close
Mia（左）同旁邊的女仔搭膊影合照，被人誤會佢哋係蒲場好姊妹，仲笑佢哋撞膠面。經查證後，該名姊妹原來只係 Mia嘅馬來西亞 fans，純屬笑話。
Mia撞樣女係粉絲
媽模 Mia陳靜儀，入行咁耐唔係傳佢溝仔就係整容，最近仲誇張到話有個一模一樣嘅「孖生」姊妹一齊夜蒲，驟眼睇合照兩人無論衣着、髮型甚至輪廓，尤其係個間尺鼻都似足九成，卒之被網民狂笑佢哋因為喪整容而「撞樣」。
不過 FBI聽到個真實版本，原來同 Mia撞樣嘅女人，並唔係 Mia嘅朋友，而係 Mia喺 3月頭去吉隆坡夜場 Zouk打碟登台時，一個衣着打扮同佢有九成似嘅馬來西亞女 fans走埋去要求合照， Mia見對方咁熱情並冇即時拒絕，點知幅相出街後個個話佢哋係整容孖妹。
FBI問 Mia同女 fans撞樣， Mia講笑：「影相時我唔覺得似，既然大家話似，不如我哋組成一隊孖妹組合打碟。」至於整容， Mia就冇咁好氣：「都傳咗咁多次，我都冇氣答大家。」
經常被懷疑整容嘅 Mia，最近就喺 fb狂呻，有時啲問題好複雜，但答案其實好簡單，仲強調大家可諗到我每樣嘢都係真。
撰文、攝影： FBI
全站熱搜
留言列表
