上週五（ 28日）， 陳莉敏 Queenie和 Cyrus一齊睇《求愛》大結局，睇到 Cyrus示愛一段時， 陳莉敏 Queenie忍唔住一個冧樣望往男友。
陳莉敏最後勝利 海洋公園冧玩 《求愛》 Cyrus堅拖 Queenie
連續三星期的真人假騷《求愛大作戰》上週埋單，《求愛》四男女互溝見真面目，女參賽者 Vivien更和 Sharon鬧爆無綫造假兼歪曲事實，《求愛》活動亦失蹤費事眼寃。
《求愛》男女關係差，好在有 Cyrus成功撻着大 9年的整容狂導師 Queenie陳莉敏，雖然兩人互稱「仍在了解當中」，但據知兩人其實已經拍拖 3個月，週日更在海洋公園內親密拖手，姊弟戀冇隔膜。
週日成班《求愛》成員到海洋公園玩，雖然現場勁多遊客，影合照時又分得好開，但 Queenie仍不避嫌與 Cyrus手拖手冧遊公園。
曾遭製衣廠老闆拋棄而狂整容超過 30次的 41歲 Queenie陳莉敏，經過 32歲 Cyrus在印尼龍目島的真情示愛後，終於俾 Cyrus打動，二人在今年 3月回港後，正式開始拍拖生活。
拍拖三個月
據 Queenie身邊人透露：「開頭 Queenie只係做個樣畀班女參賽者睇，教佢哋唔應該即刻就拒絕人，要 open啲去試吓了解對方，點知 Queenie愈接觸得 Cyrus多，就發現兩個好啱傾，返嚟香港後就正式拍拖啦。」
雖然上週五（ 28日）一眾《求愛》台前幕後一齊睇大結局時， Queenie跟 Cyrus已儼如一對，不過受過情傷的 Queenie仍小心說：「互相搵到一顆真心，了解當中。」但其實兩人在朋友間已是公開一對，經常拖手出席聚會，週日 Queenie和 Cyrus跟大班《求愛》成員一齊去海洋公園玩，更在大庭廣眾下親密拖手公開關係。估唔到《求愛》大贏家，唔係班盛女，竟然係導師。
現場曾有記者叫二人 kiss，但最後不肯就範，後來飲大兩杯， Queenie終於忍唔住在 Cyrus的 after show節目中錫咗 Cyrus。
之前兩人接受訪問，雖然唔肯正式承認拍拖，不過就十指緊扣話：「我哋永遠好朋友。」
Vivien深圳夜蒲：「《求愛》班人係 bullshit！」
Queenie搵到真愛，但另一位曾勁鬧 TVB做假，兼不忿遭擺上枱的內地富二代 Vivien，則懶理《求愛》班人約埋去玩去蒲，情願留在深圳 disco自己搵 friend玩。據知 Vivien除咗 Karl，已決定不再跟《求愛》任何人來往，更曾跟友人狂呻：「我覺得班人根本就係 bullshit，就算佢哋再叫我一齊去玩，我都唔會再理佢哋！」
上週六（上月 30日）， Vivien約埋綠魔 Karl在深圳夜蒲，據知 Vivien在場內勁受強國仔歡迎，難怪唔稀罕在《求愛》搵仔。
綠魔 Karl憑《求愛》大 hit，上週六去深圳蒲之餘，仲上埋當地的潮流電視節目《香港范》做嘉賓，更有食店搵佢做剪綵嘉賓。
訪訪、撰文：娛樂組
攝影：攝影組
留言列表
