為求可以更快掌握最新內地節目資訊， Hailey經常留意有冇新影視 app上架，有就即刻安裝試用。 

CLOSE-UP

再見電視

上月中，無綫就免費電視牌照申請嘅司法覆核被駁回，香港電視股價即日爆升，股民有錢賺之餘，亦慶賀唔使再捱兩間免費電視台悶蛋節目。
不過，增發免費電視牌照仍然十畫未有一撇，所以唔少觀眾已經打破「慣性收視」，轉用手機、 tablet等新媒體睇外國同內地節目。
所以，真正嘅收視四六開，應該係講緊電視同新媒體。

極速下載

香港 CSL啱啱喺上個月宣布會喺六月推出全新 4G LTE服務，上網極速提升至 150Mbps，不過要支援 CAT 4制式嘅手機或上網裝置先用到。 

話就話 4G速度有 100Mbps，但只係「實驗室」數字，真正上網，超過 30Mbps已經叫好，但係都未必夠用嚟睇 4K片。不過，韓國 Samsung喺 5月中宣布已成功開發 5G技術，傳輸速度高達 1Gbps，就算一套 4K片有 100GB容量，都只係用分零鐘就可以 download完。可惜技術仲喺研究階段，預計 2020年先會推出。

不斷追劇

Hailey　 Now娛樂節目主播
終日機不離手，主攻內地劇集及綜藝節目，爆數據量已經係家常便飯。

打開 Google Play或 Apps Store，就有大量影音 apps下載。 

同 Hailey講內地劇集或者綜藝節目，佢有好多推介，「之前狂追《甄嬛傳》，呢排就鍾意睇《中國好聲音》、《中國星跳躍》，甚至《我是歌手》都有睇。」就連幾時有新一集， Hailey都一清二楚，非常緊貼「行情」。
狂煲內地節目，全靠喺手機裝 apps，「幾年前未有咁多影視 apps，只可以上 YouTube睇，不過更新得慢，一集隨時斬開七八段，睇得唔過癮。後來用『快手看片』，追劇就爽好多，不過而家已經冇得 download而要串流，有時唔太順，所以又轉咗用『千尋影視』，內地綜藝節目更新得好快，幾乎第二日就有得睇。」

雙機待命

拎兩部機出街，數據量更多之餘又唔怕無電。 

除咗屋企睇唔停，就連拍攝空檔， Hailey都唔放過。「最長氣嗰次係睇《步步驚心》，一口氣睇咗大半日。」睇得瘋狂，唔怕數據用量超標？「唔怕，因為爆咗都只會限制速度，咪用第二張 SIM卡睇囉，又唔會收多錢。」反而電量先至係頭號問題，除咗外置電池要隨身，一返到公司就要第一時間充電，「由屋企搭車返公司，睇新聞片都可以冇咗四成電，真係誇張。」難怪 Hailey要一手 Android，一手 iPhone，兩機喺手隨時候命。

睇戲揀平 plan

串流睇片的確多選擇，不過，如果用流動網絡睇，肯定好快用晒上網數據量。事關而家網絡商提供嘅無限上網 plan，一過咗 5GB公平使用數據量就會鎖速。以睇一集 myTV劇集為例，普通質素大約 75MB，每日睇兩集，基本上唔做其他上網活動都接近爆錶。如果真係會流動睇片，建議選用限速唔限量嘅 3G上網 plan，而家 SmarTone、電訊數碼、 3HK同中國移動香港都有類似服務，每月俾$80就得。不過，由於最高上網速度只得 384kbps，所以只夠睇普通質素片，而且間唔中會窒，叫做可以頂住煲劇癮。

快樂網片

上網煲劇、睇新聞已經成為大趨勢，雖然街訪嗰陣都仲有九成人有開電視習慣，不過單睇無綫、亞視節目已經滿足唔到觀眾，好多人會自己上網或用免費 apps搵高清片睇。邊啲「 channel」好睇？等街坊話過你知。

