王祖藍扮葫蘆娃一炮而紅，香港人唔多識呢隻卡通，但內地同胞則勁有集體回憶，一見到祖藍個造型即刻起哄！
真面目
扮嘢掘金 飛起祥仔思捷 王祖藍扮神級卡通 high爆強國
香港藝人鍾意北上掘金，鄭嘉穎在內地一劇成名，現時起碼收 25萬人仔一集，捱 1年已經儲夠錢買千萬豪宅。
視帝級數當然有價有市，但原來王祖藍靠老本行扮嘢都殺出一條血路。最近王祖藍上湖南衞視的綜藝節目《百變大咖秀》做評判兼表演嘉賓，專門模仿強國經典人物，其中扮騎呢卡通人物葫蘆娃更加紅爆，微博粉絲激增至過百萬。唔使孖住阮兆祥同李思捷都搵到食，祖藍應該好快搵夠老婆本娶李亞男啦！
祖藍同李亞男感情穩定，早前又傳祖藍一擲過千萬買地築愛巢，但兩人暫時未有結婚打算。
自幾年前的跳舞比賽《舞動奇蹟》，湖南衞視一向與 TVB關係良好，祖藍月前亦有機會參與當地的綜藝節目《百變大咖秀》，身兼評判兼嘉賓，與內地著名主持何靈及謝娜做拍檔。
騎呢葫蘆娃
據知湖南衞視本來打算搵祖藍做 1集，但因反應太好，即時決定加碼。節目內祖藍每集都會扮唔同人物，例如陳奕迅、張惠妹等，又會針對同胞口味扮強國經典角色，地位相等於多啦 A夢的內地神級動畫《金剛葫蘆娃》，更令內地觀眾為佢瘋狂，愈騎呢愈受歡迎。
普通話了得的祖藍現時每星期要飛湖南三、四日做錄影，除了湖南衞視外，亦有多個內地電視台希望邀請祖藍上節目。「其實𠵱家有好多單位想搵祖藍演出，無論係電視劇、電影同綜藝節目都有，不過祖藍本身未揀 啱劇本，加上佢係 family man，唔想太長時間離開香港，所以現時只係接 咗 啲綜藝騷同商演，同埋有幾個台 嘅跨年晚會都落實 咗！佢身價係比以前高 咗，總之一個星期做一個騷都夠佢食啦！」知情人士透露。
狂賺人仔，但祖藍早前出席活動時，仍然講明唔會咁快結婚，「內地確係多 咗好多機會，希望可以趁機儲多 啲錢，但𠵱家事業為重，一定唔會結婚住喇！」咁李亞男咪仲要等？
自從參與《百變大咖秀》後，祖藍在國內爆紅，微博粉絲人數激增至 117萬，內地觀眾更狂讚祖藍好似神咁勁！
葫蘆娃夠經典
線條簡單的葫蘆娃， 1986年在內地開始播映，片中七個葫蘆兄弟各有所長，集集一齊打妖精，經典到冇人唔識。 
福祿壽在港已經冇乜突破，難得內地觀眾對呢種扮嘢節目仲有新鮮感，確係要食住條水搵人仔嘅！ 
今年 5月，祖藍亦有上湖南衞視的音樂節目《天星一對》，同周筆暢對唱〈浮誇〉，但反應冇扮鬼扮馬咁受歡迎。
扮張惠妹唱〈原來你什麼都不要〉，祖藍連歌詞都改埋，難怪強國人會讚祖藍有才華！
原來你，一點都不搞笑！
港星爭住扮
湖南衞視的《百變大咖秀》，每集會有觀眾上去比賽鬥扮明星，同時會邀請一班名人做評判或表演嘉賓，蔡依林、林心如等都有做評判。呢期祖藍扮葫蘆娃扮到出 咗位，唔少港星都爭住上節目，例如陳法拉扮過鄧麗君唱歌（上圖），連一向喺香港 cool爆的王喜（下圖），都有上去扮 PSY跳騎馬舞，可想而知掘人仔係幾吸引呢！
法拉扮麗君
王喜跳馬舞
留言列表
