卓韻芝：喜歡咪「動」佢囉
才女卓韻芝（阿芝）向來愛情至上，多年來拍拖無數，最近更棄港男轉口味，連嗒兩名外籍猛男，惟她仍未揀定最愛是誰！她認為愛情應無分性別、樣貌及膚色，遇上心儀對象就會「動」對方！其出位言行及內心世界，將一連五日細意分享！
最近爆出我同兩個外國男仔嘅緋聞，若然你問我揀定未？我可以答係未，揀吓先啦！一山還有一山高，練吓英文啫！不過我都有學法文嘅！依家仲處於選擇期，好多人去到某階段就開始諗，究竟要成熟穩重？定係浪漫激情？抑或玩多陣？我就會繼續揀吓，我好支持大家揀嘅！若然唔選擇過、唔試過其他嘢，你又點知鍾意食乜嘢呢？
對於愛情觀，我主張勇敢、嘗試及犯錯，即係唔好諗住自己有乜缺點要改，去到某個歲數，性格已經定落嚟，唯一可以做嘅就係欣賞自己，我唔係好相信違反性格。我嘅性格屬於衝動派，但就堅定，比如做咗某個決定後，會全神貫注兼「落重飛」去做，當然我鑊鑊「落重飛」後，都會「損手爛腳」咁走，但我好隨意，唔係太多計算嘅人，我成日覺得太多計算，就唔會係今日嘅我！
鑊鑊都「落重飛」
我係咪鍾意男人？梗係啦！至於有冇畀女仔追過？冇喎！蝕咗添！人生少咗啲經驗，但我有追過女仔，最緊要係我鍾意佢囉！我相信有愛而唔去愛，係好違反自然定律！如果你唔知為咗乜嘢原因，總之你好喜歡呢個人，可能佢唔係你預期性別、收入、膚色同樣貌，呢個先係愛最神奇嘅嘢，打破你所有既定預期，通常會令我心動嘅人，我都去諗點解佢會令我心動呢？係乜嘢原因呢？
當時我幾細個，嗰時我覺得個女仔好爽朗同開心，我讀女校嘅，我已經算係最「男仔」嘅一個，我好想令佢開心、好想照顧佢、有衝動保護呢個人，所以我試吓追佢！我嘅方法係抄歌詞，追唔追到？梗係唔得，我追咗亦都表白咗，佢話「睇吓點啦！」講咗一啲模棱兩可嘅答案，之後我好快就知道，原來佢已經同另一個男仔拍拖！
追男仔係咪主動？一時時啦！若然我喜歡佢，佢唔係好「動」，我咪「動」佢囉！愛情唔使太多規矩，啲規矩都係用嚟唔遵守嘅！我都鍾意靚仔，有才華加靚仔就好囉！但要有先得o架！第一、市面上要有，第二、又要我追到佢，或者佢鍾意我先得！同MJ分手後，有需要時先聯絡，之前話佢係最低分，其實講笑！有冇機會復合？人生乜都有可能，Never Say Never囉！
好多人都經歷過愛情重創，我相信自然療法，痛到某一個位就可以治療，唔使特登做啲嘢去令自己忘記對方。當我痛完後，就可以擰轉面走，好多奇難雜症嘅痛苦經歷，痛苦係生命裏一部分！自問係一個大膽去愛嘅女仔，如果唔大膽去愛，咁愛嚟做乜？如果遇到一個好愛嘅人，我要將佢放喺第一位，會超越晒我人生所有嘢，甚至我自己，搵一個愛嘅人係最重要嘅！
Profile
姓名：卓韻芝（芝See菇Bi/ 阿芝）
出生日期：1979年3月28日
職業：
唱片騎師、專欄作家、編劇及演員等。
入行經過：
13歲參加電台「殺戮戰場DJ選拔賽」勝出，中五畢業後成為全職DJ。
代表作：
《芝See菇Bi我未成年》（主持）、 《20˙30˙40》（編劇）、《戀愛起義─不得了》（導演）、《死去活來One Night Stand》（棟篤笑）等。
專案組
做人眨眼幾十年就過，何不放下堅持，像阿芝快快樂樂地過。
阿芝早前借開騷公然「動」古天樂，令人又羨又妒！
咀MJ
阿芝向來敢愛敢恨，不介意親暱人前。
留言列表
