傳聞栢芝與釗峰 5月初在潮服 AMENPAPA活動上初相會，栢芝開口讚釗峰得意，仲主動交換電話發展姐弟戀。
網上圖片
真面目
好出奇 離奇搭上張栢芝 C AllStar釗峰：最近成日見！
33歲失婚婦張栢芝話唔會抗拒新戀情，不過全副心機擺晒喺兩個仔 Lucas同 Quintus身上，結果單身足足兩年，除咗間中傳出與前夫霆鋒復合，再唔見身邊有其他異性。
不過緣分擋都擋唔住。五月先至喺潮服 AMENPAPA活動上見過第一面，七月就有報道話 33歲栢芝即同 27歲 C AllStar主音釗峰撻着 1個月。有冇咁快？週一（ 1日）釗峰正式回應：「得啖笑！上佢屋企開會啫！」
之但係，栢芝去到邊都有記者跟實，又唔見第二個上世紀大廈開會？
5月 24日，母親節兼生日，栢芝竟然冇同囝囝慶祝，一個人走去理大睇 C AllStar迷你騷，更逗留至晚上 10點。
被拍到獲栢芝親自接載上世紀大廈離婚竇，釗峰否認：「我哋四個輪流同佢開會，咁啱佢嗰日有嘢返屋企攞啫。」
公事私會
自從 5月 Quintus 5歲生日，霆鋒同栢芝不相往來，復合機會確係微。
《壹週刊》圖片
據知栢芝和釗峰五月初首次在活動見面，母親節兼 33歲生日（ 5月 24日）就夜媽媽去捧場睇演唱會，上週三（ 26日）再被拍到栢芝親自接收工，再帶埋返世紀大廈香閨短聚，有圖有真相？週一（ 1日），釗峰親自回應本刊否認緋聞：「 C AllStar同栢芝嚟緊喺大陸有個演出會合作，所以最近多咗聯絡，經常需要見面開會。佢同其他幾個成員都係單獨開會，咁啱嗰日栢芝要返屋企攞嘢，至會車埋我返佢屋企啫。咩姐弟戀，完全係得啖笑！」
出道得三年、最出名都係得〈天梯〉一首歌，未有車更加未有樓，老實講，栢芝同呢班八十後合作，提供交通工具同借出香閨開會，又確係合理嘅！
癡心 80後
其貌不揚， C AllStar四子其實一向有姐姐緣，首〈天梯〉連前輩關淑怡都俘虜，獲點名擔任年初演唱會尾場嘉賓。
釗峰參加歌唱比賽出道、唱情歌〈天梯〉上位，雖然都成 27歲大個仔，戀愛經歷其實得一次：「我同對方喺高中時結識，一直糾纏到大學，經歷過三分三合，每次都因為佢有第三者，仲要次次個第三者都唔同，我次次都接受番佢。明知係戇居，但我就係咁，覺得冇咗佢唔得。」又會咁啱嘅？栢芝又係八十後癡心情長劍，同霆鋒何只三分三合呀！
採訪、撰文：娛樂組
攝影：攝影組
留言列表
