Main Camp

老爺相機賺 1球　浸大副學士變新紮鏡王

2012年12月12日 ~~ 第290期 Face

數碼相機愈趨普及，只因有大量後期加工可做。一機在手，個個都變攝影大師。不過傳統菲林相機依舊有人熱捧，一部絕版相機加支靚鏡頭，一樣有人甘願傾家。
菲林機有市場。年僅 21歲、現讀浸大國際學院市場系副學士 Yr.2的 Johnson，他除了鍾情於菲林相機和鏡頭，更發現原來古董鏡頭大有商機，於是在市場大量收購靚機，再經過 ebay發售，短短 3年淨賺過百萬，連著名二手相機老闆及收藏家陳烘亦稱他為「新鏡王」。難怪 Johnson豪氣語：「我唔賺多過一千蚊，嗰日我就唔會出街。」

本刊約家住青衣的 Johnson做家訪，他事先聲明採訪不要透露他的家境，並要求記者訪問要爽手，「近來天氣潮濕，對相機及鏡頭都唔好！加上我晚上約咗客賣鏡頭！盡快啦！」之後便小心翼翼從防潮箱內拿出多件珍藏，「這部是 1961年出產嘅 Canon 7，由於有盒有單，世上難求，客人畀幾多錢我都唔賣！」

除了珍藏會放入防潮箱外，其他出售相機、鏡頭因為流通率高，一、兩天就會賣走，所以 Johnson只會放入木盒或櫃桶。

Johnson不單做本地客生意，更會將產品放上網，轉賣給世界各地，包括新加坡、美國、意大利等買家。而每次收貨他都檢查清楚，絕不馬虎。

一次攞 10萬貨

Johnson與一般同年𡃁仔沒太大分別，喜歡潮牌 Visvim及 New Balance，亦熱愛影相，不過玩菲林機及鏡頭卻好有地位，連陳烘都叫他做「新鏡王」， Johnson自信地說：「平均 1星期賺 1萬， 3年就過百萬，我試過一次喺網上收 10多萬貨，我深信『高風險高回報』，一個普通文員不需冒險，做吓影印，回報自然低！香港大學生多的是，每個都是同一條路又點發圍！」

小籠包孝敬

做生意大膽的 Johnson，一次收 10多萬貨都絕無懼色，全靠陳烘向他保證，如果 Johnson入錯次貨，自己會以原價全數收購，不用他蝕錢，一個生意人肯貼錢都要保 Johnson，全靠 3年來與對方建立良好關係，「 3年多前我去佢相機鋪求教菲林相技術，每日一放學就去打躉，更不時孝敬陳師傅最鍾意食的小籠包，有靚貨亦會先賣畀佢，難得陳師傅肯教個死𡃁仔（自己）嘢，冇計啦！」

冧掂老行尊

佢好肯學嘢，一星期落嚟四、五次，唔似得𠵱家啲𡃁仔好易放棄。佢見親我都求我割讓嗰部好罕有嘅 Canon 7-Black Paint（小圖）畀佢，三年嚟未停過，我冇應承佢，不過就係欣賞佢個份鍥而不捨嘅精神。

相機收藏家
陳烘

Johnson平時同記者傾偈好吹得，但一在陳烘師傅面前就變得恭恭敬敬，可見陳師傅在他心中的地位。