close


OK，買得起！（設計對白）（《蘋果日報》圖片） 

今期流行

袋細價貴

擁有 Hermes的 Birkin手袋，已成為上流社會阿太的身份指標，但隨着近年強國人加入搶爆，不但價錢炒到飛天，仲要經常在不同場合撞到正。
一班潮太即時轉軚，改捧 Hermes的 Kelly手袋，尤其愈細愈珍貴，數萬元至數十萬一個、貨量更少的 Mini Kelly和 Kelly Cut手揸包，更成潮流大熱，真正一袋難求，拎住佢哋現身社交圈，夠晒面子！

劉嘉玲


（《蘋果日報》圖片） 

阿姐級數的嘉玲，早已快人一步用紅色四萬多元的 Togo皮 Mini Kelly，之前她在澳門買埋黑色 Box皮，劉嘉玲客套地說：「其他人可能要等，但 Hermes好照顧我，不用我等好耐。」她的名氣，早已駕馭牌子本身，最怕將它奉若神明，「其實衫或袋係用來幫我，點會掉轉頭要我去照顧；況且我真係用家， Mini Kelly好用又輕巧，唇膏、粉盒都夠位放。」

楊婉儀

主力湊女的前港姐楊婉儀無閒情逛街，身上的裙、袋、鞋都是丈夫送的神秘禮物，「老公（王瑞勳）好喜歡 online shopping，兩年前我睇雜誌時講過鍾意，後來他就上網訂；好多 clutch真係太細，電話要拎住好唔靚， Mini Kelly好在連銀包、電話都放到，非常方便。」

李嘉欣

人人搶袋爭崩頭，闊太李嘉欣卻說是可有可無！她買的鱷魚皮 Mini Kelly年年升值，最新售價盛惠廿四萬，「幾年前在日本行街時見到就買，講真呢個手袋是擺多過用，因為有太多 choice等住我，又有其他牌子送袋俾我呢；你話好多人用呢個款，咁每個人 character不同，氣質又不一樣，手袋是用來襯我，多過用來襯衫。」

伏明霞

做了香港闊太的伏明霞，衣著打扮無跟住本地太太團般花枝招展，每次孖前財爺老公梁錦松去 ball，總是獨沽一味黑麻麻，唯有手袋會偶然跟風，這款廿四萬元的鱷魚 Mini Kelly，她就大膽揀買紫色，為她的娘味挽回不少分數。

龐董晶怡

保良總理龐董晶怡幾年前趁 Mini Kelly未當紅時已在巴黎入貨，但原來她不太喜歡皮製 clutch，「手汗多嘛，最近我鍾意用 playful夠 cute嘅款，好似 Chanel、 Valentino、 Charlotte Olympia，但 Hermes款式經典不過時，諗唔到用邊個手袋時， Hermes實無錯。」

梁安琪

四太梁安琪著衫夠多元化，無論是充滿少女味的 Miu Miu、 Prada，抑或富泰高貴的 Valentino和 Chanel，她都敢於嘗試， Hermes的紅色鱷魚皮 Mini Kelly她又怎會放過？點知佢話：「我好求其㗎，我最唔識襯衫，無乜心得。」問她手袋是在香港還是巴黎買入？用 Hermes似用膠袋的她說：「我有咩（呢個袋）？我唔記得啦。」

Mini Kelly

Mini Kelly是 Kelly家族的後起之秀，售價由四萬多至廿多萬，袋身用皮有矜貴的鱷魚、蜥蜴、鴕鳥皮，售價較相宜的有 Box和 Togo皮等。

吳婉芳

馬主胡寶星新抱吳婉芳打扮保守確有點悶，稍一不慎好易睇漏眼她手上的紫色 Mini Kelly，而且仲要係鱷魚皮，不貴不買。



吳婉芳囡囡拎阿媽個四萬多元 Togo皮 Mini Kelly，一點不覺老氣。 

郭羅桂珍

莎莎老闆娘郭太近年成為 ball場常客，在法國買的五十多萬鑽石釦 Kelly Cut，撞袋機會當然少了一大截，「我都知好多人用呢個袋，但用來襯衫就無所謂啦。本來我在法國見到個翠綠色，但都係揀個襟興的黑色。」

Kelly Cut

Kelly Cut將 Kelly袋變奏成長身手揸包，更適合一班闊太去 ball或夜蒲；不過喺 Hermes買袋唔係有錢就得， VIP每年限買兩個袋，又或要買衫先恩准閣下買一個手袋咁多囉！

薛芷倫

著慣華麗衣裳的 ball后薛芷倫，早在廿年前已是法國 Hermes總壇的熟客仔，無論什麼皮、色、款，只要她一開口，都乖乘寄到手上，五萬多元的 Kelly Cut已有橙、紅 Togo，約十五萬的黑色鱷魚皮亦有一個。「今年興熒光色，所以我又拎出來用，黑色鱷魚皮晚上去食飯夠高貴，去 clubbing用又得。」 ball后講明 Kelly又 come back，「佢比 Birkin輕身又可上膊，如果你有 basic color，不妨買 fun color襯衫。」

甘比

想知 Hermes出什麼款，只要留意大劉的女人便一清二楚，據知無論是香港或巴黎的 Hermes，一有新貨即通知大劉，這位超級 VIP更不受 quota限制，袋要幾多有幾多，好似佢女友甘比手上約十五萬的卡其色鱷魚皮 Kelly Cut，當然隨手可得。

黎姿

嫁給富商馬廷強後的黎姿，出入低調但衣著打扮愈見富貴，婚後幾乎只拎 Birkin手袋，鱷魚皮 Kelly Cut佢又點會放過？不過據知當年有人不識泰山，將別人送她的紅色 Hermes Birkin袋拿去米蘭站套現呢。

徐巧嬌

Moiselle老闆娘徐巧嬌多穿著 executive look，返工或飯局應酬，一個黑色鱷魚皮 Kelly Cut便最百搭，「 Hermes個釦是永恒同一個款永不過時，襯任何衫都不會出事。」別人要排 waiting list，她當然不用，點解？「我同老公的辦公室是用 Hermes傢俬，我估唔使我再買衫先有袋啩。」


撰文：名人組

arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