鄺美雲去年在中環開設Cally K Jewellery，為VIP客人售賣設計獨特的珠寶鑽飾。近日她為了讓一班闊太可在更舒適環境下選購珠寶，每月在店內秘密舉辦兩次私人性質的珠寶騷。

上周五，她就與時裝設計師何國鉦（Dorian Ho）crossover開騷，一班名太邊歎香檳，邊坐在寬敞的意大利梳化上，近距離欣賞模特兒行騷，珠寶、晚裝、皮草、手袋任試任揀，搞到班名太個個滿載而歸，埋單最少都萬萬聲。

一班闊太邊歎香檳，邊睇騷，舒適自在絕對是VIP享受。

世界級古董修補專家鍾叮噹與鄺美雲私交甚篤，這天到來欣賞珠寶騷，即場掃入一對翡翠耳環。見現場人多，更聲言「下次再來慢慢揀」。

鍾叮噹揀耳環，好友曹眾與內地富商老公陳先生亦揀埋一份。

珠寶店行天橋

鄺美雲與何國鉦在珠寶店crossover開騷，一班靚太包括古董收藏、修補家鍾叮噹、已嫁內地陳姓富商的曹眾、詩琳集團營運總裁謝欣玲、光大證券副總裁蔡安蕎、醫生太太黎淑賢等，個個上足銀彈來掃貨，而何國鉦好友陳沛嘉、陳煒、胡敏珊和王賢誌等亦到來撐場。

場內有四位模特兒穿上Dorian Ho晚裝，及戴上多套名貴珠寶鑽飾，逐一走到一班靚太面前，讓她們慢慢欣賞，睇啱更可即時試戴，無拘無束。悉心打扮的鄺美雲亦落手落腳親自招呼客人，又預備靚酒美點奉客，冧得班靚太即買即戴，個個笑住走。

曹眾這天試戴多款鑽飾，對這款珠鏈連鑽石老花眼鏡尤其有興趣。

珠寶晚裝一條龍

鄺美雲笑言：「現時珠寶店每十日左右便搞一次騷，客人嚟到只要好自在坐喺度，就可以睇住班模特兒示範珠寶鑽飾，睇啱先試，唔使自己逐件逐件戴上身試咁辛苦。而與Dorian合作，係希望客人揀選珠寶的同時，仲可以好relax咁欣賞埋最新嘅時裝同手袋，買衫買首飾一條龍搞掂。」

現時珠寶騷只屬私人性質，每位到場的賓客需由熟客或朋友介紹，暫不對外開放。「活動每次人數限定在二十人左右，一來基於保安問題，二來我希望可以親自招呼，照顧到每一位到來的貴賓，下次珠寶騷會在七月中舉行。」

鄺美雲與何國鉦crossover開珠寶騷，四位模特兒穿上Dorian設計的晚裝，戴上Cally K Jewellery的名貴鑽飾，閃爍動人。