FACEweekly
Sweet爆 BB 吳千語
自林峯公開承認吳千語的女友身份，人人改口叫她「千語 BB」，兩人更愛得纏綿，一個月去盡東京、沖繩再到米蘭愛漫遊。升呢兼上位，見報率急升，着衫愈來愈貴氣，仲有跟得林峯去到邊陪到邊， 19歲女愛情、事業兩得意，加上得天獨厚的 1/8澳、法、中混血甜美清純 baby face靚樣，自然更順境！問千語 BB會唔會早婚？佢話感情事遲啲再講，今日講事業先！
最近去內地拍了 3個月的電視劇《歡天喜地俏寃家》，預計暑假會播。
第一次拍劇，仲要係古裝，要花好多時間睇熟劇本，最開心係普通話進步咗。
因為驚講錯，所以初初都會成日 NG，好彩內地助手係北京人，佢每日同我背劇本， 3個月日練夜練，多自然流利咗！
我喺劇入面飾演將軍個女，係個千金小姐，同內地男演員穎兒係一對，由寃家變情人。我嘅角色係精於醫術、琴棋書畫樣樣精，又好優雅嘅女仔，可惜要同花心男指腹為婚；勁抗拒！
我覺得自己喺呢方面同角色都幾似，大家都係講嘢直接，對於唔鍾意嘅事物就會講出來！
好開心今年《百星酒店》有好多不同年紀嘅朋友都讚我做得好，入面個角色係一個愛着奇裝異服嘅明星，但又會有 girly啲一面，都幾突破！
我希望有機會可以試拍動作片，不過我會先鍛煉好身體，例如會玩 boxing、跑步同做 gym，操 fit番自己先！
拍戲咁忙，點樣 keep住 BB咁滑嘅肌膚？
每日一定會飲 6至 8杯水，因為知道化妝品易傷皮膚，要補充水分防乾；我亦好注重保濕，揀護膚品只會揀天然成分如海藻，最鍾意就係有機產品，因為好怕那些有香味的護膚品，感覺有點化學成分。
其實平時出街我基本上都唔化妝，最多都係塗防曬，盡量都想皮膚休息。
撰文：蔡佩儀
攝影：黎韋邦
化妝： Jonathan Li
髮型： Aki Choi@Hair Culture
服裝提供： Off The Wall（ 2499 9839）、 I.T（ 2890 7329）、 COCO DEAL（ 2833 8338）
留言列表
