今日好玩嘢

弓道自在人心

2012年12月12日 ~~ 第290期 Face

香港人雖不算熱愛運動，但真係乜都有得學，好似我哋都介紹過巴西有柔術、中國詠春、泰國 boxing等等，但偏偏香港有西洋箭術、有日本劍道，但就冇日本弓道。
一班日本弓道愛好者，自發成立首個香港弓道協會，閒時自己練吓箭之外，亦相信弓道所表達嘅「真、善、美」自在人心，好適合推廣畀普羅大眾，一齊修行咁話。

互動片段

射畀你睇

香港未有地方學

香港弓道協會
Bruce
全日本弓道連盟(ANKF)二段
弓道年資： 5年

曾經喺日本學習弓道嘅 Bruce，考完「全日本弓道連盟（ ANKF）」二段資格後，發現香港完全冇相關課程同練習場地，於是就跟一班志同道合嘅愛弓之人成立香港弓道協會，並於銅鑼灣佛教青少年中心天台 setup咗練習場，𠵱家定期都會一齊練箭，仲會幫會員報名參加日本嘅弓道研習班、升段試。不過礙於人手所限，只能不定期招募新生，對弓道有興趣嘅就記得多啲留意佢哋嘅網址喇！

香港弓道協會： http：//http://www.kyudo.hk/ 

弓道精髓　射箭不只求中靶

一去到位於銅鑼灣某大廈頂樓嘅會址，會長 Bruce就拎出長 2.2米高過個人嘅日本弓，除咗支弓個樣同歐美款式有異，其實弓道其他細節、要求都跟西洋箭大不同。弓道標準近靶場只係離箭手 28米，相對奧運箭術有成 70米，要射中靶唔算難， Bruce話練一年左右就得，但弓道唔只要求你射得中，更要求射者要有正確嘅禮儀同姿勢。佢有一套名為射法八節嘅標準姿勢，考升段試時，每個姿勢都計分，非常講求射者身體同意志嘅配合，所以 Bruce話日本人唔當弓道係武術，而係有修練成分嘅武道，學完個人精神上都有提升！


2.2米係日本弓嘅標準 size，大約係一個姚明咁高，但實際拎過又唔算重，最緊要拎到平衡感。


初學者練習時個靶會移近，圖中較遠嘅就係標準嘅近靶場距離 28米，大概係一個籃球場全場咁遠。


目前協會會舉辦不定期開放日，畀普羅大眾親身體驗一下弓道。

全日本弓道聯盟昇段試

呢位就係全日本弓道聯盟會長九段範士嘅石川武夫。

「全日本弓道連盟」嘅昇段試除咗考射術、禮儀、姿勢外，仲有筆試。最基本有五級，跟住就考段數，段數由低數起分一至十段。五段後要考取練士、教士、範士等稱號先可以再考上去，愈高段要求愈高，八段範士日本國內都冇 100個，九、十段更係由連盟開會頒發，地位崇高。

習弓多為大小姐

通常入得弓道部嘅都係性格成熟嘅大姐姐，圖為《 Tari Tari》嘅沖田紗羽。

弓道喺日本相當流行，唔少高中、大學都設有弓道部，可能因為其氣派非凡，唔少動漫、遊戲入面都將姿勢優雅嘅弓道選手描寫成成熟、擅於照顧人嘅姐姐系女角。 

咪亂射　射法八節要跟足

武道同一般武術、運動最大分別，就係武術只會設定乜嘢係唔犯規，其他細節任由選手自由發揮，就以踢波為例，理得你腳趾尾拉西定係頭鎚攻門，總之唔係用手指入網就算入球。弓道，比起結果、更重視過程，射手必須跟足「全日本弓道連盟」訂下嘅八個步驟「射法八節」去射每一箭，一齊睇吓 Bruce示範啦！

