東亞銀行接管漢普頓酒店，百幾名旅客周街吊吊揈，見過鬼，唔怕黑咩？

中環人語

正行賓架五不按

2013年02月28日 ~~ 第1199期 香港《壹周刊》

魔鬼從來都在細節中，超人李拆售雍澄軒，是否如一眾炒家所諗咁筍，未摸清箇中細節條款，其實好難講。然而對正行出身之賓架而言，則肯定唔會幫呢啲買家上會。何也？

在佢哋嚟講，有幾類物業係例必唔造按揭者。一為老人院。業主供唔起，銀行接管，咁班老人家點吖？叫佢哋瞓街呀？同樣道理，教堂、學校同埋醫院，佢哋亦依例唔按者，費事手尾長也。
另一類惡搞物業就係雍澄軒咁嘅酒店。四年前寶哥哥間大寶號漏夜搵執達吏接管旺角漢普頓酒店，百幾名旅客直情好似唐唐咁講，揸住個喼通街吊吊揈。見過鬼，唔怕黑咩！

本週消費　頂級泊車消費

睇見 Wilson呢個熟口熟面嘅招牌，各位唔好以為呢個係香港嘅停車收費噃。呢個 Wilson停車場喺袋鼠邦雪尼，以呢個收費水平，坐低飲杯咖啡個零兩個鐘，盛惠五十五蚊澳紙；即係港銀四百四十蚊。睇吓以後仲有邊個敢 complain中環停車費貴吖嗱！ 

本週圖片　是敵也是友

（于港民攝）

上週三午後，小宗撞到劏房波陳茂波（右）同范太范徐麗泰（左），喺置地廣場樓上嘅銀行家會所撐完枱腳，落樓後仍交頭接耳，雞啄唔斷。早前范太多次公開批評兼揶揄特首梁振英，轉頭又同劏房波開飯。難怪有道政治圈子，沒有真正嘅朋友，也沒有真正嘅敵人也。 

糧油大王自製《通勝》

上週五，喺中華總商會春節酒會上，有「糧油大王」之稱嘅港九罐頭洋酒伙食行商會副主席李廣林滿場「飛」，見人就送上一本自家編制嘅《通勝》。原來佢自學風水已久，總共編寫過四十本《通勝》，靠每日寫少少，結集成書，今年印咗過萬本來派街坊。打開佢本《通勝》，除了有二十四個節氣，每日宜忌事項外，仲加入西洋相命術、養生保健法，連如何選擇食用油都有，夠晒實用！不過，李生話睇《通勝》最緊要係幅春牛圖。今年係蛇年，牽牛嘅牧童無著鞋，代表雨水多，即係香港經濟唔會好差咁話。風水嘅嘢，信不信由你，但「糧油大王」預計今年糧油、罐頭等加幅大約百分之二、三，呢樣就一定要信佢啦！


糧油大王李廣林自學成家的《通勝》屬非賣品，只拿來「派街坊」，但封面封底都係自家公司通泰行嘅廣告，咁識做生意，果然薑係老嘅辣。（于港民攝）


李生指每年嘅春牛圖最重要，今年圖中嘅芒神無著鞋，寓意雨水較多。

黃坤細狗惹「官非」

講到風水，東方明珠石油（ 632）真係要搵個高人睇睇。其公司主席、人稱大廚坤的黃煜坤（別名黃坤），以及副主席劉夢熊先後被廉署請去飲咖啡， Dream Bear更證實被捕。但原來咁都未夠黑仔。
小宗收到風，住喺山頂和福道大宅嘅大廚坤，兩隻愛犬早前同鄰居嗰隻十幾歲嘅短毛狗哥基發生「口角」，懷疑太惡嚇親隻哥基，搞到鄰居報警。警察同漁護署人員齊齊上門，大廚坤太座惟有講句：「對唔住……囉！」因為無咬親人，漁護署職員淨係開咗「 File」，大廚坤隻狗隨時要「軟禁」喺屋企。主人當黑，連隻狗都無運行也。 

Give me a break　減壓救兵

中環人壓力大，喺蒲點蘭桂坊附近，唔少足浴店應運而生。其中一間名為迎足，有唔少西裝骨骨嘅上班族去幫襯，老闆 Vincent話：「有啲客會喺 lunch time上嚟，食住飯盒做按摩。」
迎足主打中式按摩，亦有批腳皮及人手淋巴排毒等服務，每節五十分鐘，收費由二百元至四百五十元不等，買套票有八折。「大部分客人都係按膊頭加按腳，可能著得多高踭鞋，唔少 OL做批腳皮。」 Vincent指亦有城中名人來幫襯，包括夜場 Volar老闆、明星廖碧兒及王菀之等。
Vincent仲話唔知係咪因為上星期股市急挫，有個喺附近返工嘅客仔話壓力大搞到好頭痛， lunch即刻上嚟按咗三十分鐘頭。據他觀察，平日中午上嚟嘅客人都好緊張咁望住電腦睇資料，但按按吓就會瞓着。夜晚嘅客就會放鬆啲，往往都三五成群地把酒談天，由股市講到女人。唔好以為中環人好闊佬， Vincent話一般客仔嘅貼士都係廿蚊到四十蚊，要賺錢，都係密啲來快啲手最實際。


週六下午，全場只得一位客人， Vincent指四點後才旺場，不久接待處電話果然響不停，上門客人中亦有外國人。（陳浩樂攝）


來自福建嘅 Vincent唔熟香港商界名人，就算有名人幫襯都唔知。

金牙大狀講嘢　盛事基金資助佔領中環？

戴教授之「佔領中環」行動完全符合盛事基金嘅申請條件，申請番一千幾百萬資助費，肯定可以搞得更加有聲有色。

港大戴耀廷教授鼓吹發動一萬人佔領中環，藉此「敦促」有關當局交出個合乎普世普選定義之雙普選方案。唔知係有心定無意，戴教授所講之一萬人剛啱符合盛事基金之資助條件，即是：
（ i）具有相當規模。參與總人數（包括參與者、觀眾和記者）應至少達 10,000人；（ ii）包含非本地元素，並應有來自內地及海外人士參與；以及
（ iii）公開讓本港市民參與。
佔領中環行動如果搞得成，又豈止係本地之盛事而已？呢個肯定係中國以至全世界之盛事。咁盛事基金資助其事，又豈不應該？有盛事基金之經濟支援，戴教授肯定可以將佔領中環搞得更加有聲有色，咁豈不好過俾錢搞足球賽激親班買唔到靚位飛嘅球迷！ 

中環人語迷你版

“ You are not even a fxxking Chinese.”

估中邊個中環人講呢句說話，送你 PNY.輕巧型 12合 1 USB讀卡器一個有意參加者，請於三月四日 24:00前將答案電郵 mailto:centralman@nextmedia.com小宗只接受電郵，郵寄免問。

本刊員工及直系親屬不得參加。為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於一三年三月七日本欄揭曉。 

上週人語揭曉

“呢個唔係住宅，係一個投資項目。”

答案
趙國雄
得獎者： Cindy Lai
中獎時間： 1:00pm 20/2/13 

(宗菁華)