Kevin仔說來回兩程車就要拍完整條片，準備工夫要做足，廿幾人各自借衫搵道具，他自己則連屋企的吹氣公仔都出埋。
真面目
起勢搖 抽 Harlem Shake水 余文樂死霸主角位出風頭
Harlem Shake網上熱爆，你搖我又搖，本港潮星余文樂、周柏豪和森美都搖埋一份唔執輸，其中余文樂翻炒《春嬌》的〈別問我是誰〉更惹起熱話。
余文樂帶隊的籃球友聯盟「橫洲工業」齊齊扮嘢趁 Harlem Shake熱鬧，但其實比他們更早一步率先玩嘢的，是 YouTube紅人「玩爆你個腎」系列搞手 Kevin仔（李健宏），他 2星期前已在港鐵車廂大跳 Harlem Shake放上網，點擊至今達近 35萬，比橫洲多成 10萬！ 港版元祖 Kevin仔批評余文樂條片大頭鏡頭太多太刻意，唔係正宗哈林搖，「要玩都要玩得認真啲、正宗啲！」
「 Harlem Shake Hong Kong Subway」在港鐵車廂偷雞拍攝，選擇人流少的康城站上車，以免阻住乘客。
Kevin仔一吹雞就有廿幾人和應，他說因時間太趕約唔到 artist助陣，但就算約到都唔會拍近鏡咁話。
出足 13秒近鏡
全隊十幾人扮鬼扮馬，余文樂則又係王馨平上身，又係做番〈別問我是誰〉個雙手動作，冇乜新鮮感囉。
橫洲工業籃球隊大跳 Harlem Shake，不過余文樂出盡風頭，點擊率暫時都只係得廿幾萬，輸畀 Kevin仔！
周柏豪的老夫子造型好搞笑，但 solo得幾秒，化埋妝幾乎唔認得。
影佢太多唔正宗
Kevin仔話叫得 Harlem Shake就應該依照外國的模式，唔係要出風頭。
港鐵玩吹氣 Mary
由 Kevin仔策劃的「玩爆你個腎」系列在網上勁受歡迎，最鍾意整蠱藝人，之前調戲兼搞喊薛凱琪最激，點擊率近 30萬。
其實比余文樂更早拍 Harlem Shake的香港藝人是 LMF成員 Kevin仔（李健宏），他早一個星期已帶領廿幾人在港鐵車廂拍攝，片中他戴住大頭佛公仔獨自猛搖，其他人則扮乘客，中段全部人穿上清裝、校服等喪跳，全程沒有大頭畫面，跟足原汁原味 Harlem Shake。
Kevin仔看過余文樂的短片後有感而發：「其實正宗 Harlem Shake係大約 30秒，全程 wide鏡冇大頭 shot，亦好少用明星嘅，但佢（余文樂）嗰條片拉到成兩分鐘，近鏡太多影住余文樂好耐，唔正宗囉！我唔係話佢有咩問題，不過我認為要玩都要玩得認真啲、正宗啲！」
「唔會專登拍大特寫」
他說由吹雞、借衫、借道具至拍攝只用了兩日完成：「我哋喺港鐵拍係因為 Hong Kong style啲，喺將軍澳站至康城站呢段車程因為人少啲！正宗嘅 Harlem Shake係首先有個人戴住頭套睇唔到樣喺度跳，我都學足，全程睇唔到樣㗎！就算我搵 artist嚟拍，都唔會專登拍佢大特寫啦！」
睇番橫洲工業條片全長 2分鐘，齋影余文樂的鏡頭總數長達 13秒，雖然《春嬌》女裝夠搞笑，但 sell自己多過表演 Harlem Shake精髓囉！記者致電余文樂，可惜他截稿前未能回覆。
港藝人狂拍
除了余文樂、周柏豪及 Kevin仔，藝人潮人都紛紛拍片放上網，而且都幾正宗，跟足原版 30秒搞掂。
森美、小儀趁《早霸王》時段在電台玩 Harlem Shake，森美更扭 pat pat伸脷鬼咁 high。
喪 Do男就喺公廁同大牌檔自拍，全程戴住眼鏡、假鬚，唔係件衫寫住都唔知佢係乜水。
小豬羅志祥跳舞勁就係人都知，有網友就將他出席活動時教跳舞的片段重複剪輯，變成小豬 shake，粉絲應該想睇佢真跳多啲。
蕭敬騰都 shake？呢位主角髮型同身形都似足蕭敬騰，不過欠缺真身神髓，假貨成數好高。
專作怪歌的唱作歌手莊冬昕雖然冇自拍哈林搖，但好鍾意睇人跳：「我好鍾意呀！呢兩年都好興呢種音樂，特別在於冇 melody，不斷重複。首音樂本身都冇乜規矩，所以跳起上嚟都冇規矩，不過我最鍾意係美國最原本嗰條片囉！」
採訪、撰文：娛樂組、校園組、科技組
攝影：攝影組
留言列表
