壹號幹線

GT夢•成真

由細到大，賽車遊戲幾乎是每個男仔的「奶媽」，全部飲賽車 game奶大： Out Run、 Datyona USA、灣岸、頭文字 D……等經典賽車遊戲（隨口數得出三五個）。
十五年前， Sony推出簡稱 GT的 Gran Turismo賽車遊戲，掛上「超高像真度」招牌，扭轉賽車遊戲玩家的「生態」，砌車？毋須再落機鋪，匿埋屋企已經可以砌餐飽。
好了，砌足十五年，得個桔？
其實 GT由賽車遊戲，早變成賽車手溫室，○八年推出 GT學院（ GT Academy），招攬歐美各地 GT車手網上砌車，優異生更「拔尖」，成為真正賽車手。
最新一集《 GT6》，專誠於英國銀石賽車場舉行發布會，雖然話新車更多，仲加入英國銀石賽車場等新賽道，之不過，你同我的 GT夢呢？簡單好多，就是想早點有得玩，拜託拜託。

一人畢業

今次《 GT6》發布會（五月十六日），竟然有五位車手現身會場，查實是 GT學院畢業生，打機打到變真正賽車手。
GT系列一推出已掛上「 Real Driving Simulator」招牌，更於○八年同日產（ Nissan）開辦 GT學院（ GT Academy），只要由網上下載由「 GT之父」山內一典親自打造的八個關卡，成績最好的學員，就由日產接手，進行正規賽車訓練。
GT學院易入難出，多年來「入讀人數」超過 200萬，直至上年，只得五個人畢業，「大師兄」是西班牙人 Lucas Ordonez，○八年成為全校第一，得到「實戰」機會。「贏完本土預賽，仲要飛嚟英國銀石賽車場，同其他國家學院車手用真車再鬥足五日，贏埋先算真正畢業。」今次《 GT6》發布會上，仲特登邀請歷年畢業生，齊齊玩真實與虛擬的銀石賽車場，在近百多位中外傳媒前，直接 show off。
由虛擬轉玩真車， Lucas亦無令人失望，○九年首次落場，出戰杜拜 24小時耐力賽，順利完成賽事。翌年轉戰歐洲 FIA GT4盃（請勿誤會，此 GT4並非 Gran Turismo 4），仲拎埋第二名，上年更拍住山內一典做隊友挑戰德國紐布靈耐力賽，簡直是全球 GT迷偶像。
成功背後， Lucas話之前每日都要操兩個鐘 GT，直情將 GT當真車，設備方面，軚盤腳踏自然成 set有齊，「點都不會用手掣玩吧？」

五位 GT學院畢業生率先玩《 GT6》，激劈銀石賽車場，最佳圈速造出約 1分 18秒，犀利。

上年「 GT學院車隊」挑戰德國紐布靈耐力賽，拎埋分組第一名，同為隊友的「 GT之父」山內一典，跟 Lucas攬埋一堆慶祝。

幾位畢業生於發布會後，變身做「司機」，載各地記者以時速超過二百公里「暢遊」銀石賽車場。

未入場，先由多架 GT中的名車列陣歡迎，點會想到當年的「揀車」畫面，竟然變成真實，各地近百名記者，一於少理，影餐飽。

亞洲分校無車揸

去年 GT學院首次開放包括香港的亞洲區（之前只得歐、美地區）賽事，不過就算鍊贏亞洲無敵手，獎品亦只是飛去日本跟其他高手玩 GT，不似得歐、美冠軍，有機會成為真正賽車手。
今年亞洲區 GT學院詳情仍未公布，睇怕都要等今個月美國 E3遊戲展先有消息，而入場方式相信同去年一樣，於 PSN下載就玩得。查實，玩法其次，最希望當然是亞洲分校可以「升格」，贏出有得落場鬥真車，先更加有心機比賽。

真實與虛擬之間

香港玩家們，賽車手夢暫時未有得發，不過玩 GT6的夢想，可以在今年第三季實現。
發布會當日，大會提供 demo機供傳媒試玩，雖然只得銀石賽車場，但大會先安排傳媒玩 GT6，再由 GT學院車手們落場，載傳媒於真實的銀石賽車場兜圈，體驗真實與虛擬之間的分別。

話說 GT6合共有近 1200架車，遊戲推出後，可透過網上追加新車種。

以全新物理引擎打造輪胎及懸掛系統效果，不過試玩版未太感受到新表現。

同以賽道視點播放，第一眼應該好難分得出 GT6與實景，答案：左是實景、右是 GT6場景。

每個組件由零畫起，再逐層加上，認真程度幾乎拍得住真正車廠。

累銷七千萬

GT系列推出已經十五年，除了主要五集，計埋 GT4/5 Prolouge、 GT Concept及 PSP版等，累積銷量達七千萬套。

《 GT》
雖然只有 150款車種，但模擬真實的駕駛模式，已打破當時賽車遊戲極限。
推出時間： 1997年
銷量： 10,850,000套

《 GT2》
PlayStation 1年代最後一集 GT，加入 Rally比賽及大量零件更換。
推出時間： 1999年
銷量： 9,370,000套

《 GT3 A-Spec》
移植至 PlayStation 2，畫面質素大提升，車種則加入林寶堅尼及保時捷。
推出時間： 2001年
銷量： 14,890,000套

《 GT4》
比原定時間遲了近一年半先至面世，首次出現香港賽道，並加入拍攝模式。
推出時間： 2004年
銷量： 11,730,000

《 GT5》
首次踏上 PlayStation 3平台，畫質再度大躍進，新增網絡對戰及 3D顯示。
推出時間： 2011年
銷量： 10,660,000套

不排除現身 GT6 Volkswagen Design Vision GTI

在奧地利 Reifnitz舉行的第 32屆 GTI-Treffen（即英文 GTI-Meeting）內，福士展出仍處於概念車階段的 503匹 Design Vision GTI，雖然具體投產計劃尚未明朗，但以 GT系列一直與福士的良好關係，不排除將來的 GT6遊戲中，大家會有機會駕駛這部癲狂怪獸。

撰文、攝影：廖宏俊（奧地利）

Design Vision GTI絕對是今屆 GTI-Treffen活動內的巨星，乘着七代 GTI剛面世，廠方就搞出了這部瘋狂概念車並作全球首展。以單門版 GTI為基礎的 Design Vision GTI外觀極之震撼，彷彿是原裝車再著上一套包圍外褸似的，令其闊度大幅增加 71mm並降低離地距 57mm，然而設計卻是一體化而毫不累贅，尤其是被紅線分割分上下兩層的頭燈更是靚得要命。由設計部總監 Klaus Bischoff親自操刀的作品，果然有水準。
廠方指出， Design Vision GTI是一部可隨時落場比賽的概念賽車，因此機械配備亦非一般貨色。動力心臟為一台前置 3.0公升 V6雙渦輪增壓引擎，輸出馬力高達 503匹及 57.1kgm扭力；沿用剛性極強的 MQB底盤並加入 4 Motion四驅裝置， 0-100km/h加速可於 3.9秒完成，極速 300km/h，性能強橫，足以令不少以所謂「跑車」自居的跑車，羞愧得無地自容。