面對面
歌星仔之王 小肥徐智勇
30歲才出道， 30歲時唱紅〈寵物〉，今年 36歲的小肥（徐智勇）食住〈寵物〉個老本食足六年，總算等到另「一首歌」。
新歌〈一首歌〉，短短兩個月唱到街知巷聞變四台冠軍，簡單一個道理，正是首歌有血有淚有故事：這圈子，有多少人像小肥一樣，有功力有態度卻遲遲冇得發圍，欠的正是一首歌。
終於等到這首歌，經理人黃柏高教他着貴啲、說話穩重啲、走出來有台型啲，親自跑電台打關係搞祝捷會；填詞人火火語重心長，叫他從此以後不要再心甘情願坐在頒獎禮觀眾席，要有想上台拿獎的爭勝心……
別人想推他做 K歌之王，偏偏小肥咧嘴傻笑說不急：「我喺澳門出世澳門長大，啲性格十足澳門人，我一啲都唔覺得前幾年有幾難捱，亦冇真係咁想紅，逍遙啲唔好咩？
爭名逐利好快老㗎，所以人人都話我唔似 36歲囉！」
K歌之王自有 K歌之王的風光，小肥說，其實歌星仔，亦有做歌星仔的樂趣。
傻人有傻福
小肥原名徐智勇，父母是香港人，兩個姐姐亦在香港出世。七十年代因為一個工作機會舉家遷至澳門，小肥因此在澳門出世，同時擁有港澳兩地戶籍。小肥說，澳門人純樸簡單，十八歲，才第一次被朋友拉去卡拉 OK，人生第一次當着別人的面唱〈李香蘭〉。
「我細個好毒㗎！冇朋友、唔出街，最大興趣就係唱歌同畫漫畫。不過唱親都要等全屋啲人走晒，一路唱仲要一路聽住啲門聲，有人返嚟嗱嗱聲入房扮冇嘢。漫畫，我自編自畫咗好多集，諗住有一日出書㗎。其實畫埋啲山寨《龍珠》，𠵱家絕對唔好意思攞畀人睇。不過因為畫漫畫，我識咗改變我一生嘅朋友——小霖。」
小霖（鍾楚霖）是小肥在澳門名牌男校粵華中學的同學，不只帶小肥第一次唱 K、第一次參加歌唱比賽，還與小肥一齊報班讀聲樂、合組男聲組合「 C Plus」，甚至合組製作公司「棋人娛樂」，更與黃柏高牽線簽約，一手一腳鋪出小肥的歌星路：「我份人冇生意頭腦又冇乜人生大計，傻更更冇殺傷力，唔知係唔係因為咁，反而遇到好多貴人同機遇，呢啲係唔係傻人有傻福呢？」
小肥與小霖，一個肥一個瘦、一個黑一個白，開始唱遍港澳歌唱比賽、在澳門大小酒廊游走賣唱， 00年過大海打入《英皇超新星大賽》決賽，輸了比賽卻成為澳門樂壇之光，命運因此逆轉：「返咗澳門，汽水公司自己搵上門話贊助我哋出碟；我因此多咗機會幫兩邊音樂人唱 demo；唱完〈 Last Christmas〉同〈無賴〉，同時間竟然有兩間唱片公司（英皇唱片及金牌大風）搵上門。我仲記得嚟香港見 Paco嗰日，我哋去朗豪坊行街。我興致勃勃行街買嘢，小霖就成個晏晝粒聲唔出心事重重，嗰晚佢打畀 Paco話決定簽我畀金牌，佢就留守喺澳門睇住間公司。」
新歌〈一首歌〉被指有望是年度金曲：「俾人講 咗五年〈寵物〉，至有第二首歌跑出，我唔敢諗太多諗太遠，獎項到手先至算。」
〈一首歌〉填詞人火火（右）曾經鬧醒小肥（左）：「佢話我行出 嚟代表一個字頭，工作除 咗享受，仲應該負責任。」《蘋果日報》圖片
歌星仔心聲
06年，小肥過大海開始了孤身闖蕩樂壇的日子。拍檔兼經理人小霖每月資助一萬元生活費，小肥用六千塊在太子租屋住，剩下四千每月食用零錢，雖然拮据，但不忘感恩：「香港消費指數高過澳門好多，四千蚊冇耐就用晒，成日俾拍檔叫我唔好咁大使……寃枉到呢，搞到我再冇錢用，都唔好意思再同佢開口……冇嘅，咪食多兩餐公仔麵囉。又唔係冇得食，我都唔算好難捱啫，我有個好拍檔、又有間有人情味嘅公司，每日開工保母車停喺門口接我、去到邊有同事幫我打點、開完工有酬勞有錢分……以前我以為呢啲嘢係入行附帶條件、理所當然，做落先知唔係，好多人自己坐車入電視台、出入冇助手帶、做咗幾年仲爭緊公司錢。呢行好殘酷，我坐喺度幾年等首歌有幾難捱？好多人連等都冇得等，一早俾個行業淘汰埋！」
