《飛虎出征》飾演妓女的劉安琪，戲中主動剝衫露點色誘樂仔，搞到樂仔面紅耳熱。
娛樂喧
甩黐身 Kary 余文樂搭上出征女
余文樂（樂仔）吳雨霏（ Kary）拍拖一年玩完，有指女方逼得太緊，令樂仔頂唔順，最終雙方不歡而散。近日更有指樂仔以「我個心仲有個人」做藉口狠撇 Kary。
本刊收到消息，二人蜜運時， Kary經常 check實樂仔行蹤，就連樂仔開工時間都唔放過。早前，樂仔到澳門拍攝《飛虎出征》， Kary發現他與 33C出征女劉安琪拍大膽牀上戲，更打爛醋埕。
據知來自內地的劉安琪，拍攝中途得悉樂仔情海翻波，便主動出擊，大送秋波。
一年情玩完
樂仔與 Kary去年中已撻着，當時樂仔更自動請纓飛到台灣為女友執導 MV，可惜二人拍拖一年便因了解而分開。
31歲余文樂和 27歲的吳雨霏去年中由好友關係升級至情侶，二人年初除被拍得齊齊到吳君如屋企拜年外，早前二人由倫敦旅行返港時，本刊更直擊兩人同坐商務艙。當時樂仔對 Kary十分細心，主動幫手推行李，打風打唔甩咁款。
WhatsApp𥄫實行蹤
感情話變就變，上月 29日，圈內突然爆出樂仔與 Kary分手消息，惟 Kary當晚就透過唱片公司發言人表示：「我哋冇分手，唔知傳聞點！」但事隔不夠一日， 6月 30日 Kary便單方面發聲明宣布與樂仔情已逝。
知情人士說：「 Kary當然唔想冇咗樂仔啦，所以佢唔想公開分訊，希望仲可以箍得番樂仔。」但無奈 Kary太過黐身，令樂仔立定心腸撇女。「好多女仔對樂仔投懷送抱，加上佢又成日返內地工作，搞到 Kary好唔放心，成日打電話 check住男友。 Kary發現樂仔半夜三更喺 WhatsApp online，就即刻問長問短，搞到樂仔冇晒自由咁。」
Kary check得太緊，樂仔沒半點怨言，但樂仔早前拍攝《飛虎出征》發生小插曲，令二人冷戰多時。劇組工作人員爆：「套戲講樂仔去澳門尋歡，自然有唔少肯剝肯搏嘅女仔穿插過場，樂仔仲要同一個露兩點嘅國內女仔劉安琪有牀上戲， Kary緊張起嚟，咪經常 send WhatsApp俾樂仔囉，可能咁樣，所以佢哋有少少摩擦啦！」
據知劉安琪見樂仔拍戲冇厘神氣，不時主動大講國產有味笑話𠱁樂仔歡喜。二人雖然首次合作，但拍談情戲時交足戲，戲外互相關注對方微博外，甚至交換電話。
北姑列陣
25號上映的《飛虎出征》講樂仔、杜汶澤等四位飛虎隊隊員去澳門召妓，因此電影有大量賣肉北姑過鏡任樂仔𥄫，難怪 Kary當時咁緊張。
低胸調情
樂仔戲中與「出征女」劉安琪調情，安琪亦不時低胸上陣，務求令樂仔對他起痰。
今年 23歲的劉安琪， 08年以𡃁模身份入行，拍過國內不少廣告。由於樣貌清純，加上身材惹火，被樂仔及導演睇中。
2月秘遊英倫
樂仔和 Kary今年 2月中秘密飛倫敦展開 9日甜蜜之旅。當時身處倫敦機場的樂仔，發現記者後便立即示意唔好影相，全程護實女友。
4月繼續癡纏
今年 4月，樂仔與 Kary雖然經常因小事摩擦，但二人繼續愛下去，被拍得外出撐枱腳。《蘋果日報》圖片
余文樂：佢身材好好
樂仔與 Kary一年情玩完，但記者多次就二人分手原因追問樂仔，他不欲多談，但仍維護舊愛，「我哋冇嗌交，係和平共識分開嘅！我唔想外間覺得佢有問題，我哋仲係好朋友，其他嘢唔再回應咁多喇！」
提到新戲對手劉安琪主動親近，樂仔則尷尬說：「其實唔係所有國內嘅女仔都咁 agressive，安琪好純品、好斯文嘅！（有場戲佢露點色誘你！）其實我都好尷尬㗎！當時佢應該衝破唔到心理關口，所以佢拍嗰場戲眼濕濕，好唔開心！（佢身材好唔好？）嘩！梗係好啦，唔好導演（彭浩翔）都唔搵返嚟拍啦！」
至於受情傷的吳雨霏，為避傳媒採訪，連日來都匿在家中，連唱片錄音也延期。據知她得悉舊愛為她出面講好話後，已透過 WhatsApp感謝樂仔。看來分手後都未必一定變仇人。
打波發洩
樂仔周一（ 1日）為「橫洲工業」籃球隊作賽，記者發現分手後的他射籃時更加狠勁，更露出右臂的愛的紋身。
入廚療傷
Kary近日就留守家中，天天入廚煮幾味療傷。趁凌晨時分在她家守候的記者收工後，她才溜出去繼續錄新碟。
單身慶祝
Kary上月初 27歲生日，搞 party慶祝，但樂仔竟然人同禮都唔到，原來當時二人已瀕臨分手邊緣。
兩女惡鬥
Kary和劉安琪都屬個子不高但身形標準的女仔，論背景， Kary勝一籌，但以外形條件來說，國產劉安琪則贏開巷。
採訪、撰文：娛樂組
攝影：攝影組
留言列表
