去年 3月，香港電視舉行動土儀式，四位花旦小生係威係勢撐場，可惜至今政府仍未發免費電視牌，公司上下難免憂心。《 Face》圖片
娛聞樂
未開台先燒 2億 王維基變陣拍劇閂水喉
香港電視（前名城市電訊）主席王維基，早前公布該集團截至今年 2月底的 6個月業績，共虧蝕 848萬元，製作節目成本已豪使 2億元。由於政府遲遲未發牌開台，香港電視至今拍竣的 8套劇集，亦未能見街，加上等發牌的同時，公司還有三項官司纏身。
內憂外患下，王維基即時橋王上身。據知近日他下令將拍劇制度改變，所有新劇要先試拍一集，經他過目後認為故事吸引才准開拍，從而「止血」減低製作成本。不過此信息傳出後，有不少幕後製作人員都極為反對，認為倘若劇本唔啱老細口味，辛辛苦苦拍完一集後要斬就斬，只會浪費人力物力。未開台已經四面楚歌，王生認真頭痕。
王維基近日官司纏身，除了早前被亞視控告竊取業務機密外，日前他又為控告《信報》誹謗而忙個不停。 
半年蝕掉 848萬，王仍手持大量資產、現金及可出售債券，可作往後 10年拍劇之用，王維基自言對發新牌抱有希望。《蘋果日報》圖片
抄美劇模式
此舉其實是仿傚美國拍劇的模式，先拍出來的一集稱為導航篇，一旦該集反應良好，就可繼續拍攝。通常作為導航篇的一集會安排在該劇的第一季第一集播出。王維基今次建議，旨在善用資源及避免積存多套倉底貨。不過有不少幕後就有微言，一名不願透露姓名的編劇表示：「雖然我哋每個月都有糧出，但咁樣改制分明想慳錢啦！咁辛苦寫個劇本出嚟，只係拍一集，如果唔啱佢哋啲高層心水嘅就唔要，咁即係嘥心機！」
對被指慳錢一事，記者曾聯絡王維基，香港電視發言人 Jessie稱：「絕對唔係慳錢，我哋依然係以 100萬投資每一集， 1蚊都唔會少。（你哋是否參照美國劇集模式？）月底開拍嘅新劇《歲月流情》會係第一套作為測試，會先拍咗一集，我哋會再進行意見調查。使嘅錢係一樣，只係拍攝時間長咗，但唔緊要，依家仲未有牌，搵多啲新劇種新方向都係好事，好過濫拍或一成不變。」擺明揶揄被指劇集冇新意的無綫。
王生呢個新嘗試，對劇集絕對係一個品質保證。（真實對白）新加盟香港電視的夏雨，對王維基新推方案大表支持，更稱新劇《歲月流情》原定上月頭開拍，但為了精益求精把劇本改到最好才推遲至 4月尾。 
希望一個星期就可以拍完一集啦！（真實對白）黃日華現時貴為香港電視當家小生之一，面對公司突然改革，他坦言會盡力配合，希望新改革會有新衝擊。 
已經拍咗兩套劇，知道佢哋有要求，想觀眾快啲睇到。（真實對白）王維基對旗下大部分藝人都只簽部頭約，所以唐寧在拍劇的同時，亦可抽身到有線參加節目， 6月份她會為有線主持健康節目。 
王維基重金禮聘一班資深演員過檔香港電視，希望獲政府發牌後能與無綫一較高下，果然上下一心。
演員贊成
早前盧海鵬為香港電視拍罷劇集《開腦儆探》，便立即跳槽到有線娛樂台做綜藝節目主持。
雖然幕後人員大表反對，但只負責演出的藝員則大致贊成。身為《歲月流情》男主角的黃日華，透過經理人何先生表示，作為演員只會按公司指示去工作，「有新制度都好嘅，但初期都要時間去磨合，不過最大影響都係啲檔期，拍咗一集之後仲要剪接再等審批。好彩同王生都有協議在先，可以喺空檔接其他嘢做。」
同劇的唐寧亦坦言已收到公司的拍劇新安排，「我之前已拍咗兩套劇，知道公司對劇集嘅要求。今次試拍一集嘅形式係好事嚟，以我所知拍得好嘅都會落實開嘅，所以工作人員都會好努力。」就連夏雨哥都舉腳贊成：「我雖然係第一次同佢（指王維基）合作，但知佢係好有誠意去拍有別於無綫嘅劇集，其實拍完一集之後改完又改，都要用大量時間同金錢，目的只係想品質有保證啫。」
一眾演員對王維基新嘗試大表贊成支持，另一邊廂沿用多年拍劇模式的無綫則稱試拍並非新鮮事。外事部副總監曾醒明說：「呢啲唔係新嘢嚟，我哋啲節目巡禮咪就係將啲古仔精華拍咗出嚟先囉。」
如政府順利發新牌，令公仔箱增加良性競爭，觀眾自然得益。
8劇存倉
現時香港電視仍存倉不動的劇集已有 8套之多，若每套劇 20集、並每集投資 100萬元作計算，以下 8套劇使費已達 1.6億元，又難怪王維基要變陣「止血」。
《還來得及再愛你》演員：唐禹哲（台灣演員）、衞詩雅、尹子維 
《驚異世紀》演員：林嘉華、唐寧、梁小冰 
《童話戀曲 201314》演員：蘇永康、廖碧兒、關楚耀
《第二人生》演員：雷有暉、趙學而、劉浩龍 
《警界線》演員：廖啟智、林嘉華、唐寧 
《三面形醫》演員：林文龍、姜大衞、艾威
《開腦儆探》演員：黃日華、盧海鵬、林嘉華 
《客家女人》演員：張可頤、劉美君、高皓正 
撰文：娛樂組
攝影：攝影組
留言列表
