面對面
衣櫃裏的朱艷強 少爺占
身高 5呎 8吋，體重得 124磅，少爺占開來影樓的坐駕，卻是價值 45萬的寶馬 X1商務車，成熟穩重，與他的 outlook一點不襯；外形瘦蜢蜢，整天自嘲攣味重，其實另一半畢業後從未打過工，被少爺占矜貴養起 18年，一時間，我想不起來有誰能比他更 man；靠把口搵食，一貫形象噏得就噏，卻原來比誰都能守得了秘密，剛剛過去的情人節，才自揭七年前已經秘婚。
原名甄子康，現年 36歲，既是 DJ、也是主持、作家、演員、樂隊野仔、與 Boy Band艾粒的成員，少爺占最愛玩出其不意，一玩玩足 15年，終於玩到厭：「你叫我好似前幾年咁，同阿奴着住泳褲油晒顏色扮叮噹咁走落去觀塘行一轉，已經唔係好做得出。人，唔同年紀，應該玩啲唔同嘅嘢。」
4月，少爺占帶埋自創的攣人「朱艷強」在新光戲院開 talk騷，一加再加， 12場全爆。
一係唔玩，一係就化行妝露埋點笠住假髮玩盡佢，少爺占話，公布婚訊的最大原因是，係時候玩生仔，做老豆。
這一次，應該是朱艷強最後一次走出衣櫃，當有了 BB，就係時候與「艷強 BB」說再見。
執得多
21歲，還是理工大學設計系學生，就勝出商業 2台「捲入漩渦」 DJ招募計劃加入電台；做做吓電台，就得前輩唐劍康（ Donald）提拔兼做下把組成拍檔，成就了日後在播音、歌唱和電視界都舉足輕重的搞鬼組合；然後出書、出碟、寫廣播劇、做舞台劇、出任電台高層、主持電視節目、再成立自家時裝品牌 Meeh，少爺占相當明白事理：「我都好想講自己唔係太順利，講到個人生唏噓啲，可惜唔係，我事實就係咁順風順水。好處係，想做就有人畀我做、唔想做時畀我唔做，唔好處係，做起專訪上嚟，咪唔夠人哋嗰啲咁好睇囉。」
幾巴閉？上月自爆已婚，被問到是否要幫 talk騷宣傳，他答得更寸：「 Talk騷啲飛一早賣晒，唔怕俾人話宣傳我至講出嚟！」頭五場門票情人節前沽清，一加五場門票又再賣清，上週又再宣布加多兩場又爆埋，少爺占話，其實新光戲院每場人次僅得 400人，加極都執得唔多：「搞呢個騷用咗我大半年時間，唔係冇得執，不過唔夠我𠵱家幫人拍一條片、錄廣告執得多，大半年時間執返嚟嘅，仲唔夠我坐喺度一日賺嘅。」
經歷唔得唏噓，環境唔得迫人，少爺占於是習慣了自己迫自己：「手機程式可以 upgrade，電視畫面可以靚咗，但係做電台冇得玩咩花臣，唔會話聽日啲聲靚咗、或者㩒個掣就有嘢彈出嚟。做電台就係咁，冇人迫你，自己都唔迫自己 upgrade，咪就係坐喺度囉……所以我咁多年嚟，乜都試吓、乜都搞吓，入行十五年，開始進入收成期，唔使用腦又唔使出力，口擘擘就有錢收時，又驚自己變懶，於是乎自發性地搞個騷，純粹好玩。」
少爺占話分身「朱艷強」靈感來自身邊同志朋友，較早前（ 2日）舉行 talk騷《口口笑》記招，亦攣到爆找來兩個外籍猛男襯托。《蘋果日報》圖片
06年開始升職做 903音樂總監，每週與四大 DJ聯同俞琤開會擬定全台播歌名單，換言之，少爺占位高權重有能耐左右《叱咤》賽果。《蘋果日報》圖片
拍戲不成，自認不是演員的料，不過自己擔任主音及創作的樂隊野仔，少爺占就話發展不如理想，耿耿於懷。《蘋果日報》圖片
玩夠囉
每個人都難逃一老，當軟硬踏入四字頭、仔大女大、升上廣播界神枱之際，不經不覺，接棒在電台玩過界的艾粒亦已經三十好幾、分別結婚，開始探討係唔係玩夠的問題：「唔係話唔玩得，係唔同年紀玩唔同嘅嘢，曾志偉話全香港淨係得艾粒推咗佢套《我愛 HK》系列，因為我唔係嗰種人、拍唔到戲，人係要去到咁上下大個，先會認清楚有啲嘢自己真係做唔嚟；我大學讀設計，一早就想玩番設計做時裝，但係以前細個，搞得成都唔會有人信你，𠵱家話晒係一個佬吖嘛；但係扮女人、扮叮噹，畀我少爺占， 36歲，真係唔係好想再做呢啲，但係換一個身份由朱艷強去做，條底線又可以低番啲喎，我仲係好鍾意玩，一諗到朱艷強有啲人愛、有啲人又至憎，我就覺得好好玩。」
