遮打發功
七.一晚上 8點半, RubberBand終於行到中環遮打花園,上台獻唱〈 Do you hear the people sing〉,暗寸中央漠視民意。

滾熱辣
向陳淑芬大話 Say No  RubberBand搗蛋騷
因演出維穩騷《香港巨蛋音樂節》被網民插爆的 RubberBand,連日來強調樂隊「心在曹營身在漢」,終於在七.一當天為樂隊收復失地。維穩騷表演當日,穿上「 NO」字樣 T恤的 RB,除了高唱民主之聲,私下更自掏五位數字,七.一前趕製「 NO」 T恤及紙扇,發給朋友及歌迷,更自費租旅遊巴,表演完後拉大隊趕往銅鑼灣遊行,實行玩寸維穩騷,擺明向主辦人陳淑芬 Say No。
至於連日被插大話連篇的陳淑芬,打着「爭取場地」的旗號,藉辭掩飾擦中央鞋的行動,但維穩騷當日卻因風雨又腰斬又被 RB搞寸 party,陳淑芬相信亦始料不及。不過,她依然死撐,發聲明強辯維穩騷與「政治無關」,掩耳盜鈴。

6月尾,適逢黃家駒生忌, RubberBand的主音 6號寫了一篇文章︰「在大是大非的世代,有時我們需要的,應該就是一股勇氣,把應該唱的唱出來……」
七.一出席巨蛋騷時, RB不僅真的勇敢地唱起民主之歌,包括〈一無所有〉、〈孤星淚〉及〈睜開眼〉等,更起了帶頭作用,穿上「 NO」字樣 T恤及手執紙扇,旗幟鮮明地在表演前宣揚民主,呼籲大家拿出勇氣,爭取真普選及言論自由。

遭網友插爆的陳淑芬,近日發表長達三頁紙的聲明,罵巨蛋騷遭人騎劫為政治宣傳工具。陳實在是賊喊捉賊。

RubberBand冒大雨在台上發表訴求,高呼「爭取 2017真普選、捍衞言論自由!」說罷即唱出〈一無所有〉,台下觀眾非常受落,台下的東亞老闆林建岳,睇到面無表情兼繑晒手。
自資印 T恤
有 RB的 fans爆料︰「 RB一早已經嗌晒成班 fans唔好睇騷,一定要去遊行。佢哋仲自己攞錢出嚟印咗幾打「 NO」字 T恤同 4千把紙扇,送俾啲朋友同相熟嘅 fans。七.一嗰日仲租咗架旅遊巴,同成班朋友 join埋一齊落銅鑼灣遊行㖭!」
事實上,表演完後, RB冒雨跟 fans直踩銅鑼灣遊行,而主音 6號接受本刊訪問時,提到早前被插搖滾叛徒,亦苦笑話︰「我哋有政治敏感不足嘅地方。我哋喺呢度(遊行)用腳講出我哋嘅意願,只不過我哋喺台上面,係用結他同歌聲啫,就係咁簡單。」
談到陳淑芬以爭取表演場地為由搞維穩騷,隊員阿偉就暗寸話︰「我哋唔評論個別人,但觀眾嘅眼光係雪亮嘅。啲人話演藝學院學生公然挑釁梁振英好冇禮貌,我就覺得學生好有獨立思考,如果係我,都會囉!
冒雨遊行

