徐子珊識撈拉票 硬撐不發牌
無綫以約近百萬元首次搞大型盆菜宴，請了二千台前幕後工作人員，更於現場大耍溫情牌，行政主席梁乃鵬一邊在台上踩到王維基「慶合合」，台下的徐子珊則全套裝備硬sell自己為視后拉票，更帶頭反對政府發牌，夠晒識撈！
正值王維基的「香港電視」急於發牌不斷發功之際，無綫、亞視都出盡法寶阻止發牌，無綫除了於之前「香港電視」命名儀式當日急急召開台慶記者會，以強勁小生、花旦陣容擺明車馬對撼外，昨日再度「出招」還拖，一連兩日於電視城舉行首次大型盆菜宴，兩日費約一百萬元，昨晚筵開179席之餘，更邀請二千名台前幕後員工撐場顯聲勢，出席的藝人包括黎耀祥、陳豪、胡杏兒、徐子珊、曾志偉、苟芸慧、陳敏之、郭晉安等，同場更有高層樂易玲、曾勵珍、李寶安、區偉林等演講，鼓勵士氣。今晚將會再擺153圍，1800人出席，其中包括的藝員則有鄭嘉穎、陳法拉、馬國明及薛家燕等。
徐子珊佩戴彩帶、拎起大聲公於現場拉票，不介意被指厚面皮。
有指不少一線生旦支持政府發新免費電視牌照，無綫昨日特別透過藝員部經理向旗下藝人發出短訊作「溫馨提示」（詳見另文），外事部副總監曾醒明謂：「我哋內部發出呢個訊息，係想公司職、藝員更加清楚知道公司嘅立場，公司透明度亦好高，內外應有共識，純粹一個溫馨提示，直接讓同事知道公司看法。」
陳豪、黎耀祥、岑杏賢、朱千雪、徐子珊與曾志偉等齊齊舉筷。
梁乃鵬與眾高層包括樂易玲、曾勵珍、李寶安等與台前幕後祝酒。
台下齊齊舉杯，現場有抽獎，藝人玩得更high。
掛綵帶滿場飛
「溫馨提示」的出現，令昨晚一眾出席盆菜宴的藝人更清楚公司立場，「識撈」的徐子珊被問到會否支持發牌一事時，即識做帶頭表示反對，子珊表示：「香港市場唔係好大，太多電視台會造成惡性競爭，（怕唔怕發牌令TVB少咗廣告收入？）當然擔心，直接影響我哋收入，希望政府發牌審慎啲，（有藝人表示支持被指不撐無綫！）唔會，大家有唔同方法表達意見。」而今年視后大熱的她非常搞笑，戴上綵帶滿場飛、拿着大聲公的她儼如議員拉票般大叫：「請投8號徐子珊一票！」子珊笑說：「低B啲唔緊要，最緊要拉到票。（會否向梁乃鵬拉票？）都會同佢講，我好大膽，（志在必得？）唔係，驚大家唔記得投票啫！我都有叫海外朋友投票，唔識唔緊要，畀個身份證號碼我，（面皮好厚喎！）唔係，玩吓啫！大家聯誼吓。」
梁乃鵬於台上向王維基大動肝火發炮後，落台時不慎差點跌倒，幸無大礙。
胡杏兒與黃智雯攬到實。
苟芸慧
白茵於無綫効力34年，於現在更獲頒退休獎狀。
杏兒唔怕競爭
對於梁乃鵬向王維基宣戰，胡杏兒表示支持，她謂：「TVB遇強愈強，有競爭先有進步，TVB人才濟濟。（怕唔怕畀人話唔撐公司？）唔會，要發生嘅嘢始終發生，唔應該咁去諗，應令自己團隊更強，我支持發牌，但發幾多同埋要等幾耐就要政府諗清楚。」而陳豪坦言梁乃鵬很犀利，聽到現場同事「慶合合」，提到發牌，陳豪謂：「我好易話為，最緊要以和為貴，希望成個環境可以更上一層樓，公司睇法同個人唔同，但良性競爭係一件好事，（支持發牌？）希望政府一視同仁，無論發幾多個牌都要公平。」而黃智雯被問到支不支持發牌時，她指有良性競爭是好事。
對於無綫發內部短訊，身在內地的林峯表示未有收到，但卻堅持力撐政府發牌，他謂：「我立場依舊，咁公司立場係啱嘅，我所講嘅係代表自己，贊成多個平台去做嘢，有競爭先有進步，令大家更有動力去做好啲，但呢樣嘢同政府發唔發牌係兩回事。」
