close
同你吟一吟
伍詠薇贏民心
連周潤發都話睇唔明嘅《金枝慾孽貳》終於播完，埋單二十點，數字理所當然，不過更加合情合理係上星期五（五月三十一日）班演員約食飯睇大結局，鄧萃雯繼續冇影。
逢飯局必到嘅伍姑娘伍詠薇，鬼咁風騷帶埋老公一齊嚟，見佢隻手包住紗布，伍姑娘話係舊患，佢帶埋劇中做佢近身宮女嘅潘曉彤一齊去睇跌打，點知對方隻手仲傷過自己，伍姑娘忽然有骨：「你睇吓！跟親我都冇好結果！」
伍姑娘暗踩鄧萃雯，但有份嚟食飯嘅監製戚其義，就擺明鬧雯女。提到雯女同編審周旭明隔空罵戰，阿戚有火：「個劇出街唔夠一個禮拜，絕對係對個劇傷害好大，對其他演員唔公平，黃德斌有呢個反應都好正常（微博寸雯女係「偽人」）」。
大家槍口一致，飯局上人人都爭住黐實伍姑娘，就算輸收視，起碼贏咗雯女冇嘅民心。
戚其義終於開腔插鄧萃雯，跟伍姑娘同一陣線。 
同樣有嚟睇大結局嘅蔡少芬，知道連發哥都睇唔明《金枝貳》，死撐話：「睇唔明唔緊要，有睇我演出就得嘞！」 
撰文：八珍
全站熱搜
留言列表