RubberBand嘅 6號,在遊行時表示:「喺呢度我哋用腳講出我哋嘅意願,我哋要捍衞言論自由,爭取真普選。」
「 NO」 T贈友

彭秀慧穿上 RB嘅「 NO」 T恤與泥鯭合照,並在微博張貼,表示支持。
NO扇出騷

Fans們跟足偶像指示,拿着「 NO」紙扇出席維穩騷及遊行。
講辭有修飾
其實 RB私下因為這個騷,與經理人方面亦曾有拗撬。雖然 RB有自己的政治立場,但樂隊始終代表東亞娛樂表演,公司方面亦不想他們的言論過激。
「據知 RB嘅講辭,老闆林建岳搵人幫佢哋執過幾次。本來之前嘅用語仲激,但岳少同中央關係唔錯,亦係生意人,當然唔想得罪中央,大家都 tune咗幾次。」知情者話。
記者致電 RB經理人陳小姐,她說:「嗰個唔係維穩騷,維穩騷係你哋話,嗰個都係七.一騷,演出協會都澄清過, RB之後都有去遊行。公司係好 open俾佢哋自己揀唱咩歌講咩嘢。(有 fans爆 RB叫佢哋去遊行唔好去睇騷。)我見 fans有嚟。(當日嘅 T恤同紙扇,係 RB自資?)既然係佢哋想表達嘅訊息,當然係佢哋自資。」
陳淑芬今次搞維穩騷,請來唱反調的 RB已經夠尷尬,做騷當日更因為天雨關係腰斬,提早一小時於黃昏完騷,天時地利人和盡失的陳太,認真冇運行!就 RB玩寸維穩騷致電陳淑芬,惟她未聽完問題,已急急 cut線︰「總之我要講嘅都喺聲明講晒,其他嘢唔回應。」
網上發功
曾參與反國教運動的本地樂隊 RubberBand,早前因為參演「維穩騷」,被網民杯葛唾罵,激進網民更發起罷睇及促請辭演。被批評嘅 RubberBand多次表明心跡,終在七.一收復失地。

要求辭演
6月 18日,「七.一」舉行的《香港巨蛋音樂節》一萬八千張門票三小時內售罄,有市民質疑活動是「維穩騷」,發起杯葛行動,要求香港樂隊辭演。 RB立即在 fb貼上遊行告示,表達爭取民主。
發強姦論
同日 RubberBand成員泥鯭在 facebook稱︰「身在曹營心在漢」,強調表演完後會遊行,更留言發表「強姦論」––「 I feel ashamed and upset for being raped」(我對被強姦感到羞恥及難受)。

部署反擊
19日,泥鯭再在 facebook留言反擊︰「 fighting back。對!是時候了!」惹來大眾猜測他們辭演維穩騷。其實當時成員已部署好一連串在維穩騷的反擊行動。

嘲 689
21日, RB再在 fb發功,譏 689小圈子選出來的梁振英。

捐出酬金
22日, RB決定捐出「維穩騷」活動的酬金,回饋基層,又將專頁封面相,改成「維港我舞台,維穩不要來」字樣,又向樂迷致歉。
群星撐上街遭河蟹
唔少藝人為了真普選、為了自由,為了一切一切嘅訴求,上街兼網上發功,可惜眾星在微博發表的民主言論,卻頻頻遭河蟹,眾星惟有轉移陣地到 fb及 Instagram發聲。
黃耀明 何韻詩

七.一下午兩點半,黃耀明同何韻詩喺 Big Love嘅街站宣揚真普選,並希望反性傾向嘅歧視可以早日立法。他們逗留四小時多。其間亦得到唔少市民支持及捐款。
薛凱琪
七.一當日,薛凱琪在微博貼上遊行相片,只用簡單的文字敍述,翌日竟遭河蟹,貼文不見了。

有 2萬人讚好㗎!
薛凱琪微博被河蟹,好在 Instagram嘅 post仍在,得到近二萬人說讚。

杜汶澤

言論出位嘅杜汶澤,在社交網貼出唔少寸政府嘅貼文,並推動遊行、示威,「遊行不是搞亂香港!是保護香港!」
盧凱彤

七.一當日,盧凱彤撐完黃耀明同何韻詩,即 join朋友去遊行,無懼下雨濕透身,堅持繼續行。
藍奕邦

藍奕邦參與遊行後,即在微博貼出英文字條,「 My life and my values are BIGGER than my job and your opinons」意思是「我嘅生活同價值觀係大過我嘅工作同你嘅評價。」
彭浩翔

彭浩翔在微博嘅 pose亦遭河蟹,有關遊行嘅 post,統統被微博刪走。
黃秋生

一向言論激進嘅黃秋生,早在六月尾已在微博表示,「人民唱出永遠不當奴隸的歌唱。」

撰文:娛樂組
攝影:攝影組

arrow
arrow
    全站熱搜

    tvb4life 發表在 痞客邦 留言(0) 人氣()