全新iPad　香港首賣殺到嚟 @ 818 娛樂八掛大放送★

Geek友講場

「唔該，我想買一部全新iPad！」、「呢度部部iPad都係全新㗎喎！」冇錯，第3代iPad名為「全新iPad」，The new iPad。雖然以前iPod都唔係用數字命名，不過叫The new iPad又真係幾古怪，下一代叫咩呢？買二手嘅又叫唔叫全新呢？新名唔玩簡約禪意走去玩邏輯吊詭，都係為咗避內地註冊黨搶iPad商標。部機有幾全新見仁見智，但香港破天荒有份首賣就係事實。3月16日，ifc Store將上演一場The new排隊血戰在所難免。

《FACE》Gadget版監修人
903 DJ Donald
本身都係用緊iPad一代，已經愈嚟愈慢，由於以睇片為主，新一代iPad個芒靚咁多對我嚟講好吸引。最正係個名The new iPad應該係用嚟避開班山寨廠，喺廣告入面第一個就係中國景，擺明要入大陸，改個名好過俾人呃一大筆錢吖！

加長名避官司
內地一早有山寨空殼公司註冊由aPad到zPad商標，手執iPad商標嘅深圳唯冠公司更向法院申訴，迫使iPad由亞馬遜中國、蘇寧易購等多家國內網站下架。雖然官司仍在進行中，iPad2目前仍可於內地 Store網站買到，不過唔排除為咗避開內地註冊霸王而改iPad新名。事關國內商標法所講，商標名稱超過50%相似足以構成侵權，叫New iPad都仲有5成似，叫The new iPad就穩陣喇！

全新iPad新在哪？
當年iPad2加咗鏡頭同薄咗一半有多，今次The new iPad外形除了稍稍變胖反而無甚變化，雖命名為全新但實則強化多過創新。Upgrade內容亦同傳聞一樣，難怪奄尖fans覺得冇新意。不過同市面上其他tablet比較，new iPad性能的確卓越，Retina解像度無人能敵，4G雖未普及，但勝在機能紮實冇加價，《華爾街日報》就建議iPad用家隔代升級，一齊睇吓新舊機有乜唔同？

新名講咗都唔知
新名The new iPad喺發布會屏幕出現之時人人以為係暫稱，到完場先知呢個就係正名，可以話係成個發布會最估佢唔到之處！

Retina屏幕
The new iPad最大改良點，係解像度比舊版提升一倍，可謂前無古人，但新iPad玩HD一早吹到行一行，唔算驚喜。

香港首賣
首賣地方達7個，乃係歷代i系產品之最，香港一向都係2、3輪之選，今次能夠擠身首輪之列令人驚喜，仲要發布之後即刻有得預訂，搞到成班果迷、炒家通宵狂按F5。

高層唔掂機
無論係Tim Cook定Phil都冇親手掂過部The new iPad，試game就搵game廠人，就算試自家《iWork》都係搵app開發者上嚟試。唔似Steve Jobs會親手把玩一輪之後讚嘆部機有幾靚，感覺更親力親為，建議Tim Cook下次拎上手玩吓，我哋記者登佢個樣都冇咁悶。

去吧！新生蘋果軍團
iPhone 4S仲可以話係Steve Jobs遺作，今次The new iPad就真係後Steve時代第一次i系產品發布會。以前教主魅力沒法擋，發布會似宗教聚會，睇到個個蘋果迷如癡如醉！教主接班人Tim Cook同佢嘅團隊表現能否繼承衣缽？一齊睇吓今次The new iPad Keynote重點。

宗教式公布
Tim Cook講完配角 TV後，先係大讚iPad係劃時代產品，又問有咩產品可以打敗咁勁嘅iPad？最後帶出主角The new iPad，自問自答呢招似足Steve Jobs，主角出場，全場畀足面拍爛手掌。

冇咗one more thing
臨尾Tim Cook再次上場，人人都期待佢會講one more thing。不過佢只係話2012年會有更多驚喜畀大家就完場，唔少人嗰時至恍然大悟The new iPad係正式名字，唔係暫稱。

矚目新功能
Phil淡定講出新功能，仲話新機像素比身後大屏幕更高，雖然做足功課，但今時今日新產品冇以前咁保密，新功能一早洩漏晒出嚟，台下一早心裏有數。

售價公布
Phil最多人拍掌位係講及售價之時，同iPad2一樣冇加價，的確值得拍手讚好。

全新iPad大起底
全新iPad用上Retina高清顯示，個芒夠sharp，但因為今次變化唔算大，好多改良點都有啲唔清唔楚。好似4G咁，唔覺意以為水貨4G可以喺香港玩，特登搵人去外國幫手買就慘！以下係各位決定買唔買之前，要留意嘅細微位。

