無綫真人騷《盛女愛作戰》自上周一（九日）首播以來，不論是顧問團隊，或是節目中五位渴望戀愛的女主角，均掀起全城熱話，被先後狂踩「唔夠班」、「港女」、「做媒」等等等！

不過，觀眾愈鬧愈要睇，帶挈「盛女」人氣急升。本刊連日貼身追蹤「盛女」現況，直擊其真面目及真生活。當中二十九歲的Bonnie更接受本刊獨家專訪，期間一度因壓力爆煲，當場失控痛哭，「男仔頭」都有柔弱的一面。

性格男仔頭的Bonnie談及節目出街後，不但成為追訪目標，更遭惡意抨擊，幸獲好友們出言力撐，感動落淚。而Bonnie還透露於節目中認識的西餐廳廚師（下圖），她坦言最想跟他發展。

女版錢嘉樂

二十九歲的Bonnie，去年與拍拖五年的男朋友分手後，自薦參加無綫的首個真人騷《盛女愛作戰》，節目於去年十一月尾拍畢，她卻於播映前先識得驚，「突然間情緒好低落，好擔心個節目唔知拍成點，會唔會醜化咗我呢？我又唔敢搵人傾偈，成日匿埋喺屋企。」隨着節目播映後，Bonnie得到顧問及其他「盛女」開解後，心情剛剛平復過來，卻又遇上網民的批評，並指她是「女版錢嘉樂」，為此她笑着回應：「我覺得冇所謂，話我似佢（錢嘉樂），係我配唔起佢就真；咁都有人話我似其他明星，好似楊丞琳、陳慧琳、李綺雯嘅。」

Pierce（左）是《盛女愛作戰》中「男女攻略專家」Santino的助手，他與Bonnie認識後極速成為好友，一起接受本刊訪問之餘，更孖住主持民間電台的《盛女再作戰》節目（小圖）。

數月前，Bonnie辭掉文員工作，縱使《盛女》節目沒有成功為她找到理想對象，卻為她帶來一個工作機會，就是在網上電台主持十三集的《盛女再作戰》節目，更因傳媒的不斷追訪、網民的惡意攻擊，令她感受到朋友真摯的支持，「其實初初參加呢個節目，都諗唔到出到嚟個迴響咁大，我哋又唔係明星，唔習慣畀傳媒跟蹤，依家落街買樽豉油都要化妝喇！仲有，最近有人喺博客度惡意攻擊我，朋友見到話番畀我知；我入到去睇，見到好多朋友留言幫我講好多說話平反，嗰刻我覺得好感動！估唔到我呢個成日有嗰句講嗰句，得罪人多嘅人都會有咁多朋友支持；連同我一齊住嘅姨媽，睇到個節目之後都竟然同我講：『間屋得我哋兩個，我哋要好好相處』，呢啲嘢係我參加呢個節目嘅意外收穫。」說時聲音抖震，眼淚直流。

最近廣受傳媒追訪致病倒的Bonnie，接受本刊訪問時聲音沙啞，更因為不敢落街睇醫生，而需暫時靠吃成藥治病。另外，有指她是「好戲量」劇團成員，所以演技好，但Bonnie強調只有朋友是該劇團的成員而已。

會帶眼識人

Bonnie直言，參加這個節目最想讓自己變得更可愛；有五次拍拖經驗的她，又自爆兩度誤做第三者，「其實過咗去嘅事，我唔想好detail咁講番出嚟，咁對人哋都唔好，我只可以講，一個拍咗差唔多一年，一個拍咗幾個月。我同呢兩個人一齊嗰陣，唔知佢哋有老婆。雖然我有時都會覺得好怪，點解佢成日要趕住返屋企，但佢講，我咪選擇相信囉！兩次都係個太太打嚟搵我，我先知，我係個反應較慢嘅人，嗰刻淨係呆咗，唔識反應，唔識喊。」

Bonnie強調，以後會帶眼識人，了解清楚對方的家庭背景才交往。不過，她卻對節目中認識、任職西餐廳廚師的男士甚有好感，「依家我哋都有聯絡，疏啲啦！」

Bonnie被網民狠批為「女版錢嘉樂」，但她沒有嬲怒，反而打趣說：「話我似佢，係我配唔起佢。」