插圖︰祝健中

壹路向北

兩會開鑼　豪花過億

2013年02月28日 ~~ 第1199期 香港《壹周刊》

下個禮拜日（三月三日）就係一年一度嘅中共政壇焦點——全國人大政協會議（簡稱兩會）揭幕。今年兩會重點關注嘅，當然係習近平李克強正式登基，分別做國家主席和總理。除此之外，另一睇頭就係港澳事務揸弗人揭盅，外界熱傳做唔到政治局常委嘅組織部前部長李源潮，或會做國家副主席兼中央港澳工作協調小組副組長。至於香港代表、有望出任政協常委唐英年，會唔會喺兩會再爆金句，都係記者重點追訪。

另一方面，同樣飲恨政治局常委嘅廣東前省委書記汪洋，好大機會爬上副總理一職。汪洋同李源潮都同習近平關係密切，被喻為「改革派」，兩人舊年十八大入常冇影，今次有望 V形反彈。
兩會年年都開，但係究竟要花費幾多錢，官方從來都無公布金額。記者根據網上資料估算，發現開兩會閒閒哋要使過億人仔。
兩會委員差唔多有五千人，按過往慣例，每三個人大政協委員，就有一個隨行人員（例如秘書、保安等），即參與兩會嘅總人數逾六千五百人。兩會長達兩週，估算包括以下使費（見表）：
嘩，呢條億元數，如果用深圳最低工資月薪一千六百蚊人仔去計，相等於一百個農民工唔食唔用，打五十幾年工，先賺得到。
中共文山會海嘅作風人盡皆知，上個禮拜新華社就引述一名沿海省份廳局官員話，一年要開一千零六十八個會，平均一日開三個會。不過，即將登基嘅習總，近日多番提及要節約反浪費，唔知今年大家會唔會識做慳啲使？咁真係要放長雙眼睇。


下個禮拜，習近平（後）接胡錦濤（左）棒，正式登基做主席。焦點之一，係欽點習總、身體漸差嘅江澤民（右）會唔會現身。（路透社圖片）


唔知呢班兩會禮儀小姐嘅人工高唔高呢？之前廣州動物園請飼養員都要考馬克思主義，睇怕佢哋都難逃政治考試。（法新社圖片）

包尾球隊失贊助企火車返歸

新疆全運會足球隊窮到要企五十四個鐘火車返歸，同車粉絲睇到眼火爆，喺微博公諸於世，網民鬧爆新疆足協無恥。（網上圖片）

上個禮拜五（二月廿二日），名不經傳嘅新疆足球隊，結束南下廣東清遠嘅冬訓，返大本營烏魯木齊。點知撞正春運，冇一早買定飛機票得番頭等有位，球隊老闆新疆足協縮骨唔捨得俾錢，結果要成隊廿七名球員、領隊、助教、廚師，全部人坐火車返歸。
唔係，應該話「企」火車至真，事關新疆足協聲稱只買到八張硬臥，其餘都係企位飛（企位和硬臥同價，四百二十三蚊人仔），唯有廿幾人輪流坐，其餘時間唔係去廁所就唯有企，連地下都無位坐。全程五十四個鐘、四千五百幾公里路程，都咪話唔難頂，仲要車上餐餐捱康師傅杯麵。「我徹底受夠了，真是有苦難言啊！多少都是眼淚，只想說的全運會操蛋去吧！」一名球員喺微博爆粗呻道。
有新疆隊粉絲將球員慘況放上微博，網民圍攻鬧爆新疆足協，仲踢爆話領導一早就坐飛機返歸。新疆足協解釋，要球隊逼火車係因為贊助商停咗泵水，冇錢買頭等機票。新疆隊喺過去兩屆全運會小組賽，對住其他省隊都輸清光、即全國排行包尾，可見新疆隊有幾「掂」啦。 

沙士十年男人最痛

沙士十年再勾起香港人傷痛，當年內地疫情更嚴峻，全國有五千三百多人感染、三百四十八人死亡。記者在農曆新年北上探訪北京沙士康復者兼維權老人方渤， 㩒咗好耐門鐘都無人應，明明聽到屋內有腳步聲，五分鐘後方渤終於開門，佢一開口講「你好」，口氣仲有朕隔夜啤酒同飯餸味。
坐低請記者飲杯茶，方渤吸口煙就流眼淚：「這麼多年，真的，我一直想她……忘不了！十年，還是做不到，尤其到過年，有時候真的度日如年。」說的是因沙士離世的妻子。
方渤今年六十一歲，佢擤住鼻涕講，文化大革命期間佢同老婆喺黑龍江相識，七五年結婚後生咗兩個女，退休前佢喺郵局做廚師，生活唔算富裕但係三餐溫飽，沙士前仲將全屋裝修，以為可以安享晚年。
點知，十年前嘅三月，姨仔嚟北京玩時染上感冒，當局起初話無疫症，方渤於是同老婆去醫院探病，跟住就一齊中招，之後連埋兩個女同親戚，全家九人通通感染。老婆由發病到死嗰日，方渤都無機會見她最後一面，因當局怕病菌傳播，最後更嗱嗱聲落葬，這成為他一生人中的「男人最痛」。
疫情過後，沙士成為官方禁忌，方渤同幾十個病友無懼打壓，全力幫後遺症患者維權上訪，仲寫過信俾當時做北京市長嘅王岐山，成功幫過百人（包括方渤自己）向政府爭取每年發放八千元生活補助。方渤話，正考慮組織民眾控告 衞生部，要求交出目前下落不明、來自全國各地的二億三千萬人仔捐款。
方渤話，因為沙士而家周身病痛，骨枯要做手術，仲有免疫力下降、全身肌肉痛等。不過，點痛都唔夠痛失親人痛。「傷痛，我們通過治療，還承受得住，但是心痛，扛不住。」（時事組）