專家論盡Retina 攝影師 Antony
影相行家對Retina屏幕一致睇好，因為家用數碼單反影相過落iPad相當方便，Canon都有原廠WiFi手柄可以無線過相，我哋好多時都會用iPad present畀客人睇相。除咗像素問題外，舊iPad色水有啲淡，期望新機會做得更好。

app開發者 Ivan
一早都有消息知道新iPad會提高像素，我哋班Developer都要畫過晒啲圖，update之後嘅app，容量難免會加大，所以16GB版未必夠用，要留意。

全新iPad男女say Macitizen會長 Derek
其實iMac系列轉款都會稱The new iMac，唔使執着The new iPad。自己最高興係有Retina顯示，唔滿意係比iPad更重，但整體都冇話失望。蘋果冇責任每次都給地球人帶來「驚喜」，即使Steve Jobs時代也如是，冇驚喜唔係等如失望。

GME淘女郎 Kabby
最想係用嚟睇相，家有iCloud，用iPhone影完相就自動喺iPad睇到。個芒咁靚睇相一定好開心，一定會影多啲相upload上淘女郎facebook同微博。最開心係價錢冇變，希望今日講完會有人買部送畀我啦！

1 何謂Retina屏幕
今代iPad最大改良點係Retina屏幕，究竟有幾靚呢？新iPad解像度由上代1,024×768提升1倍至2,048×1,536，比高清電視嘅1,920×1,080仲多約100萬像素！睇相拉到大一大聞相都唔起渣，而且色水亦會更鮮艷飽和，堪稱流動裝置第1芒！因為解像度唔同，舊app未update可能會放大起渣，新機入手唔好以為係壞機。

2 香港4G未對應
新iPad另一賣點就係4G LTE無線上網。4G技術嚟緊都係香港大趨勢，暫時CSL亦有提供4G LTE服務，但要留意新iPad嘅4G LTE係美國制式，頻譜為700/2100MHz，同CSL嘅1800/2600MHz唔同。因此，目前喺網站預訂只有WiFi版而冇4G版，相信要啲時間先會出到香港4G版，至於會唔會有3G版就未有消息喇！

3 重了皆因電池勁
睇真啲，新iPad比iPad 2厚咗6mm，重咗51g。外間估計係因為電池強化之故，家流動裝置最食電就係個芒，用上Retina屏幕都能維持喺10小時使用時間可見粒電勁咗。

4 新U主攻打機
上一代iPad 2改雙U，用咗好多數據圖表話你知快咗幾多，今次新iPad只輕輕帶過佢粒A5X quad-core處理器。睇真啲，佢嘅CPU核心只係雙核，四核其實係指顯示架構，所以速度唔會快太多，主要提升係顯示方面，所以拎咗幾隻game做demo。

iOS 5.1冇大改　新app主打《iPhoto》
軟件方面，全新iPad跟機連iOS 5.1，今次update最大改良點係加咗日文Siri，不過新iPad就只有語音輸入冇Siri，得物無所用。至於新app主打係Mac機都有嘅《iPhoto》，除咗執相之外，仲有個journal功能畀用家以相片寫遊記，盛惠4.99美元。 iOS 5.1主要更新內容：1.可於Photo Sream直接刪除照片 2.語音助理Siri加入日文支援 3.相機快捷鍵長駐鎖定畫面 4.相機會標註所有偵測到的臉 5.iPad預設相機app重新設計 6.優化iPad在音樂和影音播放時嘅放音能力 7.修正影響電池續航力嘅Addresses bugs

香港首輪賣！全城再喪炒
新iPad無論規格同功能未必個個like，之不過開賣日期就真係畀咗個驚喜香港人。事關香港同美國、澳洲一齊列入首輪賣機嘅10個地方之一，同步喺本週五開賣！雖然香港只會賣WiFi版先，仲未公布有冇香港4G版，更唔知有冇3G版，但相信唔少果粉都會有理冇理買咗先。當然今鋪最開心肯定係班炒家，有得全球一出即瞓身炒。香港 Store更出奇不意咁喺發布會之後個下午開放畀人預訂新iPad，結果即日訂爆，等到現貨喺星期五開始送到炒家手上，炒風實會再起。不過，iPad不嬲冇iPhone咁好炒，所以好多先達友都估新iPad嘅炒價冇以前咁癲，炒賣周期亦會短好多！

