加慶幸自己被刪走。」 ####

 
吮骨
本來用叉食雞的Mandy,咬咬吓放低支叉,邊扯雞邊爆粗,似足食人族!

 
Call仔
激嬲金龜Calvin,Mandy嘗試以短訊補鑊,更妙想天開希望Calvin即晚出現,可惜食檸檬收場!

 
嘩!用粗口鬧我?(設計對白)

 
四月初《盛女》未出街,無預料外界反應咁激的Florence未潛水,仍肯出席宣傳活動,但隨着網民對她們批評,盛女紛紛縮沙唔再公開露面。

 
在Mandy與友人的真實對話中,她鬧爆陳志雲的一幕就是《光明頂》節目訪問的安排。

 
在本週二早上,Mandy乘的士上班,面對本刊的提問,她一概不回應,只笑着表示想過正常生活,態度友善,沒有爆粗。

 
Mandy接受其他傳媒訪問時曾透露她與餐廳老闆私下有交往,因而激嬲了Calvin。





 




雖被網民喪插,但本週經過改造,在修身堂減咗十幾磅的Florence成個靚晒,唔知能否谷底反彈,贏番民心。


上週嫌棄大學講師CK太老的她,之後遇上她心儀的落選港男「大圍吳彥祖」,但對方只博出位,事後還狠批她,真係風水輪流轉。




在fb首頁以性開放介紹自己的Bonnie,甚有異性緣,在fb便發現她於美國攬住半裸老外。


拍《盛女》前後當過小三的Bonnie,曾留一把有女人味的長髮。直至失戀,與拍拖五年的男友分手才剪掉。


本週一(十六日)Bonnie出席祝捷會,她甫到場就自動波脫去外套,以性感打扮供拍照,是芸芸中最啱食呢行飯的盛女。


Suki與Mandy好友Zion拍拖半年,上週在九龍城茶餐廳醫肚時便忍唔住狂啜,近日二人更飛去台灣旅行。但Zion被踢爆係玩家,睇嚟做定心理準備再受情傷。




《盛女》反應過熱,不慣成為傳媒追蹤焦點的Gobby,上周錄影特備節目《盛女駕到》時,以黑面抗相機,還找編導岑應做擋駕。


為得免費矯齒, Gobby甘願在節目中,當住百萬觀眾𠲖起棚牙整牙套。


第六位盛女Vera(右),因表現不合編導岑應心意,花時間參與拍攝,但最後其故事被刪走,只淪為過鏡盛女。

文章標籤

創作者介紹
創作者 litalife 的頭像
litalife

818 娛樂八掛大放送★

litalife 發表在 痞客邦 留言(0) 人氣()