探熱針
投資百萬開冰室 怒火林子善求教奶茶王
未夠秤就入行的林子善，全靠《怒火街頭》的戇直律師米佐治，成功入屋，由行行企企一跳變師奶偶像，一年來密密接 job搵埋唔少，血汗錢得來不易，林子善於是與友人合資百萬開冰室，希望開多條財路。
做生意要親力親為，林子善日日落鋪監督裝修進度、面試新員工；為省靚招牌，他還特別向香港奶茶王求教，學番一兩招傍身。
林子善虛心向奶茶王羅德求教沖奶茶心得，席間還見羅德向林子善展示一些特色食譜。
羅德連續奪得兩年奶茶王獎項，並代表香港到海外展示本港著名的絲襪奶茶。（《蘋果日報》圖片）
老豆做齋鋪
連日來，林子善都留在天后浣紗街的地鋪，監督裝修工程及面試員工，人工同鋪租均是做生意兩大主要支出，據知，他開價萬三蚊起請廚師，樓面九千起跳，高過最低工資。
「佢見人嗰陣會問埋啲求職者嘅生活習慣，如果習慣夜瞓，就盡量編夜更，諗得好仔細！」知情者說。
上週六（八月十一日）下午五時，林子善與一名身材肥胖的男子在鋪頭附近茶聚密斟，其間胖男不時指手畫腳，他則在旁邊專心細聽。而該胖男正是連奪兩屆香港奶茶王的羅德。
「子善爸爸喺元朗開齋鋪，所以佢搞飲食都算係唔熟唔做，佢知道冰室好講究水滾茶靚，就託人介紹香港奶茶王羅德學沖靚奶茶，趁《怒火街頭 2》仲播緊，佢專登度咗款『米佐治』三文治，食番套劇個角色！」
跟奶茶王傾了近半個鐘，之後林子善急步返回新鋪；原來他約了幾個應徵做廚房、樓面和水吧的男女面試，又要往附近的水電鋪買裝修材料，忙到騰來騰去。
林子善連日來忙於監督冰室裝修工程，所租的大坑地鋪前身是糖水鋪，裝修略帶七十年代懷舊風格。
週六黃昏，林子善剛跟廚師面試完，即又再跟應徵樓面的男女面試。
加薪五成
早年靠星爺周星馳帶挈入行的林子善，入行以來一直做三打七，○八年簽無綫，密拍做二打六，直至《怒》劇米佐治一角，突變為師奶偶像；成功賺得第一桶金後，他先在屯門買樓與父母同住，再與老死導演鄧東明（ Tony），一人一半合資百萬開冰室。
「舊年王維基搶人，幾乎人人都有得加人工，樂小姐仲開出好好 嘅條件，想同子善改簽經理人合約，但佢唔想飛甩舊經理人推咗，但無 綫都加 咗佢成五成人工，幅度算係高嗰批喇！」知情者說。
《怒火街頭》一劇令林子善事業重獲生機，他的好兄弟鄭嘉穎更憑此劇榮登視帝。
林子善與家人感情融洽，一家幾口同住屯門屋苑，閒時還會約同女友 Kary與父母飲茶食飯，非常孝順。（《忽然 1周》圖片）
喜劇之王訓練班
98年周星馳開拍《喜劇之王》，招收一批外表極盡騎呢的學員，包括在片中飾演「洪爺」的林子善、「導演」李思捷和「甜筒輝」鄭文輝等，其中林子善和李思捷仍活躍幕前。
「導演」李思捷
「甜筒輝」鄭文輝
在星爺公司任職編劇，於多部星爺電影擔任副導演及編劇工作，之後曾轉職報館、監製漫畫等，目前任職出版社，已完全脫離娛樂圈。
「洪爺」林子善
16歲入行，《喜》片後跟隨星爺搵食。 06年轉簽曾志偉的 StarEast，並開始與經理人 Carol合作；靠返大陸拍劇及夜店打碟維生。 08年獲黃子華睇中，帶入無 綫拍劇，收入才漸趨穩定。 
留言列表