The new iPad
WiFi版行貨定價 16GB　$3,888 32GB　$4,688 64GB　$5,488

隱憂1　愈炒愈短
眾所周知，強國對iPad嘅需求比iPhone細得多，而且唔少人已經有1、2代喺手，新iPad個樣冇乜唔同，好難支持炒價。再睇往績，元祖iPad水貨連行貨炒咗半年，但iPad 2只炒到4個月，所以預計新iPad可能炒唔過兩個月。

隱憂2　外國任訂
其實除咗香港，其餘9個首賣地方嘅網站，至截稿日都仍然任人訂機，更因以下3大水貨來源地嘅16GB WiFi版售價都同香港差唔多，所以預料會有大量水貨流入香港，令行貨炒唔上天價。更危險係外國任人訂，反映外國需求細，香港貨量一多，好快會炒完！

3大水貨地16GB WiFi版定價
美國美金499（約$3,871）新加坡坡幣658（約$4,080）澳洲澳元539（約$4,448）

先達大莊Lo哥：初頭賺$500
iPad 1、2代初期，啲炒家只會拎好少水機嚟放，回收價先至可以比原價高千幾蚊。但當行機有得賣時，回收價就跌到得番只賺幾百蚊。而今個星期五就會有勁多行機湧嚟放，我估初頭每部只賺到$500左右。

雪糕三文治反咬iPad
正如卡通片所講：「有邪惡嘅地方就有正義」，有iPad嘅地方就梗有Android tablet！新iPad放軟晒手腳唔大改，畀晒機會Android反攻，又咁好彩呢期Android tablet開始升級玩4.0 Ice Cream Sandwich OS（ICS），有新talking point俾人講，連timing都賺埋。香港首部原生行ICS嘅Acer Iconia Tab A200啱啱推出，其他大廠勁機仲陸續有嚟，就算一部揪唔贏，幾部圍揪都一定輸人唔輸陣！

A200夠平唔夠快
作為ICS頭炮，A200賣$3,398算係平。不過可能因只有雙核1GHz嘅關係，筆者捽佢個介面時，感覺唔算好快，真係一分錢一分貨。

Spec.
屏幕：10.1" 1,080×800 系統：Android 4.0 處理器：雙核心1GHz 鏡頭：前置200萬像素記憶：1GB RAM、32GB內存、microSDHC 傳輸：WiFi、藍牙、USB 體積：260×175×12.4mm 重量：710g 售價：$3,398 查詢：Acer（2520 2000）

ICS靚咗唔彈app
雖然ICS一早已跟埋Samsung GALAXY Nexus手機推出，但用喺tablet上，點都會有啲唔同，亦係一個全新體驗。筆者玩完Acer部機，就覺得佢個介面唔只比上代3.2 Honeycomb執得更企理美觀，最正仲係好多強迫彈app嘅問題消失咗，睇嚟Android做咗唔少改良，另外仲新增以下3個新功能。

Android舊tab齊劈價
隨住新iPad推出，仍生存嘅16GB iPad 2都劈價至$3,088（WiFi版）發售。Android tablet向來睇住iPad定價，所以一眾行緊Android 3.2嘅舊款勁機都減晒價，去腦場買仲會再平$100、200。其中最抵玩係Sony部Tablet S，仲講明好快會升到上ICS，不妨買定等升級。

ICS勁tablet即將殺到手寫巨板Samsung GALAXY Note 10.1
將原本5.3吋芒嘅Note手機，再放大到10.1吋，同現有最大芒嘅GALAXY Tab睇齊。特別之處係keep住有S-Pen畀人玩手寫甚至圈圖退地，出街時玩《Draw Something》，用佢就fit晒！ Spec.：10.1"屏幕．雙核心1.4GHz CPU．300萬像素鏡頭．3G+WiFi 預計推出日期：今年第2季

實惠升級 Samsung GALAXY Tab 2 10.1
根據慣例，銀河艦隊梗唔會只得一部新tab畀大家揀。如果你肯定唔會用筆，就可以揀純篤芒嘅新一代G-T 10.1，少咗支S-Pen，粒U亦慢咗，相信機價會平啲，不過終於加番micro SD咭槽。 Spec.：10.1"屏幕．雙核心1GHz CPU．30+300萬像素前後鏡頭．3G+WiFi 預計推出日期：今年第2季

勁料機王 Asus Transformer Pad Infinity
照舊可以加裝keyboard，兼且有4核U同1,920×1,200超高清芒，再加拍到1080p片嘅800萬像素鏡頭。雖然未知佢嘅4G喺香港用唔用到，但肯定佢係今年上半年嘅Android tab王！ Spec.：10.1"屏幕．4核心1.6GHz CPU．800萬像素鏡頭．4G+WiFi 預計推出日期：今年第2季 ####