13年賣夫人妻阿部貞夫（前）在《不道德的夫妻》飾演松隆子老公，被松隆子指使他騙婚求財，不過他鵪鶉底，要松隆子呵番壯膽。
亞熱帶
辣手人妻 松隆子
松隆子出道時接連在《悠長假期》及《戀愛世紀》飾演乖乖女，玉女形象深入民心。不過，原來反轉玉女是潑婦，真實的松隆子自高中開始已經是煙民，去年她在東京街頭邊行邊食煙，因犯當地法律被派告票，松隆子即時發火：「乜邊行街邊食煙犯法咩？我都冇掉過煙灰落地！」之後松隆子仲搵銀包掟警察，好在朋友做和事老至冇搞大件事！
其實初犯者都只是罰 1000日元（約港幣 80元），何苦搞到自己潑婦上身呢？所以，松隆子的玉女形象，絕對要用演技去維持，難怪她四次奪得日本奧斯卡影后啦！
09年湊仔賢母在電影《櫻之桃與蒲公英》，松隆子已經做過人妻，佢連老公有外遇、周身債都死忍，令唔少日本 C9喊足全場。 
02年谷胸蕩女 
02年，松隆子一洗玉女形象，演出舞台劇時任由男演員摸胸，更不惜谷胸上陣扮蕩女。
趕生仔箍老公
情路上，今年 36歲的松隆子一直有鋪戀父癖，過氣男友真田廣之同野口強都是「叔父輩」，兩個都年過半百，松隆子的演員父親松本幸四郎自然唔 like。他睇中棒球明星松井秀喜，曾多次製造機會俾松井，可惜叛逆孻女松隆子唔 buy，最後她在 07年下嫁比自己大 16年的音樂才子佐橋佳幸。松隆子為嫁人，同老竇冷戰三個月，最終老竇屈服，不但公開祝福女兒婚姻，更自爆同女婿 friend到傾通宵，做戲咁做，估唔到「孻女拉心肝」竟然出現於男尊女卑的日本。
一物治一物，孻女治嚴父，才子治潑婦。松隆子不停拍劇，佐橋大把機會燈紅酒綠，松隆子都呻過夫妻少見面：「我同老公一齊嘅時間好少，兩人見面冇乜兩句，有時都覺得幾唔了解對方。」眼見夫婦感情轉淡，松隆子近日宣布準備生 B，據悉她已戒煙，並開始飲五青汁和巴西草莓汁調整身體。佐橋已經五十有一，松隆子亦屬高齡產婦，再拖多幾年隨時有心無力，希望她趕得切生番個蛇仔啦。
松隆子的父親松本幸四郎（左）及兄姊都是演員，最近連 5歲姪女都入埋行。至於老公佐橋佳幸（右）亦係著名結他手，松隆子成家人都係演藝人才。 
沉淪夫婦
因為老公阿部貞夫一次不忠，令松隆子索性叫老公騙婚呃錢。偏偏佢對老公又唔放心，兩公婆不時打打鬧鬧。 
為咗錢，阿部貞夫都啃咗唔少豬扒，過氣美少女田中麗奈（左）飾演的出版社 OL，已經是最睇得的一個。 
拍過《下妻物語》嘅阿部貞夫係老戲骨。戲中佢為了錢乜都肯制，連女舉重選手（前）都照服侍，認真考演技。
01年最佳拍檔松隆子和木村在《律政英雄》飾演歡喜寃家，錄得平均收視 34.2%，收視更勝《戀愛世紀》，而兩人亦被喻為黃金拍檔。 
08年賣口乖在電影《 K-20怪人二十面相傳》，金城武係俠盜，松隆子大讚金城武背脊溫暖夠晒 man，大賣口乖。 
10年復仇教師話題電影《告白》中，松隆子的女兒被殺，她知道殺人犯是她班上學生，於是設局找出真兇。
撰文：阮英維
留言列表
