在家中休養的雷 sir，一啲都唔擔心對眼，仲話：「我識好多人由細到大都睇唔到嘢，一樣可以做好多事。」（嚴寶權攝） 

中環人語

雷賢達　眼勞損

特首戰時，仆心仆命撐 CY嘅「基金教父」雷賢達，選後不獲 CY重用，主力做回老本行，𥄫實個市。睇人嘅眼光小宗唔敢評論，但佢對眼近日真係有事，何解呢？原來一直有幫雜誌寫專欄嘅佢，早輪竟然半挨半瞓喺屋企嘅床板，用佢部 BlackBerry打稿，由晚上十一點打到凌晨兩點先瞓。

咁就出事了，第二朝起身，雷賢達發現兩隻眼睇嘢時都矇咗，眼前嘅影像仲喺正中間多咗條線！佢回憶起時仲樂觀咁話：「我會唔會盲呢？我見街上都好多盲嘅小朋友，咁盲都唔緊要啦！」睇醫生，先發現係眼神經勞損。原因係長期用神兼姿態不正確，要喺家中休息幾個月先可以重出江湖。佢話當時打稿時，已將 BlackBerry調校到最大嘅「 font size」，今次後，「會換一個有大啲熒幕嘅 BlackBerry！」在此小宗祝願雷賢達早日康復，揀股嘅「眼光」繼續銳利！

中銀香港要割席

上期封面，提到特首頭馬張震遠嘅商交所，爆煲前是透過中國銀行進行借貸融資，今年四月被閂水喉，可能是北京背後發功。報導出街後，中銀香港傳來電郵，指「商交所並不是中銀香港的授信客戶」，要求本刊「更正有關報導，以正視聽」。今次中銀香港高調撲出，有別於銀行拒絕披露客戶名單的慣常做法，可見其決心要跟商交所劃清界線。
中銀香港指商交所並非「授信客戶」，卻沒有提及整個中銀集團（留意是中銀「香港」）、也沒有觸及時間、更沒有指出可有「普通客戶」關係。至於商交所大股東（持有百分之五十六股權）、張震遠的離岸公司新效控股，又是否中銀香港的客戶？答案亦只是「並非授信客戶」。
其實兩週前，本刊報導張震遠搭棚上位之路，曾提及他的新效控股，在梁振英選舉期間的二○一一年十月，曾向恒隆地產支付七十九萬元租選舉辦公室經費，有關支票屬中銀香港，並由張震遠簽名，可見新效的確是中銀香港客仔。小宗提醒一句，中銀香港如有疑問，可到選舉事務處翻查公開記錄。
講開又講，樹倒猢猻散，商交所再有兩名董事跳船，包括港大經濟學講座教授王于漸，以及俄鋁母公司 En+ Power首席執行官 Artem Volynets。

商交所大股東新效控股，向恒隆地產支付梁振英選舉辦公室七十九萬元租金，開出支票屬中國銀行（香港）有限公司，並由張震遠簽名，令中銀捲入風波。 

Give me a break　中環踢毽黨

今期 Give me a break真係講 break。中環歌賦街與善慶街交界的樓梯口，每日 lunch break，都會出現一班踢毽黨，年齡由三、四十歲到七、八十歲都有，除非打風落雨，否則總是很有默契地每日一點半，老地方見。上週五，阿馮準時到達樓梯口，原來這班踢毽黨都是在歌賦街做印刷同電子，早在八年前，八十多歲的黨魁「阿公」因為喜歡踢毽，就牽頭成立踢毽黨，「最多有成七、八人㗎，今日太熱啦，得番三丁友！」
時乃三十三度、酷熱警告下，三丁友無視灼熱的陽光，準時開波！三十多歲的印刷馮，是黨中年紀最輕、最有表演慾的一個，毽一到腳就忍不住使出渾身解數，先是頂頭鎚，再用膝頭推，用腳內側調整好位置後，一個轉身用腳底抽射，流暢的一連串有姿勢有實際的動作，連隔籬法國餐廳 On Lot 10的食客，都時常駐足睇表演。
另一邊，電子謝亦不甘示弱，用手一擋，一個「蠍子腳」再一個「橫刀斬」，殺印刷馮一個片甲不留，原來電子謝已經七十有一，依然寶刀未老。大半個鐘後，三丁友的衫已濕到滴水，如果每日一個運動 break，相信日日坐 office的 OL要肥都難！

夏日炎炎仍無阻踢毽黨的雅興，三丁友中印刷馮（左一）最鍾意「衝力射毽」，攻擊七十一歲的電子謝（右一）。（陳浩樂攝） 

印刷馮在黨中年紀最輕，最愛個人表演，用盡腳部每個地方去踢毽。 

本週大寶號　白鴿眼股票行

阿 Sir上堂，嫌班嘩鬼嘈，大喝一聲：「 Be quiet！」
開證券公司，理應不論貧富，有客無類至啱㗎，冇理由喝人要有錢—— Be rich——至好上嚟噃。打開門口做生意，使唔使咁白鴿眼吖！

本週體育會　發展另類傾向

各位家長，你會放心俾貴子弟入個叫 Sportass嘅會嗎？入咗呢個會，你又擔唔擔心貴子弟會發展出另類傾向呢？

金牙大狀講嘢　用家支持樓市

鬍鬚曾再上立法會唱淡樓市。若果有用家支持，出口術又止唔止到咳呢，又？（羅國輝攝） 

鬍鬚曾到立法會講樓市，話供樓負擔達入息中位數的 56%，高過 50%的安全水平。
量化寬鬆、利息處於歷史性低水平，供樓負擔高，顯非資金成本高以致買家捱貴息之過，而是樓價升勢勁過薪水加幅所致。果如此，難怪石禮謙議員直斥鬍鬚曾「管理需求」之加強版雙辣招冇料到矣。
當然，鬍鬚曾可以反駁：若非推出 SSD及 BSD，樓價可能升得仲勁。實情係咪咁，冇人知。然而推出雙辣招後，樓價只輕微下跌 0.7%，基本上紋風不動，故此辣招冇令樓價回落係不辯嘅事實。
樓價唔跌，基本原因係炒家有本事坐貨。除咗利息平，更加係因為單位租得出，幫輕坐貨成本。單位租得出，即係樓市最終有用家支持。果如此，鬍鬚曾再出口術又有用咩？

中環人語迷你版

“我一知半解下，就把「斯德哥爾摩症候群」寫在電郵裡。”

估中邊個中環人講呢句說話，送你 JWATCH J-37尊貴版藍寶石鏡面限量版手錶一隻有意參加者，請於六月十日 24:00前將答案電郵 mailto:centralman@nextmedia.com小宗只接受電郵，郵寄免問。

本刊員工及直系親屬不得參加。為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於一三年六月十三日本欄揭曉。

上週人語揭曉

“對比反國教十二萬人，呢五百人只係九牛一毛。”

答案：黃之鋒
得獎者： Wong Sau Nam
中獎時間： 1:00pm 29/5/13

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp： 6829 5929