日面
《 Can Cam》睇中葉熙祺 黑船上面
近年香港模夢想攻日，繼先鋒 Angelababy、 Janice Man同周秀娜後，最近輪到娜姐師妹葉熙祺（ Anna Kay）延續模攻日夢。
啱啱 25歲、來自廣州的葉熙祺，年頭已孖住黎明嫂樂基兒拍資生堂的《 TSUBAKI》洗頭水廣告開拓日本市場。最近再升呢，被日本 OL潮誌《 Can Cam》邀請成為「專屬」模，更於最新一期 7月號《 Can Cam》登上封面。稍後葉熙祺更會接拍日劇同電影，雖然暫時得個「講」字，但 Anna勝在五官標致兼個樣夠自然唔似整容，要成為「黑船」俘虜㗎仔，大好前途。
眼大大笑起上嚟 cute爆的葉熙祺，自上年尾孖住日本名模 蛯原友里演出《 TSUBAKI》洗頭水廣告後，即開行 turbo攻日，除早前行過《 Tokyo Runway》模特兒騷外，最威係連日本 OL潮誌《 Can Cam》於最新一期 7月號宣布正式邀請她成為《 Can Cam》首位中國籍「專屬」模。
封面女郎
葉熙祺被《 Can Cam》睇起任專屬模，於最新 7月號當上封面女郎，連日本娛樂新聞報紙《日 刊 Sports》都以大篇幅報道。
7月號《 Can Cam》用咗 12版篇幅去介紹葉熙祺，簡直係華人之光。而佢香港嘅經理人 Roy就話 Anna Kay同《 Can Cam》嘅合作暫定一年，如果雙方合作愉快，當然會繼續。
《 Can Cam》讚似小動物
於 7月號《 Can Cam》內，葉熙祺唔只成個大頭做封面，書內更有連續 12版介紹佢，當中以葉熙祺的 8個秘密做主題，介紹佢聽嘅音樂，甚至食嘢嘅口味等，而她當然唔少得示範時裝。葉熙祺之所以被《 Can Cam》睇起，該雜誌的形象設計師小山田對佢身形讚不絕口，乜嘢衫都 carry到，而最重要係編輯堀由佳喪讚：「初頭睇 Anna啲相，淨覺得佢得個樣靚，但見到真人感覺完全唔同，無論佢嘅舉止同談吐都好似啲小動物咁，好 kawaii，好吸引到身邊人嘅目光，呢類 model日本人一定 buy。」
葉熙祺喺日本仲係新人，佢嘅日文翻譯就爆佢初到達東京成田機場時，已第一時間走去買飲品招呼工作人員，細心得嚟好識做。
唔好睇葉熙祺身形咁纖瘦，《 Can Cam》爆佢其中一個秘密就係好大食，而且最鍾意食甜品，尤其忌廉泡芙，佢仲晒命話：「好彩我係食極都唔肥嘅人。」真係羨慕死㗎妹同港女。
年頭出處女國語大碟《祺待》嘅葉熙祺，〈斷翼天使〉曾攞過中央電視台舉辦嘅《中國網絡頒獎禮》嘅「最佳 MV獎」。唔只睇得仲唱得。
葉熙祺攻日首個任務，就係同班名模（左起）水原希子、 AKB48成員小 嶋陽菜、 蛯原友里、樂基兒及俄羅斯 top模 Sasha Pivovarova一齊幫資生堂嘅《 TSUBAKI》洗頭水賣廣告，拍埋班名模身邊，絕對唔輸蝕。
望出日文碟
最近葉熙祺（右）已加盟日本 Pearl Models經理人公司做 蛯原友里師妹，葉熙祺話友里介紹好多朋友畀佢識，得閒仲會交換扮靚心得，對佢好關照。
今年全力攻日的葉熙祺，其實年頭已與盛產名模嘅 Pearl Models簽咗 3年合約做 蛯原友里師妹，據知 Anna除幫《 Can Cam》做御用模，最近正接洽多部中、日合資的電視劇及電影，還有電視廣告。而本身居於北京的 Anna每個月都要飛去日本開工，每次只逗留 10日。雖然辛苦，但 Anna就話：「去親日本做嘢，每次只瞓得兩個鐘，但好開心，日本公司好有制度。我 𠵱家學緊日文，希望將來可以出日文碟做歌手。」而葉熙祺香港所屬 GME經理人 Roy就話：「 𠵱家 Anna中國、台灣、香港同日本四圍飛真係好辛苦，難得佢好珍惜機會，只要佢有咩需要，我都會盡量配合。」
留言列表
