看着劉美娟與張崇德，感覺到愛與溫暖。

兩人於○一年結婚，現育有一子一女，四口子幸福滿瀉，不只是有兒有女一家人齊整平安如此簡單，還有那由信仰而來的溫婉誠懇，以身體力行培育子女成為品德高尚的人，實證有五歲兒子張日希（Hayden）的生日願望：「唔使買禮物咁嘥錢，有爹哋媽咪就夠喇！」

窩心的說話，任誰也聽得感動！

天使的心要如何培養，且看劉美娟與張崇德的親身剖白。

上周三（八月八日），劉美娟與張崇德帶同一對子女，及一家人同心製作的「夢想號」小帆船，出席「夢想號啟航！」慈藝展，為受惠機構「親切」籌募經費。

兄妹講數

多年前，首當父母的張崇德與劉美娟，誕下的兒子張天藍，出生不足一天便夭折，經歷無窮傷痛及控訴後，今日，他們的兒子張日希已經五歲半，女兒張日晴（Ching）今年四歲，兩兄妹有影皆雙互相照顧，實有賴父母的不斷教誨，劉美娟說：「我成日教佢哋，兩兄妹一定要相親相愛，哥哥只有一個妹妹，妹妹又只有一個哥哥，大家都要好錫對方。尤其喺爭嘢玩嘅時候，我會叫佢哋兩兄妹商量一下，傾掂數先，慢慢建立咗佢哋之間嘅深厚感情。」

哥哥日希比妹妹日晴年長歲半，偶爾也會出現爭寵爭執的場面，張崇德便會教導子女學懂分享，他說：「我唔單止教佢哋唔可以爭嘢玩，而且仲要同其他小朋友一齊分享玩具；我灌輸嘅觀念就係，冇一樣物件淨係屬於佢哋嘅，任何嘢都可以分享一齊玩。其實我啲語氣都幾嚴厲o架，基本上佢哋知道我好錫佢哋，但有啲宗旨一定要揸得好緊，譬如禮貌呀、尊重呀、守時呀，我一定要佢哋做得到。」

經歷首名兒子張天藍夭折後，劉美娟於○七年二月誕下第二個兒子張日希，寓意人生「日日有希望」。

○八年九月，劉美娟為丈夫張崇德再添一名女兒，名日晴，與兒子湊成一個「好」字。

劉美娟還透露，最初一對小兄妹爭玩具，她便不論誰對誰錯，立刻收起玩具，不讓他們玩，「我記得有一次，個女開生日會，收到好多禮物，佢即場拆咗份禮物之後，有其他小朋友話想玩，佢都肯將自己未玩過、全新嘅玩具畀對方玩。跟住我個仔生日，我話爺爺嫲嫲想買禮物畀佢，問佢想要咩嘢啦？佢竟然話：『唔使喇，我有好多喇，唔好嘥錢啦，我剩係想要爹哋媽咪就夠喇！』仲要講咗好多次喎，我哋聽見都好開心，起碼佢知道有父母同埋家庭，已經好滿足。」劉美娟眼角微彎，面帶笑意的說。

早前，劉美娟與丈夫張崇德合著育兒書《讓孩子學會輸得起》，並於書展期間舉行簽名會。