難得喺橫店拍完《食為奴》，蚊蚊即趕返香港放假，上週四（ 27日），由男 stylist傍住，一齊去海港城濕平，剛喺停車場落車，蚊蚊已笑到四萬咁口，睇嚟佢返到嚟香港放假真係好開心。
FBI
橫店打到散 萬綺雯停工造人
近排晚晚都見到 42歲防腐「蚊蚊」萬綺雯，喺《好心作怪》做三哥老婆，仲勾佬搭上大隻港男袁偉豪，上演大膽床戲同車震，睇到 O晒嘴， FBI覺得蚊蚊都算大突破。
演技咁好，肯定大把劇等佢拍，早排蚊蚊就同《老表，你好嘢》原班人馬北上橫店趕拍 TVB新劇《食為奴》，不過 FBI收到風話 TVB為咗縮皮竟然迫班演員趕工，身為女主角嘅蚊蚊更因連續多日超時工作，唔只拍到謝晒，仲因為拍打戲搞到周身傷，好彩有得唞唞。
上週三（ 26日）， FBI喺又一城撞到蚊蚊，佢唔只好悠閒咁睇旅遊書、 shopping，仲約埋 auntie出嚟茶聚。唔知係咪喺橫店捱得辛苦，之後 1日（ 27日）下晝蚊蚊又出動，呢次就由男 stylist陪住去 shopping，其間 2人連掃多間時裝店，行足 4粒鐘。之後 FBI打畀蚊蚊，佢話拍完《食為奴》後，暫時都未接新劇，等佢完成晒手上嘅宣傳工作，佢會即刻同老公陳十三飛去外地度假輕鬆吓。蚊蚊同老公喺外地二人世界，話唔定返嚟好快有好消息喎！
蚊蚊最近鬼咁紅，去到邊都有人認得出，行去連卡佛濕平期間，唔少途人都大嗌「萬綺雯」，而蚊蚊亦好有禮貌揮手回應，非常親民。
《食為奴》慶功
上週《食為奴》搞慶功 party，除王菀之及張繼聰外，蚊蚊仲帶埋老公陳十三（紅圈）出席， 2人仲拖住手影相，鬼死咁煙韌。
就快去旅行，蚊蚊去書店狂睇旅遊書，做好準備。
超時捱打
上月蚊蚊同張繼聰北上橫店拍《食為奴》， FBI聽聞蚊蚊為趕工唔只日日超時工作，仲因拍打戲搞到受傷，要老公呵番，辛苦晒！
《好心作怪》中，原本蚊蚊同三哥鬼咁恩愛，但因懷疑周麗淇介入，搞到蚊蚊同三哥吵大鑊，之後靚太蚊蚊仲出軌勾人老公袁偉豪， 2人更上演激吻戲，超大膽。
撰文、攝影： FBI
留言列表