小肥說自己很容易滿足，做足五年樂壇奀星，還有得留低已經是恭維：「好多人叫唔出我個名，起碼都知我唱過首〈寵物〉呀！起碼仲有人替我唔抵，唔係想我死快啲喎！最刻薄咪話我唔夠靚仔之嘛，起碼冇人踩我最有信心嗰樣嘢（唱功）囉！」
前度金牌師兄側田大把名曲尚且說香港樂壇難搵食，要北上發展，小肥說做歌星仔的好處是，慳番門面裝潢養活自己容易得多：「我可能出碟唔多、電視又上得少，喺香港亦都唔夠人多騷。但係我有樣嘢好，澳門人當我係寶，一有騷就醒起我。香港太紅就會好困身，好多工作都係義務，澳門又有樣嘢好，好多喺香港冇錢收嘅騷，澳門樣樣都計到足……呢個世界好玄妙，閂你一道門就會幫你打開另一道窗，我鍾意咁樣平衡自己，有陣時信心喺呢個地方失去，咪喺嗰度再搵番囉。」
中學同學鍾楚霖與小肥合組 C Plus夾份開製作公司，又在小肥闖蕩香港初期全力接濟，夠義氣。
因為唱〈無賴〉 demo出眾被黃柏高羅致旗下，多年來用心栽培：「 Paco話我係爭一首歌，〈一首歌〉就係 嗰首歌。」《蘋果日報》圖片
2000年小肥與小霖打進《英皇超新星大賽》決賽，當年參賽者亦有衞蘭。雖然輸掉比賽，小肥回到澳門後卻成為當地樂壇名人。《蘋果日報》圖片
情來自有方
唱起情歌來聲嘶力竭感情豐富，不說不知道，其實小肥的初戀在來港發展後才出現，短短一年，就是小肥的全部愛情體驗。我問小肥，初戀是甚麼年紀的事，小肥竟然回答：「初戀？不如你問我幾多歲先第一次見女仔好過啦！」
「我讀男校大，怕醜到爆又毒到爆，仲要好單純。十八歲至第一次同朋友去唱 K，連 㩒遙控同揀歌都手震；亦都係嗰次唱 K，有個朋友帶咗三個女仔朋友一齊唱，係我人生第一次同女仔同場。朋友見到我面都紅晒個個笑到面黃：『呢幾個豬扒嚟喎，你咁都面紅？』之後同小霖唱酒廊，佢白白淨淨好多囡囡鍾意，我就成 200磅，諗都冇諗過會有人鍾意我。廿歲仔喺聲樂班，有個女仔拖住我隻手捉我出班房話鍾意我，俾佢嚇死：『死啦，人哋同我表白，我要負責喎……咁拍咗拖以後係唔係去到邊都要帶埋佢㗎？咁我哋係唔係要結婚生仔㗎……』實在太驚，打畀個朋友叫佢幫我搞掂佢；跟住興玩 friendster，我識咗個馬來西亞女仔，佢嚟澳門我帶佢去玩，見咗一日，我就做咗個網頁畀佢表白，跟住咪嚇親人囉……唯一正式拍拖，係初嚟香港時嘅圈外女友……都係嗰句，愛情同唱歌一樣，我唔識爭取、唔會強求，我相信嗰個人，同首歌一樣，要嚟嘅時候就會嚟，擋都擋唔住。」
少年時代最高峰時近 200磅，入行後跌至 147磅：「唔係為靚仔， 09年金牌大地震，出碟一拖再拖，手手腳腳又生晒瘡，係壓力過大。」
又傻又天真
06年來港時遇上拍拖一年初戀女友，打後五年感情空白：「我冇再遇上心儀對象，朋友就有，同江若琳最 friend。」《蘋果日報》圖片
小肥說在澳門街頭遇過兩次街頭騙案，兩次都被對方得逞：「我唔係傻㗎，我明知佢哋呃緊我，係唔好意思拒絕之嘛。佢哋話係旅客，又唔見銀包又唔見電話，叫我有幾多畀幾多佢哋，請佢哋住埋一晚酒店……結果我留番自己啲搭車錢，畀晒銀包入面嘅八百蚊佢哋囉。」
36歲仔，心軟又天真到如此田地，其實都幾驚。香港地，這種歌星仔，好久沒見到了。 
撰文：朱小博
攝影：范仲良
化妝： Yen Lai
髮型： Bowie Lo@Chin
形象： Bryan@the Flaming
服裝提供：:chocoolate
留言列表