1.踏足

即係企定埋位，左手持弓、右手持箭（日本弓道不設左手用弓），走到「射位」上準備。雙腳向左右邁開，有晒標準嘅，兩腳距離約為身高嘅一半，展幅約為六十度，腳尖呈外八字。 

2.構身

穩定咗下盆後到穩定上半身，將弓嘅下弧放到左膝，弓需面向正前方，右手則放喺腰間。 

3.上箭

正式將箭搭上弓之前，仍要先清楚做好三個準備動作，右手執起弦線同箭枝、左手執緊弓、看準箭靶，最後先確定搭箭上弦。 

4.舉起

弓道比較特別嘅動作，搭好箭後雙手要拿着弓箭高舉過頭，再慢慢降下成下一個步驟拉開之勢。 

5.拉開

緊接上一個動作，左手托弓右手拉箭，大開雙手弓箭自然下降，將弓箭拉到視線水平。 

6.集中

完成拉開後，開始將箭瞄準標靶，右頰輕輕掂住箭枝，雙唇緊閉，全身靜止，保持力度。 

7.分離

鬆開持箭嘅右手將箭射出，富經驗者會用右手甩開嘅幅度嚟調節射箭力度。 

8.殘心

射完之後都唔係即刻走人，要保持住姿勢數秒，令身心同呼吸一致，保持精神面嘅安定，唔應該過度興奮。 

專家教路　千祈咪心急

Bruce喺度就同大家分享一下弓道心得，總結自己五年經驗，佢認為學弓最緊要有恆心。「初初學成日心急想射中，但係掛住中就會忽略正確動作。唔係射中就好，如何合理地運用肌肉、骨骼、呼吸先係正確嘅射術。」練得弓道多真係修練到心靈， Bruce非常彬彬有禮，解釋每樣細節時都有條不紊、氣定神閒，一向貪快趣、只求結果嘅香港人，真係應該練吓弓。

日本直送　弓道裝備

之前介紹過居合道，去日本買日本刀動輒過萬港圓，唔少人選擇大陸國貨。不過弓道所用到嘅裝備費用唔算太貴，所以一班弓友都會選擇網購日本貨，𠵱家已經搵到一班相熟店鋪，可以幫會員訂購。 

和弓與箭

弓：約$2,500弦：約$100箭：約$1,500六支

五花八門，製料有竹製、木製、玻璃纖維、碳纖等等，初學者買比較便宜嘅玻璃纖維弓即可。弦同埋箭都需分開購買。箭則推介用鋁箭，比較便宜。 

道着

去日本考昇段試時一定要穿正規服裝，不過自己練習唔需要一定着，特徵係名為「 袴」嘅下擺，兩側成 V字形。約$1,200 

手套

日本弓回彈力都幾勁，好易彈親手，所以右手應該戴皮手套，一般會保護 3隻手指，但如果支弓條弦好大力，有時要用到保護力強嘅 4指護手。約$1,700 

護胸

睇動漫見到心口有塊護胸咁有型，其實女仔先會用，男士們就唔好貪靚戴錯喇！約$40 

練習用橡筋

《 Slum Dunk》櫻木上場比賽前，都要喺場邊練運球。日本學弓道嘅學生，拎起弓箭學射箭前都要用呢款練習橡筋學姿勢，學成年都未可以拎起支箭。約$150 

赴日學弓道要懂日文

弓道社喺日本好常見， Bruce就係日本讀書時於東京都內嘅弓道社學習。識日文佢就唔會介意你係咩人士，有教無類，不過就唔見有為外國人授課嘅海外班，唔識日文嘅話都係求學無門。

山武弓具店網址： http：//http://www.sambu.jp/


目前協會成員主要都係親身去日本或者網購弓道用具，一套弓箭大概$4,000左右搞掂，不過又要填日本地址又要填日本信用咭，自己 bid未必搞得掂。


日本有唔少室內體育館 Sport Center設有弓道場，室內都射得箭，但就缺乏為外國人而設嘅班。

欣賞弓道　係一種享受

王大導套《一代宗師》就快上畫，好多人都質疑套戲打得唔夠激變文藝片。其實武學除咗求好打之外，仲係一種藝術、一種美嘅表現。好似弓道咁，慢吞吞滋油淡定，單係睇住箭手挽弓嘅優美姿勢確係一種享受，唔只肉體有增長，連精神都當堂升呢，人都集中啲，確係值得推廣。 

撰文：司徒港燊
攝影：傅新發