當年拍李添勝劇集冧廠捱鬧,成為他離開無綫的導火線。他更踩李的愛將黎耀祥演戲只懂扭曲面容。

翻舊賬

在二十年前經典劇集《大時代》飾演丁孝蟹一角,曾被公司力捧為「銀河十星」的無綫舊將邵仲衡,淡出幕前後經營車房和內地賽車中介人生意多年,早前突然戲癮發,復出接拍港台劇集,並主動接觸CTI魔童王維基,意圖重返娛樂圈。
四十八的中佬邵仲衡接受本刊訪問時,狂踩無綫亞視,指當年被李添勝逼走,又彈視帝黎耀祥、影帝吳鎮宇及過氣情敵劉青雲無演技,做戲一味靠面容扭曲,連台灣導演九把刀和杜琪峯都唔放過,照噴!一肚怨氣!

 

搞方程式賽事
九四年退出娛樂圈後,邵仲衡經營四驅車房搵落一筆,之後返東莞成立IS Sports Marketing公司,以中介角色搞內地方程式賽事,大客包括Audi及保時捷。今年初,香港電台敲門搵他復出,與翁虹演出《沒有牆的世界》第三輯,戲癮一觸即發,邵仲衡決定將東莞生意交給拍檔處理,自己留守香港,兼顧拍戲。人到中年,脹爆了的他在住了多年的黃金海岸寓所Club House接受訪問,大肆翻舊賬。

李添勝照肺
「當時我喺無綫爆三百個騷,收二六開二八,日日無得瞓,拍咗好多外埠錄影帶,有日真係頂唔順冧咗廠,下午就俾監製捉入房鬧,我解釋嗰朝自己眼前發黑,好辛苦,就算返咗嚟都講唔到對白,拍唔到;點知監製居然話:『拍到你塊面就得,乜都唔使做,我哋只係要你個樣。』呢個人係李添勝,金牌監製喎!再做落去無意思,其實我當時已經開咗車房,索性唔做幕前。」邵仲衡說。離開無綫多年,也曾為亞視及港台演出劇集,邵仲衡對現今影視圈,自有見解。「好似佢(李添勝)愛將柴九(黎耀祥)做戲扭曲面形,我唔覺得係演技,仲有劉青雲同吳鎮宇都係一樣,死仔到而家都係拍戲,無人生閱歷。青雲好彩黐住阿杜(杜琪峯),阿杜係好,不過佢來來去去都係抄北野武,啲人咁鍾意,係因為無人抄北野武啫!仲有九把刀套《那些年》,悶到我分開三次先睇晒,有咩咁特別,露雲娜以前套《少年十五二十時》拍過晒啦。」

專吼港姐
視帝影帝票房導演金牌監製完全不放在眼內的邵仲衡,四圍放火之餘亦不忘自爆風流事,暗示曾經同邱淑貞、郭藹明拍過拖。「八七年我個女朋友參加港姐,佢話我好正叫我參加『超級新星』,唔怕講啦,佢都結婚生仔無做,當年個女朋友因為下巴有問題退選。」當年廿三歲的邵仲衡,曾跟I.T老闆娘邱淑貞拍拖,亦曾雙雙被無綫力捧。對於○○年亞視開拍《大時代》續集無預他,邵仲衡冷笑說:「青雲唔會俾!有次拍劇,我同個女演員拍緊拖,點知係咁俾另一個男主角句句窒住晒,後來我女朋友話個男仔日日喺佢屋企樓下等,追緊佢。」原來俾劉青雲撬牆腳,唔忿氣!望見五張邵仲衡想全面復出,唔該學吓黃秋生,火可以唔收,但身形唔可以。

與車有緣
48歲的邵仲衡,87年參加無綫「超級新星」入行,被捧為「銀河十星」,92年在劇集《大地飛鷹》中首次擔正做男主角,亦拍過《大時代》、《大賭場》、《白髮魔女傳》等多部劇集。讀過室內設計的他,曾跟室內設計師高文安做設計及裝修。  94年,邵仲衡跟李添勝鬧不和離開無綫,與當時的女朋友劉美娟搞四驅車房,二人拍拖十年,最終分手收場。跟現任圈外老婆Wendy 01年結婚,育有兩子,分別10歲及8歲。近年,邵仲衡轉搞方程式賽車中介公司,負責籌辦、搵贊助及市場策劃等。愛車族的他,高峰期有九架車,現持有波子Boxster、Audi A5及Smart等五部車,母親及家人移居英國,大仔也在當地讀書,邵仲衡想復出,純粹過癮。 ####


(《蘋果日報》圖片)


九二年的經典劇《大時代》,邵仲衡飾演丁蟹(秋官)大仔,與李麗珍有多場嘴戲。


離開無綫後,邵主力打理四驅車行,經常以專家口吻評論汽車零件及構造。


在剛舉行的金像獎頒獎禮敗北而回的劉青雲,出名好戲,但邵並不認同,更暗示當年曾涉三角戀。


邵仲衡接受訪問時,握實雙拳做出面容扭曲誇張表情,並表示自己較喜歡自然平淡的演戲方法。


邵仲衡為港台《沒有牆的世界》第三輯演出,劇中老婆翁虹患有脊髓小腦萎縮症,步向死亡,扮中港司機的他曾開車行,演爛笪笪司機駕輕就熟。


與郭富城等加入八七年無綫藝員訓練班,同時被捧為「銀河十星」,他笑言城城當年「戇居居」。


四十八歲的邵仲衡愛擺chok甫士,肥了一個碼的他拍照時經常縮肚昂面遷就角度。


邵仲衡自爆未入行前與邱淑貞拍過拖,後來前女友提名他參加無綫「超級新星」比賽入行。


「超級新星」比賽,一同入圍的有林文龍等。(《忽然1周》圖片)

脹爆邵仲衡復出拍劇

arrow
arrow
    全站熱搜

    stacylife 發表在 痞客邦 留言(0) 人氣()