上網睇 MV

Whitney　 20歲　兼職模特兒

YouTube可以翻睇決戰一分鐘！ 

Whitney話由細用電視汁撈飯撈到大，以前唔理乜節目都睇，「不過而家啲劇又悶又老土，至多間唔中睇吓旅遊同綜藝節目。其餘時間會上 YouTube睇吓網友嘅化妝技巧，有時仲會睇吓啲外國 MV，好多都拍得好靚。」

全日不停播　音樂 MV吧

以韓國 MV為例，新 MV通常都唔會喺 YouTube播先，想第一時間睇到，可以用手機 app音樂 MV吧，入面收錄好多 YouTube都未有嘅新歌 MV。亦支援連續播放，唔使每播完一首再揀。

支援機種

新 MV任睇　 Music Tube

用 YouTube睇 MV都算方便，不過要自己搜尋，唔似得 Music Tube幫你搵埋最新 MV等你揀咁好用。入面主要以亞洲歌手 MV為主，包括韓國同日本，而且每日更新排名，知道埋時下邊首歌最 hit。

支援機種

電視迷

Jackie　 21歲　大學三年級生

仲日日煲緊 TVB 

「唔多同意啲人話電視台冇嘢睇，例如好多飲食節目製作都唔錯，有啲仲好有話題性，所以仲會堅持開電視，若果錯過咗節目，仲會上 myTV睇番添。」講到尾，咪又係曲線撐緊上網睇片。

煲劇精

Heidi　 21歲　文員

煲晒日、韓、台劇，未夠喉先睇本地劇。 

「好鍾意煲劇，幾乎乜劇都睇，不過近年電視台嘅劇種愈來愈少，劇情又千篇一律，所以轉咗上網搵劇，好似近排喺 PPTV睇咗幾套台劇，劇情都幾豐富，啲景仲冇咁死板，真心 Like！」

日迷至愛　千尋影視

至於追開日劇，就建議裝埋手機 app千尋影視，雖然大部分劇同開迅視頻差唔多，但日劇比較新，包括日本播緊嘅《神探伽利略 2》同《最後的灰姑娘》，哈日迷點少得。

支援機種 

韓台必追　開迅視頻

追外語電視劇好多人都識裝 PPTV，不過近期日劇消失晒，台劇又唔夠新。反而開迅視頻就追得貼好多，例如最近先喺韓國電視做緊嘅《 TEN2》同台灣版《原來是美男》都有，仲可以下載落手機睇，煲劇必裝。

支援機種

電影狂熱

黃小姐　 21歲　大學二年級生

電視台追唔上觀眾要求 

上網睇片，最大好處係好多電影都免費睇，黃小姐話有時會發現另類好嘢，「可以依照自己口味搵片睇，唔使硬食電視台啲節目。最緊要係本地電視台根本追唔上潮流，好似近年好興嘅微電影，電視台根本唔會播。所以經常上 vmovier網站搵片睇，最近就睇咗齣法國微電影《調音師》，簡直正到爆！」

以質取勝　風行電影

vmovier主要都係得微電影睇，想睇大路戲，裝手機 app風行電影好過。除咗電影數目夠多，仲有得揀高清播放，就算用全高清屏幕睇都唔會起格，值得一睇。

網頁版： http://www.funshion.com 

支援機種 

漫迷最愛　動漫視頻

日本動畫可以話係宅男嘅精神食糧，專睇動畫嘅動漫視頻，唔單只選擇夠多，播放起嚟亦夠順，唯一缺點係冇得下載落手機，一定要串流睇。

支援機種

直播睇波　 A直播

入面有齊足球、籃球等熱門體育嘅新聞，仲可以連結到相關網頁睇精華片段，雖然大部分都係國語旁白，不過都算唔錯。另外，亦可以睇到大陸唔同地區體育台直播，球迷最啱。

支援機種 

串流靚畫

而家提供串流睇片嘅網站或 apps，唔少都支援全高清（ 1920× 1080）畫質，不過隨住 4K（ 4096× 2160）解像度電影同埋影視器材開始普及，未來嘅串流影像趨勢，一定係愈玩愈大。由於 4K畫質比全高清靚四倍，容量要求亦同等提升，以一套全高清電影為例，約需 25GB容量，而 4K就要 100GB。
根據美國串流影像供應商 Netflix、 Hulu、 Vudu嘅網站指引，播全高清片嘅網速要求，傳輸率約需 3.2至 9Mbps， 4K嘅話就要 12至 36Mbps，理論上 4G流動傳輸技術（ 100Mbps）都應付到。

