已經瘦咗？
上週五（ 28日）苟姑娘出席馬德鐘同老婆張筱蘭嘅瓷婚 party時就自爆瘦咗，現時 130磅，不過短裙難掩一雙「肉」腿，雙下巴亦繼續出現。苟姑娘要更加努力先得喇！
真面目
好難減 當眾笑似河馬 肥苟嬲咗唯唯
自年初與城城傳出緋聞， 29歲華姐苟芸慧即時爆騷，騷價由四萬跳到八萬，不過身形卻與收入成正比同樣脹爆，更慘被改花名「肥苟」。
據知苟姑娘暴脹全因壓力過大導致賀爾蒙失調， 2個月前經友人介紹開始睇中醫、食中藥，不過未見成果。
上月苟姑娘孖螢幕拍檔梁烈唯去番禺拍遊戲節目，期間唯唯邊講笑邊指住隻河馬對苟姑娘話：「嘩，好似你呀！」肥苟即時黑面，仲認真同唯唯講：「你好 mean呀！」女人最忌被笑肥同醜，嚟緊二人喺新劇《飛虎 II》仲要演夫妻，到時好大機會面阻阻。
5月最脹
出席遊戲機活動，苟姑娘肥到冇腰冇頸，難怪當時佢要急急睇中醫調理。
因壓力大導致水腫，更被外界冠以「肥苟」的苟姑娘，話晒係華姐冠軍，被人笑肥，點都會唔開心，最嬲係拍檔唔體諒，笑埋佢一份。
賀爾蒙失調
攻城即肥
年初因拍 PCCW廣告被指與郭富城撻着，當時苟姑娘仍算瘦加索，不過攻城後即開始吹脹。
上月中，苟姑娘孖梁烈唯上番禺拍節目《千奇百趣玩 Free D》時，唯唯講笑話苟姑娘似隻河馬咁肥，苟姑娘嬲到即時黑面兼當場鬧爆唯唯，「你好 mean呀」，完全唔想睬唯唯。知情者說：「苟姑娘話估唔到連咁熟嘅唯唯都會拎佢嚟講笑，所以今次堅嬲。」
據知，苟姑娘因為早前被指介入郭富城和熊黛林之間做第三者，令心情一度跌落谷底，更壓力導致賀爾蒙失調，而變成肥腫難分。
「苟姑娘平時已經唔多食嘢，試過有次同佢全日一齊，見佢只係食咗幾啖飯，其實佢一得閒就會跑步同焗 45分鐘桑拿，飲啖水都肥。」知情者說。
上週五（ 28日）苟姑娘出席馬德鐘的《瓷婚慈善晚會》時就話：「呢排瘦咗，我每日盡量喺屋企做瑜伽，朝早 6點就起身拉筋去水腫。同埋𠵱家睇緊中醫減肥，調理吓身體。（好似未見成果？）中藥係慢啲！但係我下個月（ 7月）要拍《飛虎 II》做女警，我都想瘦，希望回復當年選華姐身材，我想減得健康啲，所以中醫減肥會適合我多啲。」據知，苟芸慧自 5月開始睇中醫調理身體，約每星期睇一次，慢慢調理。
唯唯：「苟姑娘好玩得」
《飛虎 II》即將開拍，劇中苟姑娘會繼續和梁烈唯演夫妻，唯唯話苟姑娘唔會嬲佢。「我哋結咗婚，仲發生埋關係！我會露胸肌，跟住苟姑娘仲挨喺我心口睇電視！（怕唔怕苟姑娘肥晒同第一集有分別？）女性體態豐滿唔代表唔靚。（你之前笑苟姑娘似河馬激嬲咗佢？）苟姑娘好玩得㗎，點會嬲啫？」
週一（ 1日）苟姑娘在 31度悶熱天氣加 3號風球底下，仍着晒冷衫長褲遮住肥肉出席商場活動，睇落冇咁脹。對於唯唯笑指河馬似自己時，苟姑娘笑住回應：「我知道佢講笑咋嘛，點會介意？」
河馬累事
二人孖住去番禺長隆拍《千奇百趣玩 Free D》，唯唯就係指身後隻河馬笑同苟姑娘好似而激嬲苟。苟姑娘除咗身形之外個樣咁甜，邊似喎？
玩出火
平時口甜舌滑嘅唯唯竟然講笑冇理苟姑娘感受，真係講嘅冇心，聽者有意呀！
做埋夫妻
苟姑娘同唯唯喺《飛虎》飾演一對，嚟緊續集二人仲結埋婚，心廣體胖其實好正常！
減極唔瘦
暴脹之後纖體公司即睇中苟姑娘做代言人，可惜苟姑娘減極唔瘦，有傳纖體公司最近要飛起苟姑娘，另搵女星取代。
本週瘦咗
本週一，苟姑娘出席活動時塊面已經明顯尖咗，手腳亦冇咁腫，減肥開始有成績。
「 V煞」之變
苟姑娘 4年前入行時非常面尖，身材玲瓏，相信佢努力下，好快會變番索身材。
'09纖瘦版
苟姑娘 09年參加「國際中華小姐」選舉，當年苟姑娘樣甜、 V煞面，加上 35C上圍輕易得到評判歡心。奪冠後苟姑娘更得到不少幕前演出，拍住林峯、馬國明、鄭嘉穎等一線小生令苟姑娘入晒屋。
'12小肥版
12年苟姑娘接拍《怒火街頭 2》，拍住視帝鄭嘉穎飾演靚女醫生，不過人氣開始上升的她，體重亦開始上升，當時已出現水桶腰。
'13暴肥版
自年初與郭富城傳緋聞後，苟姑娘無停過增肥，更有纖體公司搵過苟姑娘做代言人，可惜苟姑娘飲啖水都肥令纖體公司打退堂鼓，即使拍晒廣告但最終都被抽起。
撰文、採訪：娛樂組
攝影：攝影組
留言列表
