close


38歲的人生教練Winnie，明知手上的蔗寓意她「賣剩蔗」，她一於少理，拿上手當雙節棍般玩，還明言：「我唔以身作則，咁易嬲，咪打爛我嘅齋鉢。」

是非男女

熱爆全城的話題節目《盛女愛作戰》，愈鬧愈火紅，不論五位盛女，以至專業導師都被大起底，當中把口寸嘴，樣貌整過容的人生教練 Winnie，更是眾矢之的，先有「男人踭氣論」，被梁文道批評眼中只有錢，近日再被網友圍插，連陶傑都在節目質疑她，憑乜做人生教練。你有你插，我有我出位，三十八歲的港女Winnie，大大聲咁話：「係呀，我係八婆呀！」

 

有乜資格
比起五位盛女參加者更盛女的Winnie（梁穎妍），一開聲如機關槍般，尤其講起她做了六年的人生教練 （Life Coach），「我從來不會接受單對單訓練，今次在節目中是破例。」單身的Winnie被指能醫不自醫，她強調：「我唔係教人溝仔。」講資格，在加拿大約克大學心理學畢業的她，○四年開始接觸Life Coach，跟師傅學滿師，才開班教人，「我係無呢方面degree，但我師傅話我得。」 Winnie口中的Life Coach，是提升自我的訓練，過程中會話你知，究竟你有乜問題，聽落空泛，但這類課程確實又搵到食，一個課程收二萬幾元，一班起碼十幾二十人，計落都幾和味，被指掠水？Winnie反駁話：「咁你哋（指傳媒）夠抽水啦。」儘管被質疑被鬧，Winnie明白愈鬧愈出名，她說：「人哋話我盛女、中女、醜女，等於叫我嗰名Winnie一樣，我一笑置之，就算鬧我八婆，係呀我係八婆，我認，咁點呀！」她還一臉自豪地說：「話我係港女，我覺得我係太后。」

談情說性
曾做名人版記者的Winnie，大呼上當：「見工時，嗰位主管話名人版好似Hong Kong Tatler，點知唔係，明明啲人係肥，要我讚佢又fit又靚，我唔得囉。」她不忘寸嘴說：「話我留在馬場唔走，sorry我自細就出入馬會，在ball場見到auntie和同學幾尷尬，做咗四個月就劈炮。」數工作經驗，Winnie更大騷quali，曾在摩根士丹利負責應付千年蟲，又做過旅遊雜誌開荒牛和廣告行業，自己又創業做室內設計，現在寫書寫blog，還開鋪賣美容產品。不過曾跟她共事過的同事，對Winnie的印象是個好有機心的人，「佢幾唔怕醜，仲好主動，是一個機會主義者，唔會放過任何識上等人的機會，佢英文好，只係鍾意同講英文啲人溝通。」有傳她對男女關係好開放，尤其與男同事出Trip。說起性，她大膽地說：「情到濃時個個都會有，無享受過瘋狂咁做，真係要檢討吓自己。」問她幾歲失身，她有保留的說：「幾多歲唔講，總之是成年啦！」對性觀念，她話慶幸阿媽教得嚴，「好彩阿媽教得嚴，唔係我都唔知俾人搞大幾多次肚。」

自知之明
對自己的家庭背景Winnie卻不欲多談，只透露家住跑馬地，父母是專業人士，中學畢業後隨父母移民加拿大，還有兩個姐姐，貪靚是來自家姐，「大家姐似章小蕙style，兩年前已過身，後來我開始寫美容先變扮靚精。」在Blog寫美容，口口聲聲要崇尚天然，為何要整容嫌自己醜？她不屑的說：「其實同去麥記食嘢，買件衫一樣咁普通，令自己靚唔得呀！」之後她又放輕語氣說：「睇相師傅話我，今年last call咪搏一搏囉！（唔怕破相？）硬要搵個理由，咪講吓笑，滿足下讀者求知慾。」曾炒樓賺過百萬的Winnie，對擇偶要求，一定唔可以窮過佢，還揚言男人送名牌手袋做禮物，是低層次。拍過七次拖，明言身邊不乏富二代朋友，但她卻不肯透露識得邊個。活生生的「港女」Winnie，舊年跟拍拖五年的男友分手，過兩年便四張的她，都咪話唔心急，最後一着，她認輸說：「我都唔排除搵Mei Ling幫手。」

嘉賓彈出位
其實為傳媒做嘉賓、顧問上咗位的case屢見不鮮，甚至有專業人士因此轉行或飯碗不保，真正有辣有唔辣。

關嘉美醫生
現年五十九歲的關嘉美，九八年開始以家庭醫生身份於各大報紙雜誌為大眾解答醫學問題，由於為人大膽豪放。由選擇胸圍內褲衞生巾及性行為體位問題，都有問必答，因而引起傳媒注意，頻頻接受專訪，甚至教人打扮、溝仔。終於○六年被同行指搏出位，要告上醫委會。現況：仍為雜誌寫專欄，並於旺角的診所應診，但已較以往低調。

李家仁醫生
六十歲的兒科醫生李家仁，八五年於商台節目《日日好時光》講解醫學常識，後被邀到電視台主持醫學節目。九二年開始與作詞人韋然合作創作兒歌，經常出現於兒童節目。現況：上年中推出新歌《小明上廣州》紅爆網絡，港鐵更以《小明系列》中的《小明遊深圳》作為港鐵深圳龍華線廣告的主題曲，業餘歌星身份仲紅過做醫生。

麥玲玲
原本為律師行文員的麥玲玲，跟林真學風水，九九年開始於風水網站與李丞責合寫專欄，未幾李丞責先彈出，為電視台講風水，並引薦麥玲玲予無綫，自此麥經常為傳媒解答風水問題及節目主持。現況：除了全職做風水師，更與組合農夫rap歌，拍電影，教瘦身，甚至接拍信貸財務廣告，掙錢能力極高。 ####


似我唔係呀！（設計對白）


網友批評她整容前似龍懷騫，整容後似胡杏兒。


上週一，《盛女愛作戰》舉行祝捷會，一班導師包括Winnie（後排右二）和Mei Ling（右一）齊齊亮相，但主角盛女們，就只有Bonnie（右三）一人。


去年Winnie在書展舉行簽名會，宣傳其《美肌瘦身秘笈》新書。


Winnie瘦咗又變靚咗，自信爆棚，即使說自己今年last call，但仍堅持擇偶條件，要又叻又有錢。


去年甩拖後，Winnie去韓國整容，將隆鼻及吊線變眼皮手術過程，在博客公開。


98年在加拿大約克大學心理學畢業的Winnie，是個闊面肥妹，旁為同校死黨股評人黃德几。


六年前Winnie在《港男港女》節目，講明要釣金龜，更說睇男人先睇對方對鞋是否名牌，被指拜金。


童年的Winnie是個男仔頭。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