高峰時期一年出五本書、同時間身兼多職，兩年前宣布不再出書，又放慢腳步每年只做一個大 project，少爺占話唔係佢錯，係社會進步的錯：「 22、 3歲個腦轉得快，因為專心吖嘛！𠵱家唔只我唔專心，成個世界都唔專心，又 facebook、又微博、又 Instagram、又微信，影張相仲要用美圖秀秀改圖做效果，咁就用晒啲時間。」
有報道指，少爺占自從 06年升職做節目監製及音樂總監後，每週定期與俞琤開會擬定全台 DJ playlist，操播放率及年終《叱咤》賽果生殺大權在手，位高權重得很。玩少咗、穩重咗，到底是科技進步的錯，還是身份今時唔同往日？
中五會考美術攞 A、大學考進理工大學設計系，設計夢卻在 15年後才創立品牌 Meeh時完成：「當年半工讀做電台，即係只用一半時間畫嘢，同學畫得靚過我好多。」《忽然 1周》圖片
以往同艾粒拍檔阿奴形象騎呢，周不時扮女人、扮卡通人物周街走，少爺占話換着𠵱家，接受唔到。
「我懷疑係想我返多啲工，至升我上嗰個位啫！其實聽落勁，實質冇咩做，高咩層呢？陳志雲嗰啲就係高層……唔係，係雲層至啱！公司都冇人叫我做占哥，個個見到我照講秘密、照寸我，真正做呢行，就知我個 title唔算高層。不過男人大咗、錢多咗、要顧嘅人要諗嘅嘢都多咗，呢樣係真。」顧啲乜？咪頭家囉！
直到爆
緋聞少、同性密友多、生得瘦弱，又愛在節目裏扮攣人，少爺占說這次是 talk騷宣傳期最後一役，所以玩盡佢扮澳洲妖味極重男模。不過，上了女妝、戴上假髮，在相機前一站，叫他嫵媚些咪眼咬唇同嘟嘴，少爺占其實非常硬倔，直到骨子裏。
「 2月 14號係我哋（圈外老婆 Tina）結婚七周年，咁啱早兩日又已經賣晒啲飛，個秘密已經守咗咁耐，我覺得個 timing啱，咪講出嚟囉。我希望無論雜誌報紙 facebook定微博都係同一段說話，而微博又規定咗 140個字喎，嗰 140個字就用咗我幾日時間去諗，每一句講啲乜、每個標點符號擺喺邊，全部都度過。其實我好浪漫，嗰段字每一句都有意思，睇得明嗰個，即係我老婆，會覺得我好浪漫。」
要講正經嘢，少爺占就開始冇厘正經：「呢件事由民國初期開始醞釀，當時我啱啱剪咗條辮，散開啲頭髮，跟住交咗條辮畀我老婆做信物；嗰陣時盧覓雪仲做緊《東週刊》，跟住佢做飲食節目，食乜都話：『真係好好味，我唔同你哋講住，我要食嘢啦！』；我同我老婆唔係幼稚園一齊，其實係中六先至撻着，當時我有男朋友，佢都有男朋友；我係年青人偶像嚟㗎，簽咗間日本經理人公司要做 Super Senior，份約規定咗唔結得婚，一結就告我毀約同剃我頭……」
今年情人節，突然在微博宣布原來與女友 Tina一早註冊成為夫婦：「七年前資訊冇咁發達，唔想逐個打電話通知，索性一齊守住個秘密，睇吓邊個守得耐。」
09年 8月，香港傳媒發現可以在美國政府網頁查閱結婚資料，從而揭發劉華、黎明、楊千嬅的已婚秘密，原來百密一疏，揭漏 06年同樣在美國註冊的少爺占：「嗰年我個心都離一離，又上網去 search吓自己個名，原來 check到㗎！不過，我唔夠紅囉……」
紅呢樣嘢，唔使下下要同劉華、黎明比嘅，喺廣播界紅咪得囉。
至於專一，記者本人、同事、朋友都喺西灣河大，西灣河街坊，有邊個未見過少爺占拖住 Tina放狗散步買串燒呢？當事人唔提啫，其實成個西灣河都知少爺占有幾專一。
少爺占公布的官方婚訊，每字每句都度過，得幼稚園已經係同學、 19年前正式撻着嘅 Tina明。
撰文：朱小博
攝影：吳偉業
化妝： Krisie Wong
髮型： Johny Wu@Hair Corner
形象： Bryan@ the Flaming
服裝提供： Midwest、 PUMA
留言列表
