Amanda係藍帶廚藝學院嘅畢業生,廚藝有番咁上下,加上佢經常扮到靚一靚坐鎮,難怪生意唔錯。 

巡星舖 高檔低配套  Amanda S 餅店 petite Amanda 

食甜品除咗要味道夠層次外,賣相亦好講究。 Amanda S.喺中環 IFC開設嘅餅店「 petite Amanda」,開業已經兩年,主打法式甜品,一件蛋糕閒閒哋四十五蚊。食物價錢貴,但配套卻略嫌失禮,要媽咪姐用膠叉去享受一件高檔蛋糕,完全唔襯。

Charlotte aux Poires


$40 

店員推介呢款啤梨慕絲蛋糕,厚片啤梨果肉配搭啤梨慕絲,甜而不膩,口感清新。不過用 lady finger手指餅做嘅餅底,一切就散,可以再堅韌啲!

Plaisir Sucre


$46 

榛子朱古力脆蛋糕原來係 Amanda至愛,賣相精美。朱古力榛子餡做得相當有層次,餅中有幾塊朱古力薄脆,有畫龍點睛效果。

忽周推介  Baked Croissant Doughnut


$16 

最有驚喜莫過於呢款賣相平平無奇,但入口離奇鬆化嘅酥皮冬甩,最重要係只賣 16蚊,屬全店最平。

搵笨之選  Turkey Sandwich


$50 

除咗甜點,餅店亦提供兩款三文治,當日媽咪姐就試咗呢個低脂火雞三文治。雖然麵包厚身,幸而用料十足,由頭到尾都啖啖火雞肉。可惜撞正隔籬連鎖咖啡店都有賣同類型三文治,仲平約三成。難怪呢款三文治唔係咁受歡迎。

Iced Citrus Mint Tea


$38 

一杯賣$38嘅薄荷茶,冇諗過用茶包加膠杯上枱,加上茶冇茶味,薄荷冇薄荷味,倒不如幫襯附近連鎖咖啡店。

開餐位置唔就腳

由於舖面本身唔大,所以開張初期不設堂食,近年 Amanda先租埋商場走廊一邊位置作為堂食地方。不過賣餅位同開餐位有一段距離,而且顧客要自己拎食物,完全唔方便。


舖面唔大,但媽咪姐試食當日就有三個店員工作,可惜佢哋唔算主動,唔識主動推介食品。 

總結:

甜品味道尚可,但五星價錢只有兩星配套。店員亦唔夠主動,冇提供任何協助。地方淺窄,採用自助形式,唔夠法式情懷囉!

arrow
arrow
    全站熱搜

    tvb4life 發表在 痞客邦 留言(0) 人氣()