忍痛攞獎雖然首奪影后,不過千嬅在頒獎禮及慶功宴上,不時閃過痛苦神情。痛住都要攞獎!(設計對白) 

滾熱辣 楊千嬅 

攞影后前入院 4天 千嬅割子宮 20粒纖維瘤

楊千嬅上周六( 13日)憑電影《春嬌與志明》首奪金像獎影后,打敗由歌壇鬥到影壇的宿敵鄭秀文。不過上台時她連老公丁子高及拍檔余文樂都唔記得講多謝,頒獎禮慶功宴又罕有滴酒不沾,與平日豪情判若兩人。
千嬅連酒都戒,原來是因為剛做完手術,攞獎當晚傷口隱隱作痛。本月 3日至 6日,她秘入養和割纖維瘤,雖然事後她強調只是小手術,但據知其實千嬅選擇在金像獎前急割子宮瘤,全因纖維瘤的數目達廿粒,加起來體積比拳頭大,而且位置近輸卵管,唔割會影響生育。所以她才急做手術,以免影響年尾懷孕大計。

 

楊千嬅是今年影后大熱人選,而她偏偏選擇在金像獎典禮一星期前入院做手術,皆因纖維瘤唔割唔得,早前她曾漏口風:「手術後都唔肯定可唔可以出席(金像獎),都要睇狀態。」
急於做手術,原來千嬅子宮的纖維瘤多至廿粒,影響懷孕。「千嬅有咗 Torres時,已經 check到有纖維瘤,不過當時佗緊 B,醫生建議佢生完至算,但期間千嬅試過因此而作小產,加上啲纖維瘤愈生愈多,仲生到近輸卵管,甚至影響懷孕。丁生(丁子高)同千嬅都想年尾前再成功造人,所以決定入院割晒啲瘤。好彩千嬅復原得快,加上老闆林建岳頒獎禮前已收到風佢攞硬影后,千嬅就算忍痛都要出席啦。」知情者說。


寃家路窄!(設計對白) 

於慶功宴上千嬅同丁子高咀嘴合照晒 sweet,對於千嬅獲獎無喺台上多謝老公,恨生多個嘅丁子高就講要罰千嬅年尾生多個! 

跟千嬅鬥足 17年嘅 Sammi,今次俾千嬅擊敗,最慘係連電影主題曲獎項都失落,難怪佢缺席慶功宴,好在於微博上見到她正能量好足夠,可喜可賀。 

早前千嬅常到內地幫《夢想合唱團》宣傳,成日周圍飛,所以知道自己有事都安排唔到時間去纖體。 

丁子高出口術

手術後,千嬅乖乖足不出戶休養足足一星期,飲食也特別小心。上周五金像獎前夕( 12日),才見她出動,到中環 IFC的 city'super買有機菜及到尖沙嘴海港城買 BB衫和玩具車。「千嬅近年為佗 B,定時去睇中醫調理身體。丁生下令佢戒口,千嬅都好聽話,慶功宴都冇飲過酒。」
不過,千嬅今年已經有《香港仔》及《單身男女 2》兩片在手,年尾又可能開拍《春嬌與志明一家》,隨時阻慢丁子高想同千嬅年尾造人的大計,難怪丁子高在金像獎慶功時頻出口術,講到明要罰老婆今年生仔。


輕撫止痛千嬅成為出爐影后,老闆為她安排慶功宴慶祝,但千嬅面露疲態,加上手術傷口仲有啲痛,不時用手按摩傷口。 

早知賽果慶功當晚老闆林建岳同千嬅密密傾。千嬅近年成票房靈藥,岳少仲一早預備定 Winner's蛋糕,似乎一早預咗千嬅攞影后。 

在《春嬌與志明》中,千嬅「港女」形象深入民心,依家仲要攞埋影后,彭浩翔導演即有意搵周潤發同鍾楚紅拍第三集,做志明父母。 

近日千嬅不時自煮健康食物俾自己同仔仔 Torres食,甘於做一個好媽媽。千嬅成為出爐影后,還上載了一張抱着仔仔的食飯相片。相中可見 Torres精靈活潑坐唔定。難怪千嬅要放棄「楊小姐」身份,樂做丁媽媽。 

兩派 fans罵戰

今屆鄭秀文同楊千嬅都係金像獎影后大熱,兩人固然恨獎,就連兩派 fans都唔妥到出面,近日不停在網上發功撐偶像。


挺楊派 

挺鄭派 

認千嬅戒口

丁子高亦承認老婆戒口,但問到千嬅忍痛攞獎,就輕輕帶過:「千嬅慶功宴上都有飲酒,不過只准佢飲一啖。佢依家都冇飲凍嘢,我哋一齊戒。(佢工作咁忙,半年後點造人呀?)佢係好忙,男仔(指自己)時間上就 flexible啲。(做微創手術都要住四日醫院,好似好嚴重喎?)簡單手術啫,係我兩公婆緊張至住耐啲。(慶功宴見到佢摸住個肚,似乎傷口仲痛!)佢冇嘢㗎啦,都唔痛。」
剛做完手術的千嬅,要待 3個多月才能再開始造人計劃,但為了未出世的 BB,她已預先留用 Torres的陪月員。「千嬅好鍾意呢個陪月,佢湊得 Torres好好,而且又識煮嘢俾千嬅食,連減肥餐都識整。千嬅知道自己忙,好難照顧 Torres,所以叫陪月唔好接其他工作,專心幫佢湊 Torres之餘,嚟緊仲可以湊埋新 B。」


手術後殘爆上周五( 12日)下午,出院差不多一周的千嬅同陪月員帶 Torres到尖沙嘴海港城行街。當日所見,千嬅眼腫面腫,面色頗蒼白,而她身旁推住 BB車的中年女人,就是其陪月員。 

千嬅先到「 Petit Batean」睇 BB衫,她逐件慢慢睇,不過睇咗一輪都揀唔啱。 

之後千嬅去咗玩具反斗城,睇咗一陣佢就買咗三條 BB圍巾,臨走前再買多架學行車,價錢$1,599元。



其實當日( 12日)早上,千嬅一早已經素顏到 ifc超市買咗兩大袋有機蔬菜及雞蛋,可見手術後她食得幾清淡。《蘋果日報》圖片

纖維瘤切除後會重生

子宮平滑肌瘤(俗稱纖維瘤)是女性常見婦科疾病, 35歲以上的婦女,大部分都生過纖維瘤,半數以上是冇病徵,一般不需要做手術。不過,好像楊千嬅的情況,數量太多面積太大,又接近輸卵管,會引致不育,就需要做手術切除。
婦科醫生郭志偉亦表示︰「廿幾粒纖維瘤數量算多,不過都要睇 size同生嘅位置,近輸卵管就有機會影響生育,有啲病人為求安心,會用微創手術切咗佢,一般微創手術可即日出院,若病人特別要求,才會住院四日。而割咗纖維瘤嘅位置,之後都隨時有機會復發,直至停經為止,所以女性最好每年都做婦科檢查,以防變異。做完手術後,子宮嘅傷口一般要休息最少 3個月至可以再懷孕。」


撰文:娛樂組
攝影:攝影組

arrow
arrow
    全站熱搜

    tvb4life 發表在 痞客邦 留言(0) 人氣()