TVB昨向全體藝員發出短訊，列出五大點來表明無綫對發免費電視牌照的立場，當中還指出因應政府要求加大投資額至2015年，故新牌照應待2015年後才發出，而各點詳細內容如下：
致：TVB全體藝員
就新免費電視牌照申請，TVB的立場撮要如下：
１．TVB並非盲目反對發牌。
２．但是，發牌前，政府有責任向社會交待三個重要問題：幾多個牌？俾邊個？幾時俾？
３．幾多個牌？
免費電視台依賴廣告維生，但電視廣告市場卻受高度規管，人為地收窄了電視台的廣告發展空間。
若政府決定要無限量發牌，則必須同時解除所有不必要規管束縛，讓各電視台可以真正自由競爭。
若政府要保留高度規管模式，則必須先研究香港市場可以支撐幾多個免費電視台，以免造成「僧多粥少」、惡性競爭的情況。
４．俾邊個？
研究結果一出，政府便應：
（a）向全港公布；
（b）邀請所有有興趣公司投牌；及
（c）在公平、公開的機制下，依據評選準則，發出牌照予最合資格的申請者。
５．幾時俾？
由於TVB及ATV應政府及監管機構要求下加大投資金額至2015年，事前未被知會在2015年前會大量增發新牌，因此，所有新牌照應待2015年後才發出。
2012年12月11日 17:56
梁乃鵬誓師大會踩王維基
無綫行政主席梁乃鵬昨晚於盆菜宴上，上台如舉行誓師儀式般，公然率眾向「香港電視」開火，更指自己不會驚，亦不怕無綫地位受影響。梁乃鵬不停踩王維基的「香港電視」，坦言接受挑戰的他表示要對持股人有交代，他指為何股東唔買i cable、「香港電視」同Now的股份，證明股東支持無綫，他謂：「對唔住，我字典冇驚呢個字。」他又批評王維基2003年已經營一個收費電視台，但做得不出色，又睇死王維基，說：「王維基話TVB啲劇冇創意，但佢哋嘅宣傳人員係來自TVB ，介紹工作人員時都係講自己喺TVB拍過乜嘢劇。」
曾志偉如無綫高層般，向員工大耍溫情牌，穩定軍心。
他又即場呼籲員工勿信王維基經常指製作多少小時劇集，要分析同邏輯，就知佢有冇料到，又指他有很多破綻，又謂：「無綫今年45周年，到46、47年股東會讚，不過其他公司可能第一次公布業績時已令人勞氣，第二年就會MM聲，到第三年祖宗都會畀人問候，TVB唔怕競爭，只要公平一定會贏。」發炮連珠的梁乃鵬落台時，不慎差點跌倒，即時有人上前扶他，事後再問他今次活動是否穩定軍心，他坦言：「可以咁講，鼓勵大家士氣。」
志偉幫口
而曾志偉亦於現場大打溫情牌，更代表TVB跟同事說：「TVB係非常之有希望，我兩年前都好失望，頭擰擰，不過依家高層接受意見，之前有同事話因為台慶飯而覺得值得留低，我同高層反映咗，結果有呢個盆菜宴，有TVB呢個家庭好難得，有家嘅感覺，呢半年公司都好團結。」
王維基戥露天食盆菜慘
無綫在電視城露天停車場連擺兩日千人盆菜宴大晒冷，向敵對「香港電視」之王維基宣戰，而「城電」方面卻於十日後亦進行100藝員大晒冷的周年晚宴，與無綫抗衡。不過，對無綫藝員、高層「慶合合」宣言，「香港電視」冷眼旁觀，並為無綫等人要在寒a冷天氣下戶外食盆菜而叫慘。
王維基
對於梁乃鵬指王維基沒有邏輯之說，王維基昨晚透過WhatsApp回覆：「來年有十隊攝製隊同時拍攝，每年650小時嘅目標是切實的，有實際營運經驗嘅人可了解，而我上星期日出席《城市論壇》討論免費電視問題，兩個現有電視台拒絕出席，我認為無綫若有意見表達何不出席與市民一齊公開討論，讓各方公平表達意見。」至於股價問題則沒有回應。
留言列表
