一次意外沒有打沉 Lucia，她反而比以前更熱愛做運動，裝上特製「刀片」義肢後，如平常人一樣跑步：「其實傷殘唔係啲咩，好似病咁，係件好普通嘅事！上落樓梯都難唔到我。」
Main Camp 黎芷愉
單腳上路 21歲浸大刀片少女：唔使人可憐我！
早前的渣馬， 21歲的黎芷愉（ Lucia）成為新聞人物，去年因交通意外痛失右小腿，從此要裝上「刀片」義肢跑步，但憑超積極的態度， Lucia重新站起來，故事一曝光，樣子甜美的她除了打動不少港人，更成為高登新女神。
換了其他人，遇上重創定必自暴自棄、呼天搶地，但 Lucia卻說：「我唔覺得自己唔好彩，反而無論成績、家人關係都大有改善，所以我唔需要人可憐我！」堅強到得人驚，港仔港女都自愧不如！
去年 1月 3日因趕往學生資助辦事處申請讀副學士的學生貸款時，慘貨車撞倒右腳掌而被輾碎，自此改變了她的一生。憶述當時的情形， Lucia印象迷糊，「車禍令我腦震盪，故出事前後兩星期多嘅事我都唔記得，一醒醫生就同我講要做手術截肢，當時我腦裏面只係擔心日後嘅生活唔知會變成點，好迷惘，雖然醫生話截肢後用義肢輔助， 9成行得番，但係我就諗我咪係嗰 1成行唔到嘅病人……」
渣馬成名
意外後的 Lucia比以前更積極挑戰自己，除了跑步、攀石，上月還毅然參加渣打馬拉松十公里的賽事，結果以 1小時 29分完成，廣受傳媒報道。
「刀片女」之所以得以為人熟悉，全靠體藝師姐在 fb的一篇短文和相片介紹她，結果在 fb瘋傳，不少網友都大讚佢靚女！
老師得悉 Lucia不幸入院都特意到醫院探訪，「學校都好好，全體員工簽晒名送張咭畀我之外，音樂同家政老師仲嚟探我，鼓勵我，仲送咗個熊啤啤當係陪住我喺醫院嘅日子！」
幸得前男友的幫助，特意請來一班截肢者跟 Lucia分享生活的點適、人生的方向，令她決定要再站起來走路，「由於我住政府醫院，每日只有個半鐘做物理治療，但我就求醫生畀我 3小時，每日如此，返到病房就繼續做手部肌肉訓練，結果本來要近一年先行得，我一個月就可以用義肢四圍走！醫生都讚我係奇跡！」
採訪期間，本刊多次希望 Lucia能邀請親朋好友一同接受訪問，但她堅決拒絕，「我個人性格唔想畀麻煩人，意外之後都令好多朋友好奔波又為我操心，我都唔想再成日麻煩到佢哋啦！」同時她竟然說因車禍得福，除了令她患難見真情，得前男友及一眾親友關心和照顧，亦令成績大躍進，「我以前好懶散，成績唔好，家人對我冇期望，小學美術攞 B，我就自己報咗讀體藝美術，由於整個中學時代都係入讀宿舍，所以童年同家人關係疏離。」
車禍後，無論身體及心態亦有大改變，「難得執番條命，我唔想浪費時間，所以一有時間就溫書，特別係堅持每日上完文學後就立即溫習（現於浸大讀心理學副學士 Yr.1），結果文學由 C+升至 B+！今年 GPA更由 2.9升至 3.5，遇到有咩困難，我就同自己講，截肢都過到，其他嘢濕濕碎啦！」
拍攝當日， Lucia未能穿上由服裝師所提供的高踭鞋和平底鞋，「我着唔到高踭鞋㗎，要特別整隻假腳先得，而平底鞋個鞋身太窄喇，所以一般我都着唔到，要着啲鞋身入面闊啲嘅，所以我好難買鞋㗎……」
車禍亦令 Lucia更加珍惜家人，一有時間她就回家陪家人，而家人見到她對生命的努力及學業有進步，亦覺得她有獨立能力，關係亦大大改善。
外表剛強的 Lucia原來勁貪靚，採訪期間，她好擔心相片中的自己會好肥不夠美，她怕肥，所以不時問攝影師，「影得肥唔肥呀？畀我睇吓！」難得愛靚的 Lucia不覺得裝上義肢就不漂亮，平時亦大方着短褲，騷出義肢，「我第時可以畫啲畫或者自己設計圖案印上義肢到，就算𠵱家黑色但其實都有暗花，好靚㗎！」
失去右小腿，令 Lucia更加愛護左腳，「我每晚一定會搽 cream，平時亦會好小心，盡量唔好整傷，要錫住用，哈哈！」性格樂觀的她承認難免有途人用奇異的目光看她，但她卻不以為然，「有時啲人會用可憐嘅眼神望住我，不過我會同佢哋講多謝關心喇！我好好！但我唔使人可憐，見到我讓座畀我就得㗎喇！」
穿上義肢就不能穿高踭鞋，樂觀如 Lucia都有唔開心，「因為義肢要平衡，所以我唔可以着高踭鞋，好在義肢矯形師阿榮（左），為我整可以着高踭鞋的義肢，一諗到可以着高踭鞋就好開心！」
本刊安排了化妝師給她影靚相， Lucia大表興奮，還不時向化妝師請教化妝心得和技巧，事後還主動問化妝師拎 fb，希望與他分享扮靚心得。
自認貪靚的她一入到化妝店就大表好奇，還當場問同行的化妝師，「唇彩邊隻好用啊？點搽㗎？有咩步驟㗎？」
Lucia勇於嘗試各項新挑戰，去年 10月還在香港傷健協會一次周年晚宴中演出舞台劇，擔任女主角，飾演因患血管瘤而需截肢的女孩。
5呎 2吋高的 Lucia意外前只得 90磅，身形標準，意外後更只得 85磅，去年參與中七謝師宴的她盛裝打扮，化起妝來還有點像李心潔，難怪被人稱為「浸大石門校花」。
Lucia早前在傳媒訪問中提及男友不離不棄，在渣馬當日還現身支持，不出一個月，原來她與男友（左二）已剛分手，但仍處處保護對方，還主動提出要幫前男友「打格仔」， Lucia認真有情有義！
Lucia和前男友曾經非常甜蜜，互相親手整朱古力給對方，去年情人節男方還以「魚」比喻「愉」，把朱古力整成魚形送給芷愉，可惜此情不再。
被傳媒稱為「刀片美少女」的 Lucia樂觀又靚女，連高登仔都出 post大讚，異性緣不錯，記者再三追問她的感情狀況時， Lucia才隱晦地承認剛與相戀 4年的男友因性格問題而分手，但再見亦是朋友，心中更十分感激對方的關懷備至。
「做完手術無幾耐，佢就特登搵咗啲截肢人士嚟醫院探我，出院後又陪我玩單車百萬行，我咁快康復都真係要多得有佢喺我身邊。」即使分手後， Lucia也處處保護對方，為他着想，不希望公開前男友的身份，「如果第時搵男友，一定要成熟，識體諒我，最好大隻啲，可以保護到我，萬一俾人打劫都可以幫我擋吓嘛！不過𠵱家都係讀書入大學緊要，拍拖唔講住啦！」
Main Camp：
Main Campus簡稱，意即主校園，各大專潮人潮事當然離不開 Main Campus。
撰文：校園組
攝影：何榮亮
形象： Bryan@the Flaming
化妝： Peace Ip@Bridal Corner
留言列表
