close


飾演春嬌的千嬅有備而來，專登着條deep V裙同樂仔食飯，睇到志明眼都唔眨。

有咗6個月龍B的人妻楊千嬅，生仔之前拍《春嬌與志明》盡地一露，deep V晒背色誘余文樂，雖然床戲出街只有短短3秒鐘，但一向密實的千嬅少有露腰又露bra。上年憑《志明與春嬌》失落金像獎影后，今次當然落多二錢肉緊，拍床戲之前仲瞞住老公丁子高，千嬅抵死話︰「唓……濕濕碎啦！」


拍《春》片，當時千嬅仲未大肚，加上上集《志明》令千嬅提名金像獎影后，所以今次導演彭浩翔要千嬅又咀又露，千嬅都冇say no！千嬅說︰「唓……濕濕碎啦，嗰場只係意識上，我拍之前，老公都唔知㗎。」

拍《春嬌》造人
《春》片係《志》片續集，故事講述到北京打工嘅春嬌，撞番舊情人志明，第2次見面，春嬌專登着件deep V大露背色誘志明，最搞笑係餐飯埋單2百幾人仔，志明想即晚翻啅春嬌，千嬅就狠狠拋下一句︰「2百幾蚊你咪好抵！」據聞去年8月拍《春》片期間，丁子高曾經到北京探班，咁BB咪即係made in Beijing？千嬅笑笑口︰「導演成日幫我計，佢話肯定係喎……我點知啫！」返到香港就證實有喜，好彩拍嗰陣唔辛苦，仲好歎添！「拍嗰陣好舒服，因為北京太大，每一日都只係走1至2個景，而且導演亦好識歎，放飯時間特別長，哈哈！」

「楊冪身材好！」
今次《春》亦加入2個新角色楊冪及徐崢，分別成為志明與春嬌的新歡，而余文樂跟楊冪更加有唔少親熱戲，楊冪說︰「余文樂跟導演好有默契，我們拍戲頭三天都是親熱戲，可能我沒有那麼快進入狀態，導演總會跟我示範，他很喜歡演女生部分，然後看着他跟余文樂兩個做戲非常有默契，我覺得他們兩個都非常可愛。」余文樂亦大讚楊冪，「佢同春嬌相反，楊冪身材好、腳又幼、比春嬌年輕，呢啲條件輕易就吸引張志明。」不過最後余文樂都係揀咗冇乜身材嘅千嬅喎！

巨肚就生
就快6個月，千嬅完成《春》片宣傳就會閉關養胎。上星期佢出席活動嗰陣就明顯肥咗，而個肚就超巨型，好似生得咁。

食煙變北上
上集《志明與春嬌》講香港煙民，被迫由辦公室走到後巷抽煙，來自不同背景職業的煙民，在後巷開闢了一個聊天、結交朋友的特殊場所，造就張志明與余春嬌的故事，因為有大量粗口對白，根據《電影檢查條例》被列為三級。續集延續春嬌與志明的故事，2人分手後分別被上司派到北京公幹，一次偶然碰面，令春嬌與志明再次撻着更各自背着另一半上床。今次《春》刻意減少粗口，以2B級上市。《春》片更選為今屆電影節3月21日的開幕電影，正式上映日期則為3月29日。 ####


老婆北京拍戲，丁子高亦有探班，二人疑似在北京造人成功。不過，千嬅拍親熱戲，就唔使向老公申請，果然係烈女。


露背雖然正面都冇乜睇頭，但千嬅玉背又白又滑，晒背脊都吸引嘅。


露bra晒腰「完事」之後，千嬅着番衫唔覺意露bra，仲有條腰，意識幾大膽。


港女到內地發展，敷mask扮靚係唯一消遣，亦係令自己嘅「搵食」壽命得以延長。


楊冪搏命


來自北京的楊冪，係內地上位姐仔，亦係劉凱威女友，拍戲非常搏命。呢一幕同余文樂嘅床戲除剩個bra咋。


上集《志明與春嬌》以吸煙衍生愛情故事，今集《春嬌與志明》就以港人北上為背景。

arrow
arrow
    全站熱搜

    litalife 發表在 痞客邦 留言(0) 人氣()

    E-mail轉寄