細狗玩偷步：細狗組參賽者明顯冇咁聽話，好多主人要用盡九牛二虎之力至 hold得住隻狗，阻止偷步。
大狗贏氣勢：大狗組氣勢如虹，第三線隻金毛仲擺出副吼叫狀，好心急！

寵物家

2012狗狗水運會

2012年07月05日 ~~ 第1165期 香港《壹周刊》

五月中，決定再搞停辦多年的狗狗水運會。鎖定六月廿四日風雨無阻正式上演。
個零月時間內，招募參加者、搵贊助、定賽程、開 FB專頁、印 T恤、整名牌、約獸醫，一大堆籌備工作，令記者我的腎上腺素從未停止上升過。連朋友親戚都知我搞緊狗狗水運會，我諗自己發開口夢都叫住水運會。
終於到 624凌晨，不停 reload十萬次天文台個 App，一瞓落床聽見天氣報告叮一聲嘅 msg又即刻彈番起身。
眼光光到天光，場地打嚟話現場傾盆大雨，仲話睇嚟有排落？個心直線下沉，唔通要臨時取消？
諗起連日來，萬分期待水運會的狗主們，點忍心令大家失望，一於照去馬！
到九點半，九成參賽狗已經到達會場。連太陽伯伯也來關照，一天都光晒。
好彩如期舉行，大班狗狗與主人玩到見牙唔見眼，成個水運會就喺一片熱鬧歡笑聲下結束，個個意猶未盡追問下次幾時搞。
好，勾手指尾，約定你下屆見！

比賽篇

肉緊主人大興奮
水運會開始前，好多狗主緊張追問比賽細則，實行要同狗仔預先演習咁款。到正式開波， 39隻參賽狗花招盡出，大狗有大狗斜 cut，細狗有細狗 U-turn、下沉、逆走，總之你有你叫，佢有佢游，一切準則規例統統被拋諸腦後！狗主們，唔使無奈嘅，話晒呢個係「狗狗水運會」，只要愛犬玩得開心，無計較啦！


最兇狠！
「衝呀！殺呀！」淨係呢份氣勢，無得輸！


點知一游完即淆底，震震震，都係包番條毛巾先。


最激動！
臘腸狗 Lean Lean一路領先攞細狗組冠軍，佢主人就由頭 high到落尾，衝線嗰陣仲興奮到成個彈起，齋睇呢幕，都知現場氣氛有幾高漲。


最無奈!
標準貴婦 Gu Look見水怕怕，主人三催四請， Gu Look係咁意浸吓就返上岸，你睇主人個樣笑得幾無奈。

迷途篇

細狗氹氹轉
比賽規則，一個主人喺起點推，另一個主人喺終點引。但係，唔少狗狗一落水就掉轉頭，甚至不惜咬開線道 cut線又唔打燈再 U-turn上岸。 Sorry，取消資格！

花絮篇

嘔心瀝血齊炸水
對上幾屆狗狗水運會，都會影番張型爆狗狗炸水相，今次攝影組出動四名攝影人員，長炮腳架防水鏡樣樣齊，點知攝影師落埋水濕身兼嗌到聲沙，班狗狗都係要玩前後腳。結果我哋齊齊 I jump、 dog jump接近十次，終於有張狗狗撲水相。咁辛苦，都係為咗話你知，當日成廿隻金毛同拉布拉多，兼成班貴婦、邊牧喺度周圍跑跑跳跳嘅盛況，人強狗壯呀！


人算不如狗算，有啲狗一見水就跳落去，可惜，唔係個個咁聽話。


攝影師浸落水，指導各位狗主擺個靚 pose，辛苦晒。


現場加插環節，狗狗飛身跳起咬網中骨，幾有當年殺人鯨表演的風采！


點都唔肯跳！
要廿隻狗聽聽話話埋位影相，各主人出盡百寶，成個水池飛碟骨頭玩具樣樣齊。

打扮篇

游水唔快唔緊要，扮得靚仔靚女，一樣大把人注意！


汽水樽當氧氣筒！


戴泳鏡


紫衣狗王

頒獎篇

有比賽當然要有獎品，感激贊助商希爾思寵物食品、 Caesars Diffusion、 iPETchannel.com送出大量狗糧、寵物用品、會籍等，人人有份永不落空。想一齊玩，下次記得早啲報名參加啦！

鳴謝：寵物樂園、摯愛動物醫院陳文滔醫生及莊泳濤護士、聖約翰救傷隊、希爾思寵物食品、 Caesars Diffusion、 iPETchannel.com


大狗組冠軍叫次子，獎品成座山咁高，排晒喺頒獎台背後，主人興奮到話要 call車入嚟運糧走。