33歲李明熙就係踩住身後部單車由德國返港。李明熙話：「單車喺德國買，只係值港幣 5、 6千蚊，嗰邊超級市場買一架閒閒哋都要 3、 4千，呢架只係高檔過基本款少少咋！踩到返嚟算係咁囉！」
搜尋氣
單車港男李明熙 我唔會打長工
33歲單車港男李明熙，兩週前「凱旋」回港，一部單車踏過 8個國家，由德國開始花掉 210天，走過萬幾公里……長征期間，不少網民與他同步呼吸，在他 fb上留言打氣，更多了一個牠，在新疆一站收養下來的貓女「蛋撻」。
回家兩星期，李明熙說仍在適應中。之前他曾於德國工作和生活了 4年，李明熙對出生地香港，開始感到陌生，於是才選擇香港為今次長征的終點站。成為單車界神級英雄，對於下一次旅程，李明熙未有計劃；但面對將來的日子，他肯定回答：「我從來冇擔心過」。
我喺演藝（學院）讀電影出身，讀完書做過電影剪接、後期製作同新聞台紀綠片編導，加埋做咗 1年，都係 freelance。嗰年沙士（ 03年），冇人會覺得工作穩定，加上我唔鍾意俾工作霸佔所有時間，所以每份都唔係長工。我有兩個妹，雖然係大仔，但係屋企從來唔會畀壓力。畢業後做嘢都係為儲錢，廿幾歲要玩，玩到三十幾都要玩。
之後去咗澳洲 working holiday一年，返嚟第一時間同阿媽講我一定會再走。外國生活太舒服、太自由，於是儲錢再出去。揀德國係因為免學費，只要有學校收你，搞掂自己生活費就得，不過住咗四年開始覺得悶。我唔係單車發燒友，有諗過揸電單車，不過會太快返到嚟，其實踩車只係交通工具。去德國之前我有個女朋友，但因為一定要去，所以我提出分手，始終分隔兩地唔會有好結果，無謂拖拖拉拉啦！呢樣我分得好清楚。
返到香港覺得地方整齊咗好多，但多咗好多規矩。好似公園多咗牌，唔准做呢樣嗰樣，歐洲唔需要呢啲，唔通我哋唔識自律咩？頭呢三個月係我嘅適應期，暫時唔想搵工，之前剩落筆錢可以應付生活。適應期過咗就實會搵，不過唔會係長工囉！我又唔會追求好好嘅生活，夠使就得啦！𠵱家更清楚自己生活模式，唔需要理身邊嘅人點睇，真係唔會擔心以後嘅路係點。但肯定係 3年內唔會再走，呢個係我對阿媽嘅承諾！
上月底，李明熙返港受英雄式歡迎，帶埋佢嘅車隊衝過西九。成為單車英雄，李明熙冇乜感覺：「其實有好多人都做緊相同嘅事，我只係俾人寫成新聞啫！」
喺新疆收養貓女「蛋撻」，一男一貓一齊長征，李明熙曾想過放佢走，但呢個諗法只係諗咗一日。𠵱家「蛋撻」住喺土瓜灣動物管理中心，仲有 3個半月「蛋撻」就可與他重聚，現時李明熙亦經常去探佢。
留言列表
