金價急跌，大批散戶湧往上環老字號金鋪利昌「掃金」，除了打工仔和自由行，有穿着清潔制服的師奶亦走來排隊買金。 

大錢題

全城搶金

上週五，金價突然暴跌，洗倉情況持續至本週一，兩日累跌超過一成。原因眾說紛紜，有指導火線是塞浦路斯賣金救國，或歸咎於中國經濟增長放緩，國際大行更落力「唱淡」。不過，你有你踩，不少等金價跌等到頸都長的市民及自由行，紛紛湧至金行搶金，形成「上冷下熱」的現象。有人興奮「撈底」，亦有人因此跌碎眼鏡標冷汗，有專家估計金價短期仍「無運行」，未來再波動更可能波及相關衍生工具，牽連甚廣。

中午時分，上環利昌金鋪已人頭湧湧，記者排足二十分鐘，才能埋到櫃位。當時職員枱頭的報價機不斷跳，每兩金報一萬二千九百四十港元。記者深思不到一個小時後埋枱，已跳到一萬三千零七十元，且只剩下最後一粒金粒，記者立時付款。
職員趙先生指，這兩天做到「無停手」﹕「九點忙到依家（下午三點），飯都未食呀！」他指來買金的什麼人都有，香港、內地、菲律賓、尼泊爾，「個個幾十萬咁買，最多嗰個買成百萬！」排緊隊的張小姐指苦等金價回落已久，今日特意將外婆留下的金鏈拿來換足金﹕「呢兩年來今日最平啦，以前嘅金唔足色，趁平快啲換番足金。你係買就快啲啦，我有錢都買呀！」財經記者羅先生亦趁着午飯時間，跑過來買金﹕「趁平咪溝啲貨，買住二、三兩先，再跌再買。」
市民瘋搶下，利昌職員於下午三點宣布存貨已售完，但十多名市民仍然不肯離開，不斷追問﹕「幾時有金呀？」「等到有先走！」更有人急急打電話問親友：「邊度仲有金？利昌一粒都無啦！」

本週二，金價略為回升。下午兩點，每兩售一萬二千九百四十港元，不到一小時已升了一百元，仍被搶購一空。 

印度和中國都是傳統黃金消費大國。印度人 Datta Phuge便斥資近二百萬港元「打造」一件黃金恤衫，重三點三公斤，更指穿上身時感覺「良好」。（法新社圖片） 

未跌完勿心急

央行放水黃金「發水」 

難怪市民瘋狂，事關自○九年美國推出首輪量寬政策（ QE1），大印銀紙後，金價於短短三年間，由每盎司八百美元一度爆升一倍幾至一一年的一千九百美元高位。過去一年雖有調整，但這次跌幅，卻是三十三年來最大，連金銀業貿易場理事長張德熙亦驚嘆：「突然跌得咁急，今次真係跌晒眼鏡﹗睇個勢，短期有機會見千三美元。」
大行唱淡，加上大鱷索羅斯大幅減持黃金 ETF倉位，金價已有沽壓，再加上不少基金乘機「換馬」，觸發是次急跌。敦沛金融高級副總裁周燕珊解釋：「今年第一季黃金無乜點升，反而美股、日股表現仲好。剛好第一季季結，好多基金經理計劃緊轉倉，咪借塞浦路斯個藉口拆倉套現。金價一跌，觸發好多程式盤斬倉。」曾經是黃金「粉絲」的工廈大王楊國佳，本週二亦改口風：「○三年黃金每盎司只要三百美元，依家好多人賺凸換馬，加上瑞信、瑞銀等加實金存倉費 2%，好多國家級有錢人唔再揸實金，引發骨牌效應，仲有得跌呀﹗」他打算將手頭黃金放售，換馬買高息美股。
百利好金業（香港）研究部董事黃耀明指，市民無需搶住入市：「好多炒金嘅人借孖展，證券行一加按金，佢哋斬倉掟貨，短期仲有得跌。到金價於一千二百八十美元橫行時，可考慮入市。」金價短期內若未能企穩，將拖累其他投資產品。資深銀行家陳鳳翔指，近十年黃金價格不斷上升，市面上出現不少與黃金指數掛鈎的結構性產品。金價波動有違約風險，倘若金價再急速下滑，必定屍橫遍野﹗

撰文：財經組
攝影：關永浩
插圖：朱桂葉