輪流煲劇

阿東　雜誌編輯
玩影音近廿年，由雷射碟玩到藍光， 2.1玩到 7.1，屋企裝修都要跟足戲院格局。

阿東已習慣用 Android機頂盒煲劇睇戲，比起由電腦下載慳番唔少時間。 

阿東玩影音有幾瘋狂？兩年前結婚買樓，三房單位怒改成一房（約六百平方呎），只為擺放 120吋投影幕、投影機、 7.1聲道環繞聲喇叭，擺位更要跟足 THX規格。裝修亦講究過人，客廳（其實即係播放室）要裝兩道門隔音，牆身亦有雙層設計，器材連裝修已花近七十萬。
豪花萬金買器材，以往只用嚟播高清電影，自從老婆愛上用手機 app煲劇，就令阿東開始接觸 Android機頂盒，「第一部買嘅 Android機頂盒只係七、八百元，裝個 PPS app，就可以用投影機睇埋韓劇同內地劇，雖然係串流播放，不過都算清同唔窒，真係好方便。本來諗住俾老婆追劇，點知搞搞吓連我都睇埋一份。」

方便為先

7.1聲道喇叭足以媲美戲院，不過睇串流影片，阿東就話大材小用。 

作為影音發燒友，阿東開始對 Android機頂盒有要求，「成日上網睇其他人啲試機報告，見人哋讚部機好，又心思思走去換。上個月換咗部小米盒子，外形靚過晒其他 Android機頂盒，雖然裝 apps比較麻煩，不過小米好有心機，介面整得好靚又易用，連遙控器都型過人。」
既然阿東玩開「高等影音」，點會接受到網上串流影片質素？「講質素當然同藍光碟冇得鬥，因為影像數據壓縮得太緊要，畫質會變得好粗糙，暗位起晒格仔，而且亦冇聲效可言，只可以叫做有聲囉。」鬧歸鬧，不過方便壓倒一切，加上藍光碟始終唔平，阿東話而家會揀最鍾意嘅戲先買碟嚟儲。

畫靚聲差

用小米盒子串流影片，畫質只算 OK，以 120吋投影播放，現場睇其實起格情況幾嚴重。 

其實阿東之前都試過喺 iTunes買戲睇，因為見電影有 1080p高清格式，「的而且確 iTunes高清片源係清好多，不過聲效方面都仲未得，價錢亦唔算平，都要成百蚊，喺 iTunes買不如俾多少少買隻 Blu-ray碟啦，可以有埋 Dolby TrueHD、 DTS-HD MA音效，抵過去 iTunes買好多。」

俾月費任睇

林永君與賀志娜話而家已經有廿萬人用緊 Anyplex，好有信心遲啲冇人會再買 DVD返屋企播。 

有 Netflix、 Hulu、 Amazon Instant呢類影片點播服務網站，外國人一早習慣唔睇電視台節目，打開 tablet或 smartphone，㩒兩吓就有戲睇，自己話事，唔使硬食電視台播完又播嘅陳年舊片。
香港亦有類似服務，俾$60月費可以任睇喺戲院啱啱落畫嘅新戲，平過入戲院。

