我得寵：黃幗頤愛狗唔愛B

【魔天使家族】■黃幗頤家有四隻魔天使，為她帶來不少歡樂。攝影：陳志嵐

動物的生殖能力的確比人強得多，港姐黃心穎胞姊、nowTV的主持黃幗頤（Scarlett）原本只有一隻雄性的魔天使，誰知替牠找了個伴後，馬上就由一變四，一家四口小狗包括爸爸Bacon、媽媽Muffin、囝囝Benedict和囡囡Mayo，雖然Scarlett說有點吃不消，但每當她完成工作後，回家有四隻可愛小狗熱情地圍着她團團轉，即使再累，也會感到無比興奮，她更說：「我一定唔會為咗BB而唔要啲狗，我寧願唔生。」
撰文：胡比

■頑皮的小魔怪最喜歡和主人玩波波。

黃幗頤從沒想過自己會養四隻狗，但自從兩年前她跟老公在台灣定居，她老公養了Bacon開始，就注定要擔起牠們這頭家，她說：「其實我係諗住養八哥，但我老公嫌八哥醜樣，佢見到Bacon係咁多隻狗之中最靜，所以就揀咗佢做我哋第一隻寵物。」但原來牠的沉默是因為患上抑鬱症，最嚴重時將自己腳上的毛全都咬掉，幸得Scarlett悉心照顧，才迅速康復。

■視愛犬如己出的黃幗頤不時跟牠們咀嘴。

狗媽媽意外懷孕

之後因為Scarlett要回港當nowTV主持，老公認為她工作時間較彈性，方便照顧小狗，所以Bacon便跟Scarlett回港，但回港後，她工作不斷，反而沒時間陪伴愛犬，她說：「成日得佢一隻狗喺屋企，所以咪想搵隻女陪佢，有朋友係開狗場，咪叫佢幫我搵隻狗女。」
Scarlett滿心歡喜等待Muffin到港，讓Bacon有個伴，可惜兩隻狗仔沒有一見鍾情，Bacon更嫌棄這個伴，Scarlett說：「Muffin細個好醜樣，Bacon一啲都唔鍾意佢，除咗生理期Muffin發情嗰陣，Bacon會好似個癡漢咁，係咁纏住同錫Muffin，但一過咗呢個時間，Bacon就會反面唔認人。」
Scarlett透露原希望兩年後才讓牠們生育，但在她出外公幹時，Bacon就搞大了Muffin個肚，她笑謂：「嗰時Muffin都未成年，得11個月大，不過有仔真係趁嫩生，睇下Muffin生咗兩隻都唔覺得佢身形走樣。」

■黃幗頤只要手上拿着小食，四隻愛犬即表現乖巧。

見證狗BB出生

Scarlett想讓牠們有更舒適的居住環境，所以要搬屋兼請工人，雖然這令她有點措手不及，但回想起Muffin生產的過程，至今依然令Scarlett很感動，她說：「因為做嘢，我唔能夠睇佢生第一個BB，要妹妹同工人幫手，但就趕到見證佢生第二個BB，除咗要安撫Muffin，仲要安撫Bacon，我以為狗會好似人生仔咁，個老竇會好緊張喺老婆身旁等候，點知原來係唔會囉，佢驚到想走又唔敢行埋去。」看到Miffin多辛苦也努力地誕下狗BB，那份激動是難以形容。

■黃幗頤表示狗仔抑鬱會自咬，所以要細心照顧。

原本Scarlett打算把小狗轉贈朋友，但最終也捨不得拆散牠們一家，決定負起這個重擔，她笑言：「四隻狗一齊去睇醫生，一齊沖涼，好容易就使過千蚊，但係返到屋企見到佢哋係咁圍住你錫，你就會覺得付出幾多都係值得，所以要努力啲賺錢。」因為家有四犬，令以前愛蒲的Scarlett變得深閨，她謂：「𠵱家啲朋友叫我出街，我都會叫佢哋不如嚟我屋企。」
提到生育大計，Scarlett皺皺眉說：「我屋企已經有咗四隻狗，如果再多一個BB都唔知點算，順其自然喇，但我一定唔會為咗BB而唔要啲狗，我寧願唔生。」