close


首次到科大演講的霆鋒，表情多多，並以幽默形式講talk，令原本嚴肅的講座變得輕鬆。

真心話

三十而立，謝霆鋒八年前賣樓套現千萬，創立「PO朝霆」後期製作公司，在廣告界打出名堂，反叛男孩搖身一變為CEO，創業路更被科大選為教材。上週四（四月十九日）他應邀出席演講，向一眾工商管理碩士學生，分享成功之道。席上霆鋒大講撞板經歷，其間還被科大校長一條問題「腰」中，對住幾百學生，坦承擔心兩子Lucas同Quintus，因父母名氣，將來的路更難行。

認有壓力
上週科大舉行「ASIAN LEADERSHIP SERIES」講座，由謝霆鋒打頭陣，原本只容納四百個座位的演講廳，事前吸引了超過四千名科大生爭崩頭報名參加。當晚霆鋒以筆挺西裝現身，一進場即引來學生起哄，紛紛拿出手機拍照，講座一度變成fans聚會。整個演講，霆鋒均以英語對答，攞過影帝，見慣大風浪大場面，但首次以CEO身份，對住一眾學者及學生演講，霆鋒公開認壓力大。「我好緊張，平日見慣幾百人嘅場面，但面對一眾學者同學生，我覺得好大壓力。」講完隨即《逆戰》上身，裝作攞住機關槍手勢搞爛gag：「若果一陣你哋（學生）問得太尖銳，我就逐個砰，砰！」又問現場人士：「有邊個覺得自己係成功，請舉手？」不少師生舉手後，他又抵死說：「有幾多個係講緊大話？」完全掌握到現場氣氛。

起步碰釘
謝霆鋒創業，由起初得幾名員工，發展至今日過百人手，上海北京均有分公司，每年逾億的生意額，看似順風順水，但他坦言有碰釘時候。「當時太想快啲成功，太急進，無睇清楚買咗批二手器材返嚟之後，發現其中一啲係壞嘅！」他提醒年輕人創業要有冒險精神外，亦要給自己後着保障。「外界講到我好似將全部資產抵押晒用嚟創業，其實唔係咁！創業唔係搏到最盡無後着，我係打晒底，事前搵定一啲客源先開始。當然，人哋唔會因為你係霆鋒，就俾生意你做，要留到客，就要用心做好每件事。」

雙重包袱
講座尾聲，學生自由發問，大部分問題只環繞創業路，毫不尖銳。直至最後一個問題，由科大校長陳繁昌發問：作為明星二代，背住父母之名打天下，是否一個沉重包袱？被「腰」中的霆鋒沉思數秒回答：「係嘅！喺我十六、七歲時，我好抗拒謝霆鋒呢個身份，幾年後先完全接受呢個事實。我依家反而擔心兩個仔，因為我父母只係喺香港有名，但我喺中港兩地都有名，我怕佢哋將來要承受雙倍包袱。」講座主題不涉及家事，但霆鋒卻賣大包，把曾送給長子Lucas一歲生日的自拍短片與科大生分享。數分鐘片段全是他在多部電影中，親身上陣的危險動作，包括在大廈外倒吊、飛身撞巴士等，片尾則有一段給兒子的說話，大約意思是：「我咁搏，無非為你嘅將來有個保障！」事業成功加上慈父包裝，三十一歲謝霆鋒換得在場幾百師生激賞。

講座晒溫情
霆鋒在席上播放早前他慰勞員工，在菲律賓包島玩的片段。當中除有穿黑背心的他凸出個大肚腩與員工打成一片外，還有他整蠱老豆潑冷水的溫情場面。


之後在講座與眾分享他送給Lucas一歲生日的片段。內容是他在電影親身上陣的危險動作場面，然後片尾給Lucas的簡單說話，道出為父的他，拼搏工作，只為兒子將來的保障，好多科大生睇完都話好感動。 ####


坐在霆鋒身旁的科大校長陳繁昌（左二），向霆鋒最後發問，為講座掀起高潮。


霆鋒坦言擔心兩子Lucas同Quintus，要承受明星父母所帶來的雙倍壓力。


校方知道霆鋒鍾意飲可樂，所以一早為他預備，台上三個學生都只係飲水。


開場前，霆鋒在後台跟三位訪問他的學生傾吓細節，首次講talk，從表情睇就知他有幾緊張。


反叛期十七歲的霆鋒入行不久，曾因與公司鬧意見而逃返加拿大。又試過在《勁歌》彩排時舉中指，十足反叛少年。


生性期 ○二年捲入頂包事件，令父母憂心。官司甩身後他不再任性，乖乖在內地打拼搵人仔，賺錢買樓買鋪。


穩重期婚後榮升兩子之父，霆鋒顧家形象有增無減。就算去年離婚，對其形象亦無損害。


收成期眼見自己一手創立的「PO朝霆」廣告及後期製作公司，經營八年在市場站穩陣腳，去年趁喬遷之喜，才公開其CEO身份，率過百員工影大合照晒冷。


講座當日，無學生問霆鋒感情事。對於有指他被內地女星楊冪，到他酒店房拍門示愛一事，霆鋒事後向記者否認傳聞。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