爆粗梗係唔好啦！（真實對白）
譚 Sir解釋話當日馬恩國同長毛疊晒聲，所以聽唔到啲粗口。（王偉洪攝）

八卦陣

爆粗梗係唔好啦！

2013年02月28日 ~~ 第1199期 香港《壹周刊》

因一句「 Fxxking Chinese」熱爆網絡嘅民建聯司法及法律事務副發言人馬恩國，與長毛舌戰嘅 Youtube片段點擊率已經超過三十萬。呢單嘢，原來有下文，話說民建聯內部相當重視呢件事，上週二仲特登喺定期嘅中委會議加插議程討論。


馬大狀成功上位，依家全香港都知佢識講英文粗口，愛港愛國又 love Australia。

會議上大家只係七嘴八舌咁講個人觀感，會上有人發言問︰「點解會咁㗎？」有人又話：「爆粗真係唔係幾好噃！」不過，講嚟講去都係廢話，最終並無特別講到要懲處呢位山西政協，只係話要批評吓佢嘅失言，同埋要加強提醒黨員注意言行。
記者問過黨主席兼當日在立法會主持會議嘅譚 Sir譚耀宗，佢就話爆粗梗係唔啱，但就無回應會唔會譴責或者懲處馬恩國，淨係話馬恩國已經私下向佢道歉，稱自己一時衝動失言，而佢亦當面批評咗馬恩國。譚 Sir仲話呢啲事要講經驗，即使人哋撩你都要沉得住氣先得喎！馬恩國、蔣麗芸，聽唔聽到呀？
（林璐菁） 

低智能尖啤

周身蟻、被廉署拘捕正保釋候查嘅尖啤，上星期五出席完港台節目之後就一直深潛。當日有唔少記者喺電台等佢，不過，「人在旅途灑淚時」嘅佢堅拒開金口，一完咗節目，即時打電話叫司機接佢走。
原來尖啤一向鍾情 Samsung摺機，經常中港兩邊走嘅佢，有兩部 Samsung手機，一部係 S3600H，另一部就係叫 Nori，都係三年前嘅產物。呢兩部機，真係幾襯佢，因為……都係屬於低智能。（馮普賢）


尖啤上星期五就係用呢部 S3600H摺機叫司機快啲嚟接佢。（黃雲慶攝）


佢另一部電話都係摺機，係 Samsung嘅 Nori。

乜都鬥一餐

我啲衫唔會重複㗎！（真實對白）
我都無重複喎！（真實對白）
蔣姨姨（左一）同芬芬（左二）都係著紅加黑，一個字︰悶！（王偉洪攝）

每年新正頭政界都有好多酒會，有立法會議員仲試過一日走八場，真係唔簡單！中聯辦九龍工作部就喺初十搞春茗，唔少人俾面出席，女士們仲著到「紅當蕩」配合新年氣氛；就好似蔣麗芸、梁美芬呢兩位立法會議員都係著紅襯黑，悶！
問蔣姨姨係咪新年日日都著紅色衫，佢話係，仲會著到正月十五添，兼且係日日都無重複。查實以佢嘅家底，成年唔重複都唔難啦！轉頭問埋芬芬，佢就話新年都著吓紅色、桃紅色應吓節，都夠著一個禮拜唔會重複嘅。不過記者口痕，講俾佢聽蔣姨姨同佢一樣，新正頭會著紅色，而且成個新年都唔重複著，佢即刻煞有介事咁話︰「咁我都無重複喎！」
唉！女人，真係乜都可以鬥一餐。（馮普賢） 

本週圖片
乜嘢叫做無品?

上週三，何秀蘭動議運用《立法會（權力及特權）條例》調查梁振英，但建制派齊齊收聲，泛民又唔多落力，連埋何秀蘭得六個人發言，結果唔夠兩個鐘就完成辯論，令人大跌眼鏡。
政制及內地事務局副局長劉江華一知道呢個結果，即刻寸寸貢、話裡有骨咁周圍同人講「咁快嘅？」「真係估唔到咁快喎！」民建聯葉國謙亦得得戚戚咁將手指公指向下。查實，大家都預咗動議唔會獲得通過，不過，你兩位嘅表現，就真係示範咗乜嘢叫做無品囉！（林璐菁）


由當日敗選立法會，到而家水鬼升城隍，劉江華望住譚志源露出嘅呢個得戚樣，確實令人反感。（郭永強攝）


投反對票，再送多個倒手指公，葉 Sir，呢啲叫無品囉。（郭永強攝）