close


俾兩隻狼搞到周身蟻，Rose家做嘢會打醒十二分精神，盡量搵媽咪或助手陪實。

19歲陳嘉桓（Rose）上年橫店拍戲慘遭狼擒，事隔3個月，雙狼積極洗底扮好男人，Rose就離開傷心地返香港繼續拍戲。
擺明係受害者都要被指博宣傳，Rose經一事長一智，近日無論工作或放假，多數黐實媽媽兼前經理人Ronnie（最近已離職），兩母女晚晚喺屋企焗蛋糕整甜品，情人節當晚更約埋生父唱K，唔敢四圍蒲。
見過狼怕黑，Rose新一年要守行為，連媽咪亦採取人釘人策略，Rose守承諾：「唔畀再出夜街！」


去年11月發生擒啜事件後，陳嘉桓由橫店轉戰雲南拍另一套電影《光輝歲月》，同劇有梁詠琪、曾志偉及黃日華等前輩照顧，順利完成長達3個月的內地拍攝。

Job冇減價
一次過拍完兩套戲，Rose返港後集中火力留港發展，日前更相約棄視從商的三皇集團CEO王賢誌（Vinci）到九龍塘又一城食飯。據知當日飯局主要為Rose代言的纖體產品傾續約。「上年Rose發生咗啲唔開心事，當時有傳聞話Vinci（王）好嬲，會抽起晒啲廣告，實情Vinci不知幾撐Rose，知道佢拍完戲返咗香港，即刻約佢出嚟傾續約，而且冇借啲意話Rose形象唔好壓佢價，照樣畀番6位數！」知情人士透露。

飯局密斟
當日陳嘉桓同王賢誌（左一）一餐食足兩粒鐘，期間Rose表現認真，似乎非常緊張新一輯代言廣告。

阿媽mark實
傾完續約，Rose同媽咪買材料整蛋糕，當晚更將完成品放上微博，打女變美女廚神。


行街期間，有女粉絲認出Rose，更要求影合照，阿媽即時變身攝影師揸機。

老豆唱K
雖然父母已離婚，Rose又跟媽咪住，但兩父女感情好好，情人節都約埋一齊唱K。

練功開戲
代言有着落，Rose現時除忙於幫報紙雜誌影靚相外，亦日日返公司練功，操fit自己。Rose透露：「之前返內地拍戲太耐，啲詠春生疏晒，家一有時間就要操番fit啲體能，因為老闆計劃嚟緊4月開套時裝戲畀我，係時候要做定準備工夫！」勤力練功，Rose最近亦非常檢點，除工作外一律唔出街夜蒲，「其實我一向少去夜街，尤其係發生事後，我去邊度、同邊個朋友出去，都一定會講畀媽咪知，不過如非必要，盡量都唔畀再出夜街！」19歲女咁識諗，Rose師父冼國林唔使再勞氣到兜巴星啦！

勤有功
Model出身的陳嘉桓，上年尾拍的兩套電影將會喺今年排住隊出街，另外Rose的師父冼國林今年中亦會泵水開一部時裝片捧Rose做主角，年尾又會返內地拍電視劇。年尾流流又要北上，Rose今次真係要保護自己免受傷害喇！

晶哥讚專業
王晶做導演的《笑功震武林》暫定5月上畫，Rose受狼襲時正正拍緊呢套戲，好在戲中同伍允龍做一pair的Rose心情冇受影響，連晶哥都讚佢夠專業。

重戲過Gigi
曾志偉及熊欣欣執導的《光輝歲月》專程去雲南取景，Rose飾演農村少女，會聯同梁詠琪等村民幫大俠黃日華對抗奸人。據知Rose戲中有多場打戲，戲分比Gigi更重！ ####


上月Rose被影到夜麻麻出街食飯，但身邊朋友只係感情要好嘅TB中學同學，聽話唔黐仔。


Rose為王賢誌旗下嘅纖體產品做代言，宣傳時唔錫身露晒腰遊街。《蘋果日報》圖片


《光》片早前趁柏林影展期間遠赴德國賣片，如果有A級電影公司睇中，Rose分分鐘可以衝出國際喎！



arrow
arrow
    全站熱搜
    創作者介紹
    創作者 litalife 的頭像
    litalife

    818 娛樂八掛大放送★

    litalife 發表在 痞客邦 留言(0) 人氣()

    E-mail轉寄