《烈探狙擊》中靚佬湯唔只做主角，全部打戲、飛車場面自己親身上陣不特止，仲兼任監製，一腳踢忙爆。
西面
唔用替身 半百靚佬湯搏老命
近年聖誕例必見到靚佬湯（ Tom Cruise），上年一套聖誕電影《職業特工隊：鬼影約章》全球勁收 56億港元，唔怪得今年再推出新戲《烈探狙擊》（ Jack Reacher），繼續 mark實聖誕檔期。
今次靚佬湯唔做特工，轉做神探去查案，但一樣勁多動作場面，肉搏壯漢唔少得，連飛車場面都講明唔用替身，全部親身上陣，已年屆 50歲的靚佬湯，今次名副其實搏老命。
《烈探狙擊》
上映日期： 12月 20日
靚佬湯食老本將《職業特工隊》拍足 4集，今年終於轉吓口味，唔扮特工轉做神探，拍攝改編自全球銷量高達 6,000萬本的人氣小說《浪人神探》的《烈探狙擊》，此片將於 12月 20日在香港上畫，同大家賀聖誕。
冷血兇徒
故事由一個冷血狂徒射殺無辜市民而開始，雖然狂徒被捉，困在監獄，但就要求靚佬湯飾演嘅神探幫佢脫罪，最後被拒絕。
靚佬湯唔幫兇徒脫罪，於是由另一辯護律師 Rosamund Pike（右）接手，因深入調查，最後惹來殺身之禍。只得 33歲嘅英國女星 Rosamund個樣生得老啲，但 05年曾攞過《英國獨立電影頒獎禮》嘅「最佳女配角獎」，屬演技派。
由頭打到尾
《烈》片故事講述一名冷血兇徒殺害多名無辜途人，但兇徒被擒後竟要求 Tom Cruise飾演的神探 Jack Reacher幫手辯護，但 Jack唔只拒絕，仲走出嚟頂證，於調查期間更同辯護律師一齊捲入殺人漩渦。唔好以為靚佬湯於戲中齋查案咁簡單，期間仲會遇到偷襲，所以超多打鬥場面。
一晚企
戲中靚佬湯雖然係神探，但始終係男人，都有好色一面，閒時都會同索女玩 one night stand。
兜頭扑
靚佬湯查案期間，當然有人出黑手暗殺佢，仲趁佢唔為意，從後兜頭扑，超狼死。
街頭搏擊術
據知靚佬湯為拍打鬥場面，開拍前半年，就搵專人教他學源自西班牙街頭搏擊的「奇斯格鬥術」，日練夜練 4個月，練到搏擊姿勢見得人先肯出鏡，超瞓身。
除此，戲中亦有靚佬湯好似賽車手一樣的飛車場面，都係由他親身上陣，高速掟彎，超速急停，全部難唔到佢。今次搏殺的靚佬湯，更是《烈》片的監製，據知他每日拍完戲後，仲要同電影公司開會，所以拍攝期間，每日只瞓得 3粒鐘。話晒靚佬湯已年屆 50歲，仲咁搏，唔怪得仲可以做男主角。
鐵通隊
靚佬湯避得過兜頭扑，暗殺佢班人點會罷手，於是揸住鐵通向佢狂隊，好彩佢手腳快擋得住先唔使死。
1打 3
除查案叻，仲好打得，戲中靚佬湯就示範練咗 4個月嘅西班牙「奇斯格鬥術」以 1打 3，打都打得講究過人。
前妻食自己
靚佬湯自 6月尾同前妻 Katie Holmes鬧婚變後，一直專心拍戲；而一直帶住 6歲愛女 Suri四圍走避靚佬湯的 Katie Holmes，亦終於安定下來，決定定居於紐約，最近還復出演百老匯舞台劇《 Dead Accounts》。雖然 Katie自己搵食咁有骨氣係值得佩服，但始終演技屎，收到唔少負評。
離婚後， 6歲 Suri一直跟母親 Katie生活。據知上月尾感恩節，靚佬湯終於可以同愛女 Suri相聚過節，靚佬湯個心即刻甜晒。
靚佬湯雖肯支付每年 310萬港元畀前妻 Katie同愛女 Suri做生活費，但 Katie一樣自食其力，最近更復出演百老滙舞台劇《 Dead Accounts》。
留言列表