多渠道播放

開 app後登入完就可以揀戲 

㩒入 Anyplex嘅網頁，發現落畫唔係好耐嘅《孤星淚》同埋《貴族孽緣：安娜．卡列尼娜》，已經有得睇， Anyplex總經理賀志娜話，「目前片庫總共有五百套戲，一半港產一半荷李活，無論 iOS定 Android，手機定 tablet，裝咗我哋個 app，俾月費就睇晒片庫入面嘅戲。如果堅持想喺電視機播， Samsung同埋 LG嘅 smart TV可以裝 app，其他電視機亦可以駁 Android機頂盒，一樣用到我哋嘅服務。」

高清畫質

之前試過喺便利店同埋租碟店賣點數卡，$10就睇到《那些年，我們一起追的女孩》。 

價錢夠晒平，但質素又如何？現場喺部 Samsung電視機開套《孤星淚》嚟睇，同睇 Blu-ray冇分別， Anyplex行政總裁林永君話，全因香港網絡夠發達，「屋企寬頻好多已經光纖入屋，喺網上串流成套 1080p片去屋企部電視， bandwidth絕對夠用，我哋試過將 3D戲串流，一樣冇問題，所以嚟緊會有埋訂 3D戲嘅服務。手機同 tablet暫時得 720p解像度，我哋都知而家開始有 1080p高清手機推出，嚟緊都會將解像度升去 1080p，有 4G網絡，串流全高清片唔係問題。」
畫面解決到，唯獨係聲音仲差少少，「呢個唔關 bandwidth事，因為一套戲入面，聲音佔嘅 file size唔夠一成，串流 7.1音效係冇問題，但係屋企電視要經擴音機先做到多聲道，中間涉及嘅解碼問題，目前靠 app仲未做到，已經同 Dolby傾緊，佢哋有方案可以幫到手，遲一步可以加埋落個 app度。」

睇 News

Shoryi　 18歲　中六學生

睇新聞都唔睇本地電視 

訪問咁多個街坊，得 Shoryi一個完全唔睇電視，「屋企部電視似擺設多過電器，因為啲節目限時限刻播，要夾時間先睇到。有時間都寧願上網睇新聞，睇開 Fox電視台嘅網上新聞 channel，啲節目資料又詳盡，製作又細心，唔似得香港幾個免費電視台咁是是但但。」

緊貼時事　 Now新聞直播

想串流睇直播新聞台，又唔想睇「是是但但」互動新聞，可以揀 Now新聞直播，即時睇 332now新聞台，等你緊貼時事。

網頁版： http://www.now.com 

支援機種 

夠多元化　 i-cable.com流動版

Fox始終都係外國新聞多，想知多啲香港新聞，揀 i-cable.com流動版好啲，有齊時事、娛樂、財經新聞節錄，唔係有線客戶都睇到，一個 app就睇晒咁多種新聞。

網頁版： http://www.i-cable.com 

支援機種 

版權誰屬？

買地區版權，由於係同當地電影公司傾，提供串流嘅電影已配好字幕。 

將電影數碼化，最擔心係版權問題，林永君話荷李活電影通常會提供兩種選擇，「一種係直接同電影公司美國總部傾，買國際版權，即係話任何地方嘅用戶都播得，蘋果 iTunes Store賣嘅電影就係呢種，但係版權費好貴，同埋冇中文字幕。」林永君揀嘅係地區版權，「呢種係同電影公司嘅當地代表傾，買返嚟嘅戲亦只可以喺當地播，勝在夠平，兼且有字幕，同埋靈活度大啲，例如嚟緊我哋嘅服務會喺新加坡同埋台灣推出，有香港區版權，只要加少少錢就可以買埋其他亞洲地方，慳好多。」
不過無論係國際定地區版權，多數冇得傾獨家，「好多戲 STAR MOVIES播得， HBO亦播得；網上平台亦一樣，電影公司拍咗套戲，梗係想多幾個渠道幫佢賺錢。」咁即係 Netflix一樣可以嚟香港爭飯食？「係㗎！但係你睇 iTunes Store，國際版權費貴，定價要成$40一套戲，就算 Netflix嚟香港，情況都係差唔多。」

text：科技組
photo：攝影組